Ukraynada Rusiyanı dayandırmaq üçün Qərb ölkələri yeni sanksiyalar paketi üzərində düşünür. Bu fonda Böyük Britaniya və ABŞ Ukraynadakı vəziyyətlə əlaqədar Rusiyaya qarşı yeni sanksiyaların tətbiqinin mümkünlüyünü etiraf edib.
Böyük Britaniyanın xarici ticarət naziri Ann-Mari Trevelyan və ABŞ-ın ticarət danışıqlarındakı nümayəndəsi Ketrin Tainin birgə bəyanatında bu xüsusda deyilir: “Müttəfiqlər və tərəfdaşlarla koordinasiyada Böyük Britaniya və ABŞ artıq Rusiyaya qarşı görünməmiş iqtisadi və maliyyə sanksiyaları tətbiq edib, ölkələr iqtisadi təzyiqi artırmağa hazırdır. London və Vaşinqton digər beynəlxalq tərəfdaşları, o cümlədən “Yeddilik Qrupu” və Ümumdünya Ticarət Təşkilatının digər üzvlərini Ukrayna iqtisadiyyatının bərpasına kömək etməyə çağıracaq”.
Lakin ABŞ-ın “The Wall Street Journal” nəşri iddia edir ki, Qərb sanksiyalar məsələsində əslində göründüyü kimi cəsarətli deyil. Nəşr buna sübut kimi göstərir ki,
ABŞ Rusiya prezidenti Vladimir Putinin xanımı olduğu iddia edilən gimnast Alina Kabayevaya qarşı sanksiyalar tətbiq etməyi düşünsə də, son anda bu ideyadan vaz keçib. Xatırladaq ki, indiyədək Putin və Kabayeva arasında iddia edilən münasibət mövzusu təkcə Rusiya mediasında deyil, əksər Qərb mediasında da tabu olub. Amerika biznes nəşri olan “The Wall Street Journal”ın bu yazını dərc etməsinin səbəbi Kabayevaya Rusiyanın Ukraynaya müdaxiləsi ilə bağlı sanksiya tətbiq oluna biləcəyi, lakin Putini qəzəbləndirməmək üçün onun sanksiya siyahısına daxil edilməməsi ilə bağlı məlumat olub. “Wall Street Journal” adı açıqlanmayan ABŞ rəsmilərinə istinadən yazır ki, ABŞ rəsmiləri 39 yaşlı Kabayevanın Rusiya prezidentindən ən azı üç uşaq dünyaya gətirdiyinə inanır və onu Putinin şəxsi məlumatlarını gizlətməkdə şübhəli bilirlər: “Kabayeva ABŞ sanksiyalarının potensial hədəfi olaraq qalır, lakin bu addımı müzakirə edən rəsmilər arasında belə bir fikir var ki, olimpiya çempionuna qarşı sanksiyaların tətbiqi Putinə şəxsi zərbə kimi qiymətləndiriləcək və bu, Rusiya və ABŞ arasında gərginliyi daha da artıra, Ukrayna ilə sülh danışıqlarına mane ola bilər. ABŞ və Avropa xüsusi xidmət orqanlarının bildirdiyinə görə, Kabayeva İsveçrədə çox vaxt keçirib. Gimnastın hərəkətlərindən xəbəri olan ABŞ rəsmiləri onun Cenevrə yaxınlığındakı hündür divarlı malikanədə yaşadığını iddia edir. Ukrayna hakimiyyəti bu ay İsveçrə hökumətinə məktub göndərərək Kabayevanın ölkəyə girişinə qadağa qoyulmasını və əmlakına həbs qoyulmasını tələb edib. Lakin İsveçrə rəsmiləri onun ölkədə olduğuna dair heç bir sübuta malik olmadığını bildirib.
Kabayevanın adı ilk dəfə Kremlin saytında 2001-ci ildə çəkilib. 2008-ci ildə "Moskovski Korrespondent" qəzeti həmin vaxt rəsmi nikahda olan Putinin Kabayevaya evlilik təklifi etdiyini yazmışdı. Putin bu məlumatı hiddətlə rədd edib və bir neçə gün sonra qəzet bağlanıb. Təxminən bu vaxtlarda Kabayeva idmanı buraxaraq Vahid Rusiya partiyasından deputat seçildi və 2014-cü ildə parlamenti tərk edərək Milli Media Qrupu holdinqinin direktorlar şurasının sədri oldu. 2013-cü ildən Kabayeva və onun qohumları Rusiyada altı mənzil, iki ev və ən prestijli yerlərdə torpaq sahəsi əldə ediblər. İsveçrə, Avropa və Amerika rəsmiləri arasında mənbələrimiz iddia edir ki, 2015-ci ildə Kabayeva Putindən uşaq dünyaya gətirib və doğuş Luqano gölünə baxan elit İsveçrə klinikasında baş verib. Daha sonra media Putinin səkkiz gün ictimaiyyət qarşısına çıxmadığını yazaraq, onun Kabayevanın yanında olduğunu irəli sürdü. Ardınca Kreml bunun doğru olmadığını bəyan etdi. 2019-cu ildə isə Kabayeva Moskvada əkiz uşaq dünyaya gətirib. İndi artıq Kabayevaya qarşı sanksiyalar paketi hazırlayan ABŞ Maliyyə Nazirliyi şərh verməkdən imtina edib. Putinin mətbuat katibi Dmitri Peskov da sorğulara cavab verməyib”. O da xatırladılır ki, Putinin 2013-cü ildə boşandığını elan etdiyi Lyudmila Putina ilə evliliyindən iki qızı var. Rusiya prezidenti özü ailəsi haqqında danışmağı sevmir və onun qızları ilə çəkdirdiyi son foto 2002-ci ildə dərc olunub. Aprelin əvvəllərində isə ABŞ Maliyyə Nazirliyi Katerina Vladimirovna Tixonova və Mariya Vladimirovna Vorontsovaya qarşı sanksiyalar tətbiq edib. Jurnalistlər məhz onları Rusiya prezidentinin rəsmi nikahdan olan qızları adlandırır. 2020-ci ilin payızında "Proyekt" nəşri Putinin sevgilisi olduğu iddia edilən, onun dostlarından yaxşı hədiyyələr alan və "Rossiya Bank"ın səhmdarı olan Svetlana Krivonoqix adlı Sankt-Peterburq sakini haqqında yazıb. Bundan əlavə, nəşrin yazdığı kimi, Svetlananın qızı Elizabet dövlət başçısına inanılmaz dərəcədə bənzəyir. Rusiya prezidentinin mətbuat katibi Dmitri Peskov bu qadın haqda yazılanları şərh edərkən belə bir qadın haqqında ilk dəfə eşitdiyini deyib. Daha sonra Kreml bunun doğru olmadığını bəyan edib.
BBC radiosu isə Putinin qohumları haqqında məlumatın nə üçün vacib olduğunu belə izah edir: “Dünya jurnalistikasında siyasi liderlərin şəxsi həyatını işıqlandırmaq üçün iki əsas diskurs var. Birincisi deyir: bu məlumat o zaman ictimai maraq doğurur ki, baş nazir və ya prezident ailəsinin üzvləri öz vəziyyətindən istifadə edərək varlansınlar.
İkincisini adətən "sarı" adlandırırlar: ölkə rəhbərinin həyatından istənilən xəbər maraqlıdır, hətta onun həyat yoldaşı, yumşaq desək, küçədə sərxoş görünsə də...Putin ailəsi ilə bağlı məlumatları qəti şəkildə gizlədir. Ancaq onun qızlarından biri Katerina Tixonova dövlət və hökumət qurumlarından çoxsaylı subsidiyalar alan "İnnopraktika" elmi fonduna rəhbərlik edir. Mən arzuolunmaz elan edilmiş "Proyekt" nəşrindən olan həmkarlarımla birlikdə aydınlaşdıra bildim ki, onun üçüncü qızının anası Svetlana Krivonoqix ABŞ hakimiyyətinin Prezidentin yaxın ətrafının bankı adlandırdığı "Rossiya Bank"ın səhmdarıdır. Alina Kabayeva ilə də vəziyyət eynidir: o, əsas səhmdarı Rusiya bankı olan Milli Media Qrupunun direktorlar şurasına rəhbərlik edir. Milli Media Qrupu bir neçə məşhur telekanala, o cümlədən Birinci Kanalda paya malikdir. Hərçənd, Ukrayna ilə müharibə başlayandan sonra Kabayevanın orada işləməsi ilə bağlı məlumatlar holdinqin saytından yoxa çıxıb”.
Samirə SƏFƏROVA
