“Cinayət əməllərində birbaşa iştiraklarına dair sübutlar olan bəzi azərbaycanlılar İranda sığınacaq tapıb”. Bunu Prezident İlham Əliyev ADA Universitetində keçirilən “Cənubi Qafqaz: İnkişaf və əməkdaşlıq” mövzusunda beynəlxalq konfransda iştirak edən iranlı ekspertin iddialarına cavabında bildirib.
Dövlət başçısı qeyd edib ki, həmin şəxslər Azərbaycana qarşı normal cəmiyyətlərdə uyğun hesab edilməyən ifadələr işlətməklə yanaşı, Azərbaycana qarşı ərazi iddiaları irəli sürməkdən də çəkinmirlər və İran həmin şəxsləri rəsmi müraciətə baxmayaraq, Azərbaycana təhvil vermir: “İranda sığınacaq tapan bir çox insan var ki, müntəzəm olaraq Azərbaycana qarşı ərazi iddiaları səsləndirirlər. Aktauda Xəzəryanı ölkələrin sammiti vaxtı ozamankı Prezident Həsən Ruhani ilə görüşdə mən ona İranda yaşayan və müntəzəm olaraq media və sosial şəbəkələr vasitəsilə Azərbaycana qarşı sadəcə ərazi iddiaları irəli sürməklə kifayətlənməyib, normal cəmiyyətlərdə uyğun hesab edilməyən lüğətdən istifadə edən təxminən 20 azərbaycanlıdan ibarət siyahını verdim. Biz bu insanların Gəncə şəhərində polislərə ölümcül hücumda birbaşa iştiraklarına görə Azərbaycana təhvil verilmələrini tələb etdik və bizim sübutlarımız var. Təəssüf ki, onların heç biri təhvil verilməyib”.
Belə aydın olur ki, Gəncə hadisələrində qızışdırıcı mövqedən çıxış edən islamçıları və burada məlum cinayətlər törədən ekstremisləri İran hökuməti gizlədib.
İran Gəncədə polislərə hücumda iştirak edən 20 nəfərin Azərbaycana verilməsindən nə üçün imtina edib?
“...İran tərəfi papağını qarşısına qoyub düşünüb-daşınıb həmin terrorçuları Azərbaycana təhvil verməlidir”
Siyasi ekspert Rövşən Rəsulov bizimlə söhbətində təəssüflə qeyd etdi ki, İran dövlətinin sözü ilə əməli qətiyyən bir-biri ilə uzlaşmır, bu dövlət dildə bir söz deyir, əməldə buna zidd davranış göstərir: “Biz İranın bir söz deyib, fəaliyyətində, əməlində tamam başqa cür olduğunun dəfələrlə şahidi olmuşuq. Bu da həm qonşu, həm də müsəlman dövlət olaraq bizdə təəssüf doğurur. Çünki İranla Azərbaycanın münasibətlərini bir-birinə əsrlər bağlayır. Bu münasibətlər çərçivəsində tarixə də, çağımıza da müraciət etsək barəsində danışılan olay kimi, ona bənzər hadisələr yaşamışıq. İran tərəfindən tərəfindən Azərbaycana qarşı haqsız mövqe nümayiş olunub. Cənab Prezidentin Aktauda keçirilən görüşdə Gəncə hadisələrində iştirak edənlərin Azərbaycana təhvil verilməsi ilə bağlı İran rəhbərliyinə müraciətini xatırlaması təsadüfi deyildi. Çünki bu fakt İranın əməllərindən biridir. Azərbaycan faktlarla və sübutlarla İran qarşısında tələb irəli sürür ki, həmin 20 nəfər Azərbaycana qaytarılsın, amma İran bunu etmir. Niyə? Ona görə ki, açıq-aşkar şəkildə Gəncə hadisələrində cinayət törədənləri dəstəklədiyini, onlara arxa-dayaq olduğunu nümayiş etdirib. Gəncə hadisələri terror hadisəsi olub. Bu terror hadisəsi də İranda məskunlaşan, bu ölkədən güc alan, İranın xüsusi kəşfiyyat idarələri ilə əməkdaşlıq edənlərin planı və iştiarkı ilə baş verib. Nəticədə də həmin faciə baş verib. Əgər Gəncə hadisələrinin arxasında başqa amillər mövcud olsaydı, İran həmin cinayətkarları Azərbaycana təhvil verərdi. Amma təhvil vermirsə, demək terror planının arxasında dayanan faktorların hər birində İranın xüsusi xidmət orqanlarının əli olub. Maraqlıdır, İran tərəfi özünü “təmiz”, “günahsız” sayırsa bəs onda nə üçün Azərbaycan dövlətinin tələb etdiyi 20 azərbaycanlını təhvil verməyib? Heç şübhəsiz, hazırda İranda sığınacaq tapan həmin terrorçular İran hökuməti tərəfindən himayə olunur. Onların himayə olunmasının arxasında da hansı məqsədlər dayandığı aydındır. Sual olunur, hadisədən sonra onlar niyə başqa ölkələrə yox, məhz İrana sığındılar? O adamlar “imam”, “din xadimi” adı altında İranda oturub Azərbaycana qarşı hədyanlar yağdırırlar, İranın bu işdə marağı olmasaydı onları çoxdan susdurardı”.
Siyasi ekspertin fikrincə, digər tərəfdən də, beynəlxalq aləmdə böyük nüfuza malik olan Prezident İlham Əliyevin ən yüksək səviyyədə İranın sabiq prezidenti Ruhanidən bunu tələb etməsi və Ruhanin buna biganə qalması həm də qonşu dövlət olaraq Azərbaycan tərəfdə təəssüf, şübhə və hiddət hissi yaradır. “İran bizim qonşu dövlətdir. Regional inkişafın, sabitliyin əldə olunması üçün İran Azərbaycanın tələbinə müsbət cavab vermək, terrorçuları təhvil vermək əvəzinə terror əməlləri törətmək üçün xüsusi insanlar yetişdirir, kadrlar hazırlayır və onları Azərbaycana qarşı yönəldir. Bu həmin İran dövlətidir ki, torpaqlarımız işğal altında olarkən qanunsuz şəkildə Qarabağ ərazisində biznes fəaliyyəti qurub. Eyni zamanda Ermənistanın, eləcə də separatçıların silahlanması, həmçinin ərzaq təminatı üçün əlindən gələni edib. Yəni bir müsəlman dövlətinin sözdə Allah deyib, əməldə isə şeytançı qüvvələrlə əməkdaşlıq etməsi hiddət doğurmaya bilməz. Bu baxımdan, cənab Prezident bu açıqlamanı verdi və xatırlatdı ki, Azərbaycan da həmin Azərbaycan deyil. Azərbaycan dövləti lazım olanda, yeri gələndə nəinki İranın, eləcə də istənilən ölkənin bizim ölkəmizə qarşı təhdiq xarakterli cəhdlərini ifşa edəcəkdir. Ümid edirik ki, cənab Prezidentin bu bəyanatından sonra İran tərəfi papağını qarşısına qoyub düşünüb-daşınıb həmin terrorçuları Azərbaycana təhvil verməlidir. Düzdür, İranın onları bizə verməsi inandırıcı görsənmir, amma hər halda bundan sonra İran tərəfi o terrorçuları bizə təhvil versələr o zaman biz İranın səmimiyyətinə inana bilərik. Hələlik isə, İranın səmimiliyinə nəinki inanmamalıyıq, hətta İran tərəfdən gələn təhlükələrə qarşı ehtiyat tədbirləri görməliyik. İran Azərbaycanın qonşusu olaraq özünü tamamilə fərqli istiqamətində aparmalıdır, bizim ölkə ilə dostluq münasibətlərini səmimi şəkildə qurmalıdır, əks halda Azərbaycan zaman-zaman onun əməllərini ifşa edəcək və ölkənin beynəlxalq aləmdə nüfuzu daha da aşağı düşəcək”-deyə R.Rəsulov vurğuladı.
İradə SARIYEVA
