Ermənistanda faşizmin tüğyan etdiyi göz önündədir. Son günlər baş verən proseslərin tərkibində də faşizm əhvalı özünü gizlətmir. Ermənistanın Baş naziri Nikol Paşinyana müxalif olan qüvvələr meydanlara çıxarkən “xeyir-dua”nı faşist əlaltılarının məzarlarından almağa başlayıblar. Ermənistan mediasının verdiyi məlumata görə, “Müqavimət” hərəkatının üçüncü qrupu Drastamat Kanayanın (daha çox daşnak, faşist Dro kimi tanınır) məzarından İrəvana yürüşə başlayıb.
Ermənilər faşist Dronun qəbrindən, məzarından yürüşə başlayırlar, faşist əlaltısının məzarını dünyanın gözünün qabağında “əziz-xələf” tuturlar. Rusiya isə Ukraynada faşist axtarır, amma gözünün qabağında düşmənçilik niyyəti ilə, faşizmi təbliğ etmək məqsədilə İrəvandan “xatirə yürüşü”nə başlayan erməniləri görmür. Ermənistanda faşizm hərəkatına dünya, əsasən də Rusiya susur.
Bu necə ola bilər ki, ermənilər Dronun qəbrindən hərəktata başlayıb, amma Rusiya və başqa dövlətlər buna göz yumur?
“Ermənilərə “dayan-dur” deməyin vaxtı çoxdan keçib”.
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə açıqlamasında bildirdi ki, ermənilər İkinci Qarabağ müharibəsində məğlubiyyətlərindən sonra artıq affekt vəziyyətindədir, heç düşünə də bilmirlər. “Amma az-çox düşünməyə vaxtları olsa yaxşı olar, çünki tutduqları yol onların özlərinə ziyandır. Faşist Hitlerin əlaltısı olan daşnak Dronun yolu ilə gedib revanşizmi, faşizmi əldə bayraq etmələri ermənilərin özlərinin faciəsidir. Onlar bu gün Njdenin, Dronun və başqa daşnakların, nasistlərin yolu ilə getməklə həm də bölgəyə təhlükə yaradırlar. Ermənilərin faşizmin iştirakçısı və qulu olan Droya “tapınmaqları” dünyanın diqqətindən qaçmamalıdır. Rusiya da, başqa ölkələr də bilməmiş deyil ki, Dro Qafqazda nə qədər qan töküb. Onun kimi qaniçən, bəşəri cinayətkarın qəbrinin “and yerinə” çevrilməsi onu göstərir ki, ermənilər heç zaman revanşizmdən əl çəkmək istəmir. Rusiya faşizm əleyhinə bəyanatlar verir, biz də faşizmə qarşıyıq. Amma o bir başını qaldırıb Ermənistana da baxsın, görsün ki, Dronun məzarı “müqavimət hərəkatının” “ilham” mənbəyidir. Ermənilərə “dayan-dur” deməyin vaxtı çoxdan keçib. Yazılanlara görə, Paşinyan Moskvada Putin onun qarşısına faşizmlə mübarizə aparmaq tələbi qoyub, amma biz bunun əksini görürük”.
Ermənilərin uzun illərdir faşizmə bağlı olduğunu deyən Q.Hacıyevin sözlərinə görə, Rusiya antifaşist hərəkatına Ermənistandan və ermənilərdən başlamalı idi: “Ermənilər həmişə nasistlərin, faşistlərin yolunda olub. Müasir dünyada faşizmi dövlət siyasətinə çevirən ölkə Ermənistandır. Görün hansı ölkədə bu qədər faşist heykəli var? Heç birində. Ermənizm faşizmdən heç də az təhlükəli deyil. Faşizmə qarşı olduğunu bəyan edən dünya Ermənistanın bugünkü halına baxsın. Rusiyanın axtardığı faşizm başqa ölkələrdə yox, məhz Ermənistandadır, faşizm qulları bu ölkədə yaşayır. Bunu bilmək çətin deyil. Qoy dünya da görsün ki, dəstəklədiyi Ermənistan hansı yoldadır”.
İradə SARIYEVA
