“Bizə artıq Qarabağdakı ermənilərdən mesajlar daxil olur. Bunlar çox müsbət mesajlardır. Biz artıq müxtəlif səviyyələrdə ilkin təmaslara başlamışıq. Bunun təfərrüatlarına varmaq istəmirəm, lakin proses artıq başlayıb və bu, bir daha bizim niyyətimizi göstərir. Onlar sürətli iqtisadi inkişafın bir hissəsi ola bilərlər, onlar vahid Azərbaycan dövlətində özlərini daha çox təhlükəsiz, rahat hiss edə bilərlər, lakin onlar separatçı tendensiyalardan və separatçı istəklərindən vaz keçməlidirlər. Onlar həm də reallığı başa düşməlidirlər. Onlar xəritəyə baxmalı, coğrafiyaya nəzər salmalı və başa düşməlidilər ki, yüz minlərlə azərbaycanlı yaxın gələcəkdə Kəlbəcərə, Laçına, Şuşaya, Ağdama qayıdacaqdır. Onlar bu mühitdə yaşamalı olacaqlar. Qonşu kimi yaşamalı, düşmənçiliyi bir kənara qoymalı, separatçıları təcrid etməli, separatçıları məsuliyyətə cəlb etməli və bundan sonra düşünürəm ki, onlar da faydaları görəcəklər”.
Bu fikirləri Prezident İlham Əliyev aprelin 29-da ADA Universitetində "Cənubi Qafqaz: İnkişaf və əməkdaşlıq" mövzusunda beynəlxalq konfransda çıxışı zamanı deyib.
“Ona görə də dövlətimizə müsbət siqnallar ötürürlər”
Qarabağ Azadlıq Təşkilatının (QAT) sədri Akif Nağı baki-xeber.com-a bildirdi ki, Qarabağdakı ermənilərdən Azərbaycan dövlətinin müsbət mesajlar, siqnallar alması təbiddir. Ekspertin fikrincə, bu Azərbaycan dövlətinin və Azərbaycan xalqının humanistliyi ilə bağlıdır. “Xalqımızın humanist keyfiyyətlərini ifadə edərək cənab Prezident ermənilərin Azərbaycan ərazisində qalıb yaşamaq istəyini xüsusi vurğu ilə beynəlxalq ekspertlərin, beyin mərkəzlərinin nümayəndələrinin diqqətinə çatdırdı. Azərbaycan xoş niyyətini ifadə edir. Oradakı ermənilər də Azərbaycan vətəndaşlarıdır və dövlətimiz istəyir ki, onlar da qalıb yaşasınlar. Azərbaycan 44 günlük müharibədən sonra da, əvvəllər də dəfələrlə bəyan edib ki, Qarabağda yaşayan ermənilər bizim vətəndaşlarımızdır və onlar da digər vətəndaşlarımız kimi yaşa, dövlətin imtiyazlarından bəhrələnə bilər və sair. Görsənən odur ki, Azərbaycan dövlətinin indiyə qədər Qarabağdakı ermənilərə müsbət mesajları, çağırışları cavabsız qalmayıb. Bu onu göstərir ki, 100 ildir erməni daşnaklarının, separatçıların əlində alətə çevirilən, hər cür oyuna, xəyanətə sürüklənən sadə ermənilər artıq onların başına bu oyunları açandan imtina edirlər. Bu gün Qarabağdakı sadə ermənilər separatizmə, separatşıbaşı Araikə, rəsmi İrəvanın mövqeyinə əks yol tutub talelərini Azərbaycan dövlətinə bağlamaq istəyirlər. Onların separatçıbaşı Araikin, Köçəryan və Sarkisyan cütlüyünün, Paşinyanın çaldığı havaya oynamaq istəməmələri təbiidir. Çünki illərdir ki, yanlış siyasət yürüdənlərin əlində oyuncağa çevirilməkdən beziblər. Qarabağda yaşayan sadə ermənilərin arasında da reallığı dərk edib nicat yolunun Azərbaycan vətəndaşlığını qəbul etməkdə görənlər var. Özlərinin zillətdən, məşəqqətdən, köləlikdən azad olmaqlarının səbəbkarı kimi Azərbaycan dövlətini görürlər. Ona görə də dövlətimizə müsbət siqnallar ötürürlər”.
A.Nağı onu da vurğuladı ki, ermənilərin xisləti bütün dünyaya məlumdur və son yüz ildə azərbaycanlılara qarşı xəyanətlər ediblər. A.Nağı hesab edir ki, Qarabağdakı ermənilər bizim vətəndaşlığımızı qəbul etdikdən sonra da, bütün vaxtlarda onlara qarşı ehtiyatlı olmalıyıq və ayıqlığımızı itirməli deyilik.
İradə SARIYEVA
