Prezident İlham Əliyev ABŞ Dövlət katibi köməkçisinin Qafqaz məsələləri, regional münaqişələr və Cənubi Avropa məsələləri üzrə müavini Erika Olsonun başçılıq etdiyi nümayəndə heyətini qəbul edib.
Nümayəndə heyətinə ABŞ Dövlət Departamentinin Qafqaz bölgəsi danışıqları üzrə ali müşaviri Endryu Şafer, ABŞ-ın Azərbaycandakı səfiri Örl Litzenberger, Gürcüstandakı səfiri Kelli Deqnan və Ermənistandakı səfiri Linn Treysi daxildir. Görüşdə Azərbaycanla ABŞ arasında ikitərəfli əlaqələrin inkişaf perspektivlərinə dair geniş müzakirələr aparılıb. Bütün bunlarla yanaşı, Prezident ABŞ Dövlət katibi köməkçisinin müavininin başçılıq etdiyi nümayəndə heyətini qəbul edərkən bəyan etdi ki, sülh müqaviləsi ilə bağlı Azərbaycan nümayəndə heyəti hazırdır: “Sülh müqaviləsi ilə bağlı danışıqların başlanılması üzrə Azərbaycan nümayəndə heyəti hazırdır”.
O da məlumdur ki, ölkəmiz bu istiqamətdə üzərinə düşən bütün işləri yerinə yetirir. Məsələ ondadır ki, Azərbaycan həm nəqliyyat-kommunikasiya xəttlərinin açılması ilə bağlı konkret işlər aparır, həm də sərhədlərin delimitasiyası ilə bağlı kommisiyanı formalaşdırıb. Üstəlik, sülh müqaviləsi ilə bağlı nümayəndə heyəti də hazırdır. Ancaq bunların heç biri Ermənistanda yoxdur. Ermənistan yalnız formal xarakterli açıqlamalar verir. Sadalanan məqamlarla bağlı praktiki işlər isə yox səviyyəsindədir.
O baxımdan bütün bunları ekspertlər necə dəyərləndirir?
“Vaşinqton buna seyrçi mövqedən yanaşmamalı və İrəvana təzyiq etməlidir”
Sözügedən məsələ ilə bağlı fikirlərini “Bakı-Xəbər”lə bölüşən politoloq Tural İsmayılov bununla bağlı bir sıra məqamlara toxundu: “Əvvəla, Azərbaycan 44 günlük Vətən müharibəsində qələbəsindən sonra sülhün və etimadın vacibliyi ilə bağlı dəfələrlə dürüst mövqe ortaya qoysa da, bugünə qədər Ermənistan tərəfindən adekvat cavab gəlməyib. Azərbaycan Zəngəzur dəhlizi ilə bağlı dəmir və avtomobil yollarının çəkilişini həyata keçirir. Həmçinin sülh sazişi və sərhədlərin delimitasiyası ilə bağlı işçi qrupları formalaşdırıb. Ancaq Ermənistan tərəfindən bu istiqamətdə heç bir əməli, praktiki addımlar atılmır. Bütövlükdə, Ermənistanın həm 10 noyabır bəyanatı, həm də 26 noyabr Soçi və ondan sonra Brüssel bəyanatlarının müddəalarından irəli gələn şərtləri yerinə yetirmir. Bütün bunlar ondan irəli gəlir ki, ermənilərin gələcəklə bağlı planları sağlam deyil. Hansı ki, Ermənistan rəhbərliyi Türkiyə və Azərbaycanla münasibətləri yaxşılaşdırmaqdan başqa yollarının olmadığını yaxşı bilr. Onuun da fərqindədilər ki, yeni yaranan reallıqlar fonunda diktə edən tərəf qalib Azərbaycandır. Belə olan halda Ermənistanın şərtləri qəbul etməkdən başqa heç bir yolu qalmayıb. Ancaq təəssüflər olun ki, bu günə qədər həm Avropa İttifaqı Şurası, həm də Rusiya tərəfindən Ermənistana daha sərt basqılar həyata keçirilmir. ABŞ-ın da bu yöndə imkanları olsa da, biz bunu görmürük. Təbii ki, təzyiqlərin olmaması Ermənistanı arxayın salır. İrəvan əldə olunan razılaşmalarla bağlı addımlar atmır. Bunu həm Zəngəzur məsələsində, həm də əsir və itkin düşmüş azərbaycanlıların taleyi məsələsində görürük. Bu suallara aydınlıq gətirilmədi. Ona görə Vaşinqton da bütün bunlara seyrçi mövqedən yanaşmamalı və İrəvana təzyiq etməlidir. Əks halda Ermənistan vaxtı uzadacaq”.
Politoloq onu da əlavə etdi ki, ümumilikdə Ermənistana dur deyilməsə, regionda vəziyyət yenidən gərginləşə bilər.
Vidadi ORDAHALLI
