Aprelin 22-də Şuşa şəhərində keçirilən Dünya Azərbaycanlılarının V Qurultayı – Zəfər Qurultayının dövlətçilik tariximizdə və xalqımızın birliyi, yenidən təşkilatlanması istiqamətində yeni cığırlar, yollar açacağı bildirilir.
Dünyanın diqqət mərkəzində olan Şuşada Dünya Azərbaycanlılarının V Qurultayının keçirilməsinin böyük ictimai-siyasi, tarixi əhəmiyyəti var. Bu eyni zamanda xaricdə yaşayan soydaşlarımızın da həyatında, taleyində xüsusi yer tutur. Bu qurultaydan dünyaya verilən mesajlar, burada səsləndirilən fikirlər, qəbul edilən qəraralar birmənalı olaraq dünyada yaşayan azərbaycanlıların dövlətimiz üçün nə qədər əhəmiyyət daşıdığını ortaya qoyur.
Zəfər Qurultayının nümayəndələri Prezident İlham Əliyevə müraciət ünvanlayıblar…
Məlum olduğu kimi Şuşa şəhərində keçirilən Dünya Azərbaycanlılarının V Qurultayının nümayəndələrinin Prezident İlham Əliyevə müraciəti qəbul olunub: “Dünya azərbaycanlılarının son qurultayından ötən dövr ərzində diaspor quruculuğu sahəsində mühüm işlər görülmüş, ciddi uğurlar əldə edilmişdir. Sizin tapşırıq və tövsiyələrinizə uyğun şəkildə diaspor təşkilatlarının fəaliyyətində keyfiyyət dəyişikliyinə nail olunmuş, Azərbaycan həqiqətlərinin dünya ictimaiyyətinə çatdırılması, soydaşlarımızın yaşadıqları ölkələrdə cəmiyyət həyatına inteqrasiyası və onların ictimai-siyasi fəallığının artırılması sahəsində mühüm layihələr həyata keçirilmişdir. Azərbaycana dost münasibəti bəsləyən xalqların müxtəlif ölkələrdəki milli icmaları və diaspor təşkilatları ilə əlaqələr dərinləşdirilmişdir. Xaricdə yaşayan azərbaycanlılara və diaspor təşkilatlarına dəstəyinizə görə Sizə minnətdarıq. Dünya azərbaycanlıları Sizin inamlı və məqsədyönlü siyasətiniz nəticəsində Azərbaycanın müstəqil dövlət kimi dünya siyasi səhnəsində öz yerini daha da möhkəmləndirməsindən və qlobal proseslərin fəal iştirakçısına çevrilməsindən qürur duyur. İnanırıq ki, Sizin rəhbərliyinizlə xalqımız qarşıda duran bütün vəzifələrin öhdəsindən layiqincə gələcək, işğaldan azad olunmuş ərazilərimizi qısa zamanda bərpa edəcək, yenidən abadlaşdıracaq və gözəlləşdirəcəkdir. Sizi əmin edirik ki, Azərbaycan həqiqətlərinin dünyaya çatdırılması, milli-mənəvi dəyərlərimizin qorunub saxlanılması və tanıdılması, dövlətimizin maraqlarının təmin olunması və mənafelərinin müdafiəsi naminə dünya azərbaycanlılarının daha mütəşəkkil qaydada təşkilatlanmaları üçün bundan sonra da bütün imkan və bacarığımızı səfərbər edəcəyik”.
Şuşa Qurultayının dünya azərbaycanlılarının həyatında oynadığı rol nədir?
İSBAM sədri Samir Adıgözəllinin sözlərinə görə, Şuşa Qurultayı azərbaycanlıların yenidən təşkilatlanmasında əhəmiyyəti böyükdür. S.Adıgözəlli hesab edir ki, V Qurultayda Prezidentin proqram xarakterli çıxışı, vurduğu hədəflər, dünyaya verdiyi mesajlar, eləcə də xaricdə yaşayan soydaşlarımızla bağlı səsləndirdiyi fikirlər bizim üçün bir yol xəritəsidir. “Əvvəla onu deyim ki, Şuşa Qurultayı Dünya Azərbaycanlılarının yenidən təşkilatlanması, onların öz fəaliyyətlərini tamamilə yeni formada qurması üçün əlavə istiqamətlət açır. Hesab edirəm ki, xaricdə fəaliyyət göstərən diaspor təşkilatları, diaspor fəalları öz fəaliyyətlərinə yenidən baxmalıdırlar. Çünki buna ehtiyac var. Onu da qeyd edim ki, bu gün dünya azərbaycanlılarının bu cür mütəşəkkil olmaqlarında, Dünya Azərbaycanlılarının Qurultaylarının vaxtlı-vaxtında keçirilməsində ölkə başçısının rolu çox böyükdür. Prezdent xaricdə yaşayan soydaşlarımızı daim diqqətdə saxlayır. Təsəvvür edin ki, Dünya Azərbaycanlılarının I Qurultayı ümummilli lider Heydər Əliyevin təşəbbüsü ilə 2001-ci ildə, II qurultay Prezident İlham Əliyevin Sərəncamına əsasən 2006-cı ildə, III qurultay 2011-ci ildə, IV qurultay isə 2016-cı ildə keçirilib. V Qurultayın da keçirilməsinin təşəbbüskar ölkə başçısı olub. Cənab Prezident dünya azərbaycanlılarının mütəşəkkil, dövlətçi, azərbaycançı olması üçün bütün tədbirləri görür, təşəbbüslər irsəli sürür, onlara münasibətlərini əməlləri ilə göstərir. Bu baxımdan hesab edirəm ki, xaricdəki diaspor qurumlarımız, diaspor fəaliyyəti ilə məşğul olanlar Prezidentin etimadını doğrultmalıdırlar. Yoxsa burada vəd verib, odlu-alovlu çıxış edib ölkə sərhədlərini keçəndən sonra verdiyi vədi unudanlardan olmasınlar. Bu gün Azərbaycan müzəffər ölkədir və Azərbaycanın zəfərini xaricdəki soydaşlarımız geniş təbliğ etməlidir ki, biz saxta erməni təbliğatına cavab verə bilək. Dünya Azərbaycanlıları lobbiçilik fəaliyyətlərini daha da gücləndirməlidirlər. Bu sahədə görüləcək çoxlu işlər var”.
“Bu gün dünya azərbaycanlıları üçün yeni fəaliyyət perspektivləri açılıb”
S.Adıgözəlli hesab edir ki, Qurultayda Prezidentin səsləndirdiyi hər bir söz, fikir onların öz fəaliyyətlərini indən sonra necə qurmalı olduqları üçün istiqamətdir, yöndür: “Prezident hər şeyi açıq danışdı və indiyə qədər xaricdə yaşayan soydaşlarımızın gördüyü işləri də vurğuladı, qarşıda duran vəzifə və hədəflərini də səsləndirdi. Cənab Prezident Azərbaycan dövlətinin uğurlarını vurğulamaqla yanaşı bildirdi ki, bütün bu müsbət məqamlara baxmayaraq, hər birimiz – həm Azərbaycan hökuməti, həm səfirliklər, diaspor təşkilatları, bütün fəallar yeni reallıqları dünya ictimaiyyətinə çatdırmalıdırlar: “Sizin – xaricdə yaşayan azərbaycanlıların bu sahədə daha böyük imkanlarınız var”. Bu gün dünya azərbaycanlıları üçün yeni fəaliyyət perspektivləri açılıb və onlar mütləq bunu dəyərləndirməlidirlər. Onlar Prezidentin etimadını doğrultmaq üçün bütün imkanlarından istifadə edib Azərbaycanın qələbəsini təbliğ etməlidirlər”.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
