Ukraynadan sonra Rusiyanın hədəfində hansı ölkə ola biləcəyi ilə bağlı indidən qızğın müzakirələr getməkdədir. Yayılan məlumatlar, səslənən fikirlər bu fonda diqqəti getdikcə daha çox Moldovanın üzərində cəmləşdirir.
Elə bu günlərdə Rusiyanın yüksək rütbəli komandanlarından biri olan general-mayor Rüstəm Minnekayev bildirib ki, Rusiya Ukraynanın cənubunu və şərqdəki Donbas bölgəsini tam nəzarətə götürmək niyyətindədir. Onun sözlərinə görə, bu, Krıma quru ilə keçid yaratmağa imkan verəcək. General Minnekayev həmçinin əlavə edib ki, bu yolla Moskva Rusiyanın dəstəklədiyi Moldovadakı separatçı Dnestryanı bölgəyə çıxış əldə edə bilər. General Minnekayevin şərhlərinin Kremllə razılaşdırıldığı məlum deyil. Lakin onun dediklərinə Rusiyanın dövlət mediasında, o cümlədən “İnterfaks” və TASS agentliklərinin xəbərlərində geniş istinadlar verilir. Rusiya müdafiə rəsmiləri isə məsələ ilə bağlı BBC-yə bildiriblər ki, generalın şərhlərini təhlil edirlər. Generalın dedikləri təsdiqlənərsə, Rusiyanın qarşıdan gələn həftələr üçün potensial planları haqqında ilk təsəvvür yarana bilər. Bu arada Avropa İttifaqının yüksək rütbəli rəsmisi “Reuters” agentliyinə deyib ki, yaxın günlərdə Ukraynanın şərqində və cənub sahillərində Rusiyanın hücumları arta bilər və qarşıdakı iki həftə həlledici olacaq. Amma indi əsas diqqət Moldova üzərində cəmlənir. Artıq Rüstəm Minnekayevin dedikləri ilə bağlı Rusiyanın səfiri Moldovanın Xarici İşlər Nazirliyinə çağırılıb. Xatırladaq ki, Dnestryanı Ukraynanın qərb hissəsi ilə həmsərhəd olan kiçik bir bölgədir. Kiçik rusdilli separatçı Dnestryanı bölgəsi Sovet İttifaqının süqutundan sonra müstəqilliyini elan edib, lakin beynəlxalq səviyyədə tanınmayıb və rəsmi olaraq Moldovanın tərkibi sayılır. 1995-ci ildən bəri atəşkəs razılaşması çərçivəsində bölgədə təxminən 1500 rus əsgərindən ibarət kontingent yerləşdirilib. Hesab edilir ki, Rusiya Ukraynada istədiyinə çatsa, Moldova üzərində təhlükə artacaq. Rusiya Mərkəzi Hərbi Dairəsi komandanının müavini olan general Minnekayev, yuxarıda qeyd edildiyi kimi, bunun açıq siqnallarını verib. O, Sverdlovsk vilayətində keçirilən hərbi tədbirdə çıxışı zamanı sözügedən xüsusda qeyd edib: "Ukraynanın cənubuna nəzarət Dnestryanıya başqa çıxış yoludur, burada da rusdilli əhalinin sıxışdırıldığına dair sübutlar var". Xatırladaq ki, Vladimir Putin Ukraynaya qarşı hərbi müdaxilə başlamazdan əvvəl heç bir sübut təqdim etmədən Ukraynadakı rusdillilərin ayrıseçkiliyə məruz qalması barədə bənzər iddialar səsləndirib.
İndi isə Ukrayna Müdafiə Nazirliyi general Minnekayevin sözlərini Rusiya imperializminin nümunəsi adlandırıb. Bu fonda prezident Volodimir Zelenski əhaliyə müraciətində qeyd edib ki, Rusiya həqiqətən də digər ölkələrə hücum etməyi düşünür. İndilikdə isə, onun sözlərinə görə, Kreml Ukraynanın şərqini ələ keçirməyi düşünür: "Rusiyanın Ukraynaya müdaxiləsi yalnız başlanğıc kimi nəzərdə tutulur, sonra onlar başqa ölkələri ələ keçirmək istəyirlər. Rusiya separatçı dövlətlər yaratmaq üçün işğal olunmuş bölgələrdə qurama müstəqillik referendumların təşkilini planlaşdırır. Əgər sizdən müəyyən anketləri doldurmağı, pasport məlumatlarınızı müəyyən yerə ötürməyi xahiş etsələr, bu sizə kömək etmək üçün edilmir. Bu, Moskvadan belə bir tamaşanın təşkili ilə bağlı göstəriş gələrsə, sizin ərazinizlə bağlı qondarma referendumu keçirmək məqsədini daşıyır. Bu reallıqdır. Ehtiyatlı olun". Ukrayna Müdafiə Nazirliyinin sözçüsü bildirib ki, yaxın həftələrdə Xerson və Zaporojye ətrafındakı işğal olunmuş ərazilərdə referendumların keçirilməsi planlaşdırılır. Ukrayna müdafiə nazirinin müavini Anna Malyar bu xüsusda bildirir: “Rusiya Ukraynanın bütün ərazisini tam ələ keçirmək niyyətindən əl çəkməyib. Rusiyanın əsas məqsədi Ukraynanı bütövlükdə ələ keçirmək idi. Kreml bunu tez həyata keçirmək istəyirdi. Lakin Moskva qısamüddətli qələbəyə nail ola bilmədi. Buna baxmayaraq, niyyətindən əl çəkməyib". Malyar vurğulayıb ki, Rusiyanın planları dəyişib: “Onların kəşfiyyatı güclənib. İndi Rusiyanın qısamüddətli hədəfi Donetsk və Luqansk vilayətlərinin coğrafi sərhədləri ilə bağlıdır. Mariupol uğrunda ağır döyüşlər gedir... Bu gün Ukraynanın bütün şərqi təhlükədədir. Çünki növbəti məqsəd budur. İndi Rusiyanın hərbi qüvvələri şərqdə cəmləşib. Təbii ki, yeni hücum əməliyyatlarına hazırlıq gedir.Rusiyanın Ukraynanı qonşu dövlətə təcavüzdə ittiham etməsi üçün Moldovanın Dnestryanı regionunda təxribat törətməsi mümkündür”. Böyük Britaniya Müdafiə Nazirliyinin kəşfiyyat xidməti də bildirir ki, Rusiya Silahlı Qüvvələri qoşunlarının sayını 2012-ci ildən hərbi xidmətdən tərxis edilmiş personalı hesabına artırmağa çalışır. Qeyd edilir ki, Rusiya döyüş gücünü artırmaq səyləri çərçivəsində Moldovanın tanınmamış Dnestryanı regionundan da döyüşçülərin toplanmasına çalışır. Sonradan isə həmin döyüşçülər məhz Moldovada mərkəzi hakimiyyətə qarşı istifadə edilə bilər.
Nahid SALAYEV
