Xəbər verildiyi kimi, Prezident İlham Əliyev Rusiya Federasiyası Baş nazirinin müavini Aleksey Overçuku qəbul edib. Dövlət başçısı ölkələrimiz arasında ticari-iqtisadi sahədə qarşılıqlı fəaliyyətin yaxşı səviyyədə olduğunu qeyd edərək, daha əvvəl əldə edilmiş razılıqların yerinə yetirilməsindən məmnunluğunu bildirib.
Bununla yanaşı, Prezident Aleksey Overçukun ölkəmizə səfəri zamanı Rusiya-Azərbaycan-Ermənistan Baş nazirlərinin müavinlərinin sədrliyi ilə üçtərəfli komissiyanın fəaliyyətinin və ilk növbədə, nəqliyyat-kommunikasiya xətlərinin açılması məsələlərinin müzakirə ediləcəyinə əminliyini ifadə edib. Ölkə başçısı bununla əlaqədar dəmir yolunun Azərbaycan ərazisində artıq 60 kilometrlik hissəsinin tikildiyini və gələn il tikintinin tamamlanacağını bildirərək, avtomobil yolu ilə də bağlı Azərbaycan tərəfindən işlərin qrafikə tam uyğun şəkildə aparıldığını deyib: “Əfsuslar olsun ki, Ermənistan tərəfindən bunlarla bağlı heç bir işə başlanılmayıb, Ermənistan öz ərazisindən keçməsi nəzərdə tutulan avtomobil yolu marşrutunun coğrafi koordinatlarını belə qeyd etməyib. Azərbaycanın bu məsələni dəfələrlə qaldırmasına baxmayaraq, Ermənistan tərəfindən bununla bağlı heç bir cavab gəlməyib”.
Göründüyü kimi, Azərbaycan Prezidenti Ermənistanın üzərinə düşən öhtəlikləri yerinə yetirmədiyini Rusiya tərəfinin diqqətinə çatdırıb.
“Sözdə qarşıya qoyulan şərtlərlə razı olduğunu nümayiş etdirən Ermənistan rəhbərliyi əməldə tamamilə fərqli mövqe göstərir”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, Ermənistanın prosesləri uzatması bu ölkənin əleyhinə işləyəcək: “Prezident İlham Əliyevin Overçukla görüşdə toxunduğu məsələlər mühüm məqamlardır. Bu, ilk növbədə İrəvanın yekun sülhün əldə olunması, habelə dövlət sərhədlərinin dəqiqləşdirilməsi və qarşıda dayanan digər regional proseslər ətrafındakı qeyri-müəyyən cəhdlərinin aşkar sübutudur. Vaxt daralır və İrəvanın son ana qədər öz mümkünsüz maraqlarını mümkünə çevirmək cəhdləri yalnız onun özünə və bütövlükdə erməni xalqına ciddi zərərlər vurur. Brüssel görüşündə İrəvana sülh müqaviləsinin imzalanması və yerdə qalan məsələlərin həyata keçirilməsi üçün aprelin sonlarına qədər vaxt verildi. Sözdə qarşıya qoyulan şərtlərlə razı olduğunu nümayiş etdirən Ermənistan rəhbərliyi əməldə tamamilə fərqli mövqe göstərir. Bu isə prosesin gedişinə əngəllər yaradır və Bakının da səbri tükənir. Belə olan halda Azərbaycan heç nə itirmir. Biz yalnız kommunikasiyaların açılmasını deyil, həm də dövlətlərin bir-birinin ərazi bütövlüyünü tanıması faktorunu da diqqətdə saxlamalıyıq. Prezident İlham Əliyev Dünya Azərbaycanlılarının V Qurultayında da vurğuladı ki, bu gün Ermənistan adlandırılan respublikanın paytaxtı da daxil olmaqla Zəngəzur, İrəvan, Göyçə və s. ərazilər Azərbaycanın tarixi, əzəli torpaqlarıdır. Erməni hakimiyyəti bu kimi prosesləri uzatmağa davam edəcəksə, Azərbaycan öz hüququndan istifadə etməklə Ermənistanın ərazi bütövlüyünü tanımaya bilər. Hesab edirəm ki, erməni tərəfi bu bəyanatı qulaqlarından sırqa edib-asmalı, nəticələr hasil etməlidir. Həmçinin İrəvan artıq anlamalı, dərk etməlidir ki, İlham Əliyev sözünü deyirsə onu dərhal həyata keçirir”.
Politoloq hesab edir ki, artıq İrəvanı dərindən silkələməyin zamanıdır: “Nəqliyyat infrastrukturunun açılması yaxın gələcəkdə logistik imkanların da mahiyyətini ortaya qoyur və buradan yalnız Azərbaycan deyil, regionun digər aparıcı ölkələri - Rusiya, İran, Türkiyə də yararlana biləcəklər. Habelə Avropa ilə nəqliyyat-rabitə potensialları reallaşdırılacaq. Bütün bunların qarşısını alan məhz Ermənistanın ləngliyi, prosesi uzatması amillərdir və artıq İrəvanı dərindən silkələməyin zamanıdır. Bakının səbri, demək olar ki, tükənib və Ermənistan açıq şəkildə öz mövqeyini ortaya qoymağa məhkumdur. Bunu da edə bilmirsə, təbii ki, Bakı daha sərt, daha qətiyyətli mövqe ilə çıxış edəcək. Ən əsası, heç bir beynəlxalq strukturlar buna müdaxilə edə bilməyəcəklər. Ortada üçtərəfli bəyanatlar mövcuddur və bu bəyanatlar birbaşa hüquqi sənədlərdirlər. Ermənistanın rəhbərliyi nəhayət ki, prosesə əngəllər yaratmasının onun özünə də nə qədər zərbə vurduğunu anlayacaq. Bu gün İrəvanda hansı proseslərin getməsindən asılı olmayaraq, yəni revanşistlərin çağırışlarına əhəmiyyət verilmədən qarşıya qoyulan məqsədlər icra olunmalıdır. Artıq İrəvanın başqa heç bir çıxış yolu da qalmayıb”.
Bir sözlə, politoloq hesab edir ki, Ermənistan vaxtı düzgün dəyərləndirməlidir.
Vidadi ORDAHALLI
