Ermənistanın Korrupsiyaya Qarşı Mübarizə Komitəsi baş nazir Nikol Paşinyanın 44 günlük müharibənin nəticələrinə görə məhkəmə qarşısına çıxarılması üçün prokurorluqdan müraciət alıb. Erməni KİV-nin verdiyi məlumata görə, bu barədə Komitənin mətbuat xidməti məlumat yayıb.
Bildirilir ki, müharibədə ölən erməni hərbçilərin valideynləri Paşinyanın təqsirləndirilən şəxs qismində cəlb edilməsi ilə bağlı prokurorluğa tələb təqdim ediblər. Baş Prokurorluq onların ərizəsini Korrupsiyaya Qarşı Mübarizə Komitəsinə (istintaq funksiyaları ilə məşğul olan) göndərib.
Xatırladaq ki, 2022-ci il aprelin 18-də həlak olan hərbçilərin valideynləri Ermənistan Baş Prokurorluğuna Paşinyanın dediklərinə görə cinayət işinin açılması tələbi ilə müraciət ediblər. Baş nazir bildirib ki, əraziləri təslim etməklə minlərlə insanın həyatını xilas etmək olarmış, amma o bundan imtina edib və nəticədə minlərlə insan ölüb. Baş Prokurorluq bildirib ki, sənədlər Baş Qərargahın keçmiş rəisi Movses Akopyanın işi ilə birləşdirilməsi üçün Korrupsiyaya Qarşı Mübarizə Komitəsinə göndərilib.
Baş verən bu proses suni görüntü mahiyyətini daşıyır, yoxsa doğrudan da Paşinyana qarşı baş qaldıran real hüquqi prosesdən doğan qısnamadır?
Politoloq Rəşad Bayramov “Bakı-Xəbər”ə açıqlamasında bildirdi ki, Ermənistanda demokratik təsisatların necə fəaliyyət göstərdiyinə real qiymət vermək üçün Paşinyanın hakimiyyətə gəldiyi ilkin dönəmi analiz etmək lazımdır: “Özünə demokrat adını qoyan bu adam bütün qeyri-qanuni üsullara əl atdı ki, hakimiyyətə gələ bilsin. Öz tərəfdarları və hakimiyyət rıçaqlarından istifadə etməklə parlamenti mühasirəyə aldı ki, onu baş nazir seçsinlər. Bu alınmayanda, səs çoxluğu ilə indiki müxalifətdə olan parlamentin buraxılmasına nail oldular. Paşinyanın ona tabe olmaq istəməyən baş qərərgah rəisinin başına hansı oyunları gətirdiyini hamı gözəl bilir. Ən nəhayət, alınmaz son qala olan Konstitusiya Məhkəməsini də özünə ram etmək üçün həmin hüquqi təsisata qarşı da qanunsuz üsullardan istifadə etdi. Hazırda Paşinyan hakimiyyətdə daha bərk oturub. Əlavə bir seçki də keçirərək qalib gəlib. Belə olan təqdirdə ona birbaşa tabe olan prokurorluqda şəxsinə qarşı cinayət işinin açılmasını belə sakit seyr etməsi heç də inandırıcı görünmür. Başdan-ayağa qurama bir prosesdir. Biz keçmişdə qalan “Dağlıq Qarabağ münaqişəsinin” mövcud olduğu bütün dönəmlərdə Ermənistanın daxili ictimai rəyində bənzər şouları seyr etmişik. Nə zaman ki, beynəlxalq birlik Ermənistanı sıxıb, müxalifəti aktivləşdiriblər. Hətta yeri gələndə terrora belə əl atıblar. Hazırda da biz Ermənistan müxalifətinin aktivləşdiyini hiss edirik. Bununla paralel olaraq Paşinyana cinayət işinin açılması ilə bağlı şounu izləyirik. Bunların hamısı Paşinyanı sülh sazişini imzalamaqdan yayındırmağa xidmət edir. Xaricə göstərmək istəyir ki, deyilən bir sözə görə ona cinayət işi açırlarsa, gör sülh sazişinə imza atıb Qarabağdan imtina etsə onu hansı günə qoyarlar”.
Məhəmmədəli QƏRİBLİ
