Avropa Şurası Parlament Assambleyası (AŞPA) Rusiyanın Ukraynaya qarşı hücumlarının günahkarlarını məsuliyyətə cəlb etmək üçün xüsusi beynəlxalq cinayət tribunalının yaradılmasını tələb edir. Bununla bağlı AŞPA bütün üzv dövlətlərə çağırış edib.
Bildirilib ki, tribunal Rusiya Federasiyasının siyasi və hərbi rəhbərliyinin hərəkətlərini araşdırmaq və mühakimə etmək mandatı almalıdır. Həmçinin qeyd edilib ki, tribunal Strasburqda yerləşərək, Avropa İnsan Hüquqları Məhkəməsi ilə eyni istiqamətdə işləməli, beynəlxalq həbs qərarı vermək səlahiyyətinə malik olmalı və dövlət toxunulmazlığı və ya dövlət və hökumət başçılarının və digər dövlət rəsmilərinin toxunulmazlığı ilə məhdudlaşdırılmamalıdır.
Bu barədə Ordu.az AŞPA-nın saytına istinadən məlumat yayıb.
AŞPA belə ədalətlidirsə, indiyə qədər Ermənistana qarşı niyə bu tələbi irəli sürməyib? Ermənistanla bağlı cinayət tribunalı nə vaxt yaranacaq?
“AŞPA-nın Sarkisyana, Köçəryana və başqalarına qarşı da beynəlxalq cinayət tribunalı qurulması tələbini irəli sürməsini istəyirik”
AMEA-nın Sosiologiya və Fəlsəfə İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, ümumi AŞPA-nın Ukraynaya hücum etdiyi üçün Rusiyaya qarşı beynəlxalq cinayət tribunalının yaradılmasını tələb etməsi başadüşüləndir. “Çünki AŞPA-nın üzvləri əsasən Rusiyanın Ukraynaya qarşı işğalçılıq siyasətini qəbul etmir, pisləyir. Ümumiyyətlə, Rusiyanın bu hücumunu Avropa özünə qarşı təhdid sayır. Rusiyanın Ukraynanı işğal etməyə cəhd göstərməsini Avropa ölkələri müəyyən qədər özlərinə təhdid kimi görürlər. Ona görə də, Rusiyanın mandatının geri alınması, onun beynəlxalq cinayət tribunalına verilməsi tələbləri ilə çıxış eidrlər. Bu anlamda Rusiyaya qarşı münasibətdə belə kəskin mövqe nümayiş etdirirlər. Ancaq AŞPA Rusiyaya göstərdiyi münasibəti heç zaman Ermənistana göstərməyib. Müəyyən mənada hansısa bəyanatlar olub, amma üstüörtülü şəkildə. AŞPA Rusiyaya qarşı göstərdiyi qəti və birmənalı davranışı Ermənistana sərgiləməyib. Halbuki, Ermənistan da Azərbaycan torpaqlarını uzun illər işğal altında saxlamışdı, amma AŞPA bu ölkəyə qarşı hər hansı bir tədbir görmək istəmədi. Ermənistan Azərbaycan torpaqlarını işğal edərkən və işğalda saxlayarkən insanlıq əleyhinə saysız cinayətlərə əl atıb. Dinc, mülkü əhaliyə divan tutub, mülkü obyektləri, evləri qadağan olunmuş silahlardan atəşə tutub və sair. Amma AŞPA keçən 30 ildə bir dəfə də olsun üzv dövlətlərə müraciət edib tələb irəli sürmədi ki, Ermənistana qarşı beynəlxalq cinayət tribunalı qurulsun. Rusiyanın qarşı hücumlarının günahkarlarını məsuliyyətə cəlb edilməsi müsbət olardı. Amma gərək Azərbaycan ərazilərini işğal edənlərə, ərazilərimizdə hər cür müharibə cinayətləri törədən Sarkisyana, Köçəryana və başqalarına da bu tribunal yaradılsın. Biz də Azərbaycan olaraq AŞPA-nın Sarkisyana, Köçəryana və başqalarına qarşı da beynəlxalq cinayət tribunalı qurulması tələbini irəli sürməsini istəyirik. Qoy AŞPA üzv dövlətlərindən buna da dəstək verməsini tələb etsin. Təbii, əgər obyektvdirsə”.
F.Ələkbərli qeyd etdi ki, indiyə qədər Fransa, Yunanıstan və başqa Avropa ölkələri nəinki Ermənistanın işğalçılığını pisləyib, hətta ona haqq qazandırmağa çalışıblar. Biz 44 günlük müharibə zamanı da o ölkələrin hansı mövqe nümayiş etdirdiyini gördük. O hesab edir ki, bunların mövqeyi birmənalı olaraq qəbuledilməz idi. “Həmin ölkələr nəinki Ermənistanı, hətta məhv edilmiş qondarma rejiminin tör-töküntülərini də müdafiə edirdilər. Bəzi dairləri bu gün də müdafiə edir. Hesab edirəm ki, Azərbaycan tərəfi daha detallı şəkildə məsələni qaldırmalıdır. Nə üçün AŞPA-nın Rusiyaya qarşı birmənalı olaraq belə bir tələb ortaya qoyduğu halda bu Ermənistana göstərilmir? Ermənistanın beynəlxalq tribunala verilməsi məsələsini Azərbaycana və Türkiyəyə yaxın olan Avropa ölkələri ciddi şəkildə ortaya qoymalıdır. Mənə elə gəlir ki, Ukrayna da Azərbaycanın haqlı mövqeyini dəstəkləməlidir. Çünki özü də Rusiyanın təcavüzünə məruz qalıb. Fikir verib görürük ki, Rusiya ilə bağlı məsələdə Avropa ölkələrinin mövqeyi böyük ölçüdə üst-üstə düşür. Amma Ermənistana gəldikdə, biz bunu görmürük, yenə də ikili, üçlü standarlar mövcuddur. Bizim üzərimizə düşən bu cür ikili, üçlü oyunları tamamilə açıb göstərmək və Ermənistana qarşı da bu cür davranışların sərgilənməsinə nail olmaqdır. Biz Ermənistana qarşı da AŞPA-nın bu tələbi irəli sürməsinə və başqa sanksiyalar tətbiq etməsinə cəhdlər etməliyik”. F.Ələkbərlinin sözlərinə görə, bütün üçün isə güclü şəkildə Azərbaycana və Türkiyəyə yaxın olan ölkələrin parlamentarilərini prosesə qoşmaq gərəkdir. O hesab edir ki, bu cür ittihamları Ermənistana qarşı irəli sürmək və gerçəkləşdirmək mümkündür, bunun üçün də ciddi işlər görülməsinə ehtiyac var.
İradə SARIYEVA
