Ermənistan Qarabağdan heç cür gözünü çəkmək istəmir. Bir tərəfdən sülh müqaviləsindən, delimitasiya və demarkasiyadan danışır, dövlətlərarası komissiya yaradılır, o biri tərəfdən isə təxribatçı caynaqlarını yenə də Qarabağa uzadır.
Azərbaycan mətbuatının yazıdığına görə, Ermənistanın “Ştigen” Şirkətlər Qrupu Qarabağda yeni layihəyə start verib. Həmin layihə Xankəndidə hər bir ev üçün Günəş enerjisi ilə işləyən su qızıdırcılarının quraşdırılmasından ibarətdir.
Mətbuatın xəbərinə görə, “Ştigen” şirkətinin rəhbəri Hayk Şekyan bildirib ki, ilkin olaraq bu məqsədlə Xankəndiyə 12 ədəd Günəş enerjisi ilə işləyən su qızdırıcısı göndərib. O deyib ki, Qarabağın elektrik enerjisinə olan tələbatının öz hesabına formalaşdırlmasına çalışır. “Müharibədən qabaq Qarabağda 36 SES var idi. Hazırda onlardan cəmi 4-ü qalıb. Əgər müharibədən əvvəl Qarabağ elektrikə olan təminatını ödəyib, hətta Ermənistana da elektrik enerjisi verə bilirdisə, indi Qarabağdakı ermənilər özlərinin təlabatının heç yarısını ödəyə bilmirlər”.
Erməni şirkət rəhbəri bildirib ki, Xankəndinyə göndərilən tutumu 300 litr olan su qızdırıcıları gündəlik 16 kVt/saat elektrikə qənaət edir. “Əgər Xankəndidəki 10 min ev və mənzildə günəş enerjisi ilə işləyən belə cihazlar quraşdırlarsa, o zaman ildə 58 milyon kVt/saat elektrik enerjisindən istifadə etmək mümkün olacaq. Bu da Sərsəng SES-in 40-65 faiz enerjisinə qənaət deməkdir”.
Ermənistan şirkətləri bu qanunsuz addımları ilə öz aləmlərində Xankəndidə yaşayan erməniləri guya elektrik enerjisi asıllığından xilas etmək istəyirlər, belə rəy formalaşdırmaq istəyirlər ki, “ermənilər özləri özlərini elektrik enerjisi ilə təmin edir”.
Ermənistan şirkətlərinin bu qanunsuz əməllərinə şərh verən ekspertlərin sözlərinə görə, Ermənistan şirkətlərinin heç bir halda buna hüququ çatmır və bu qanunaziddir. Rusiya sülhməramlılarının buna şərait yaratmalı olmadığını deyən ekspertlərin sözlərinə görə, baş verənlər Azərbaycanın suveren ərazisində həyata keçirilən qanunsuzluqdur.
“Ermənistan şirkətlərinin bu addımı təxribatçılıqdır və qanundan kənardır”
Sosial-iqtisadi sahə üzrə ekspert Elçin Bayramlı hesab edir ki, Ermənistan şirkətlərinin Qarabağdakı ermənilərin hər hansı formadasa “qeydinə qalması”nın heç bir əsası yoxdur. “Aydındır ki, bununla Ermənistan göstərmək istəyir ki, guya Qarabağdakı ermənilərin sosial həyatı, təhlükəsiz yaşaması üçün yardım göstərir. Amma Ermənistan şirkətinin Xankəndidə həyata keçirdiyi bu “layihə” tamamilə qanunaziddir və absurddur. Bu heç bir fayda verməyən “layihədir”. Tutaq ki, Günəş panelləri quraşdırırlar. Bu panellər ancaq su qızdırmaq üçün nəzərdə tutulub, başqa enerji mənbələri hardan olacaq? İkincisi, payız-qış aylarında Günəş enerjisini hardan alacaqlar? İstilik soyuq havada lazım olur. Üçüncüsü də, günəşli günlərin sayına görə Azərbaycanda Qarabağ ən axırıncı yerlərdən birini tutur. Orada uzaqbaşı ilin 5-də birində Günəş effekti, enerji almaq olar, o da ki, su qızdırıcını qızdırmağa güclə çatar. Bu mənasız bir işdir. Burada daha çox siyasi-ideoloji məqsəd güdülür ki, guya onlar erməniləri gələcəkdə Azərbaycanın enerji asılılığına düşməməkdən qurtarırlar. Bu da dediyim kimi mənasız bir işdir. Ermənistan şirkətlərinin bu addımı təxribatçılıqdır və qanundan kənardır. Onların bu “layihələri” Xankəndidəki ermənilərin elektrik enerjisi ilə təmin olunmasına heç bir fayda verə bilməz. Xankəndi əhalisi Azərbaycanın elektrik enerji xəttlərinə qoşulmalıdır ki, daimi olaraq enerjidən bəhrələnsinlər. Yoxsa beş-on dənə qızdırıcı quraşdırmaqla əhalinin 1 faiz də olsa enerjiyə tələbatını ödəmək mümkün deyil”.
E.Bayramlının fikrincə, Ermənistanın öz şirkətləri vasitəsilə jest etmələri faydasızdır və bu cəhdlərin qarşısı alınmalıdır. E.Bayramlı vurğuladı ki, Qarabağdakı ermənilər Ermənistanın bu absurd addımlarına ümid etməkdənsə, Azərbaycan vətəndaşları olaraq özlərini yaxşı aparsınlar və bu halda bütün kommunikasiya vasitələri ilə təmin oluna bilərlər: “Oradakı ermənilər Ermənistan şirkətlərinə bel bağlamaqdansa, özlərini Azərbaycan vətəndaşları olaraq düz-əməlli aparsınlar və işıqla, qazla, telefonla və digər xidmətlərlə problemsiz təmin olunsunlar”.
İradə SARIYEVA
