İndi də ABŞ-ın Ermənistandakı səfiri Lin Treysi Lavrovun ATƏT-in Minsk Qrupu barədə dediklərindən narahat olmağa başlayıb. Hər vasitə ilə Minsk Qrupunun yenidən fəallaşmasına çalışır.
Treysi erməni mediasına açıqlamasında Lavrovun Minsk Qrupunun fəaliyyəti ilə bağlı bəyanatını təkzib edib: “Bu bəyanat Rusiya hökuməti tərəfindən verilib, bu, razılaşdırılmış, birgə bəyanat deyil və ABŞ-ın bu məsələyə yanaşmasını əks etdirmir. Aydındır ki, Rusiyanın təxribatı olmadan Ukraynaya edilən bu hücum Minsk Qrupunun fəaliyyətini çətinləşdirdi. Amma biz hesab edirik ki, Minsk Qrupunun həmsədrliyi formatında Dağlıq Qarabağ münaqişəsinin sülh yolu ilə həlli üçün imkanlar var”.
Səfir bir az da irəli gedərək qeyd edib ki, biz həm ikitərəfli formatda, həm də Minsk Qrupunun həmsədri kimi problemin sülh yolu ilə həllinin mümkün yollarını nəzərdən keçirməyə davam edəcəyik: “Birləşmiş Ştatlar Ermənistanın dostu və tərəfdaşı kimi, ATƏT-in Minsk Qrupunun həmsədri kimi Dağlıq Qarabağ münaqişəsinin sülh yolu ilə həllinin axtarışlarına yardım etmək öhdəliyinə sadiqdir. Son aylar ərzində katib Blinken dövlət başçıları ilə çoxsaylı telefon danışıqları apararaq vəziyyəti gərginləşdirməməyə, eləcə də sülh prosesinin qurulması üçün bir-biri ilə əlaqə saxlamağa çağırıb. Biz tərəfləri prosesə kömək etməyən təhdid və düşmənçilik ritorikasından çəkinməyə çağırırıq. Şübhəsiz ki, danışıqlar çətin keçəcək. Bu, uzun illər ərzində formalaşmış mürəkkəb münaqişədir”.
Görünən odur ki, ABŞ-ın Ermənistandakı səfiri həm MQ-nin bərpasına çalışır, həm də artıq mövcud olmayan “Qarabağ münaqişəsi” barədə danışır.
“Birləşmiş Ştatların Ermənistandakı səfiri Qarabağla bağlı əvvəlki status-kvonun bərpa olunmasını arzulayır”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, ABŞ-ın Ermənistandakı səfirinin ortaya atdığı fikirlər onun subyektiv yanaşmasıdır: “Treysinin arzusuna, ermənilərə xoş gəlmək kimi istəklərinə uyğun olaraq bu məsələlər həll edilmir. Səfir söz deyə bilər. Bu, heç də o demək deyil ki, Minsk Qrupu fəaliyyətini bərpa edəcək. Bu kimi məsələlər kiminsə istəyinə uyğun tənzimlənmir. O baxımdan Minsk Qrupunun fatihəsi çoxdan verilib. Çünki sözügedən qurum qarşısına qoyduğu hədəflərə çata bilmədi və fiskoya uğradı. Hələ müharibə başlamazdan əvvəl Minsk Qrupu iflic vəziyyətində idi. 2019-cu ilin avqustunda Paşinyanın qanunsuz olaraq Xankəndiyə səfəri və orada səsləndirdiyi məlum fikirlər (Qarabağ Ermənistandır) artıq danışıqların sonu idi. Ondan sonrakı dövrdə faktiki olaraq heç bir danışıq getmədi və MQ-nin görə bilmədiyi işi Azərbaycan Ordusu gördü. Söhbət 27 sentyabr 2020-ci ildə başlayan və qələbə ilə nəticələnən Vətən müharibəsindən gedir. Ondan sonra ardıq “Dağlıq Qarabağ münaqişəsi” deyilən bir məsələ qalmadı. Çox təəssüflər olsun ki, səfir artıq mövcud olmayan “münaqişədən” və onun tənzimlənməsindən danışır. Özü də fiaskoya uğramış MQ çərçivəsində. Birləşmiş Ştatların Ermənistandakı səfiri Qarabağla bağlı əvvəlki status-kvonun bərpa olunmasını arzulayır. Bu isə əsla mümkün olan iş deyil. Hələ ki, MQ-nin Qarabağ tənzimlənməsində vasitəçi olmasından söhbət belə gedə bilməz. Olsa-olsa, ən yaxşı halda, Azərbaycan və Ermənistan arasında hansısa humanitar xarakterli məsələlərdə MQ iştirak edə bilər. Təbii ki, buna ehtiyac olarsa”.
Bir sözlə, Vüqar Rəhimzadə hesab edir ki, lazımsız bir qurumun gündəmdə saxlanmasının heç bir əhəmiyyəti yoxdur.
Vidadi ORDAHALLI
