Hər ilin 24 aprelində olduğu kimi, bu dəfə də Ermənistan və erməni lobbisi qondarma “erməni soyqırımı” ətrafinda şou qurdu. Bu çərçivədə Ermənistanda və digər ölkələrdə antitürk aksiyalar təşkil etdilər.
Bu dəfə Ermənistan-Türkiyə münasibətlərinin normallaşması istiqamətində səyləri belə nəzərə almadan ənənəvi erməni xislətinə xas olaraq düşmənçiliyi körükləmək yolunu tutdular. Bu arada Ermənistanın baş naziri Nikol Paşinyan qondarma “erməni soyqırımı”nın beynəlxalq müstəvidə tanınmasını təşviq etmək üçün özündən təzə “ideologiya” uydurub. Nikol iddia edir ki, guya saxta “soyqırım”ın beynəlxalq aləmdə tanınması Cənubi Qafqaz bölgəsində gərginliyi heç də artırmayacaq. Əksinə, gərginliyi zəiflədəcək və eyni zamanda bu, Ermənistanın təhlükəsizlik təminatlarını gücləndirəcək. Məlum məsələdir ki, bu, Paşinyanın sözügedən məsələdə növbəti sərsəmləməsidir. Ancaq belə yanaşmanın atxasında Ermənistanın növbəti bicliyi gizlənir. Məsələ ondadır ki, dünyada qondarma “erməni soyqırımı”nın tanınması məsələsində bir durğunluq yaranıb, əvvəlki maraq yoxdur. Necə deyərlər, proses dayanıb. Bir sıra dövlətlər bunu tanımaqdan imtina edir. O baxımdan bu, əslində o demək deyilmi ki, Paşinyan dünya liderlərini aldatmağa çalışır? Qondarma “erməni soyqırımı”nın tanınması bölgədə vəziyyəti gərginləşdirəcək, yoxsa əksinə, gərginliyi azaldacaq? Əslində vəziyyət necədir?
“Get-gedə dünya dövlətləri ermənilərin saxta “genosid” təbliğatının fərqinə varır”
Məsələyə münasibət bildirən AMİP funksioneri Əli Orucovun fikrincə, belə yanaşma əsla bölgədə gərginliyi azaltmayacaq: “Qondarma “soyqırım”ın tanınması regionda konfrantasiyanı körükləyəcək. Daim gərginliyin qalmasına və bundan müəyyən xarici dairələrin öz geosiyasi məqsədləri üçün istifadə etməsinə şərait yaradacaq. Ən azından ona görə ki, ermənilərin sözügedən məsələ ilə bağlı iddiaları saxtadır. Yəni iddia etdikləri kimi Türkiyədə ermənilər soyqırıma məruz qalmayıb. Əvvəllər ermənilər uydururdular ki, guya 350 min erməni öldürülüb. Sonra dedilər öldürülən ermənilərin sayı 650 min nəfər olub. Daha sonra bu rəqəm 1,5 milyon nəfər oldu. Əslində isə, o dönəmdə ümumiyyətlə Osmanlı Türkiyəsində bu qədər erməni yaşamayıb. Uzun illər ermənilər saxta “soyqırım” iddialarından qalxan kimi istifadə ediblər. Bundan müxtəlif məqsədlərdən ötrü yararlanıblar. Qondarma “soyqırım” təbliğatı altında Qarabağın işğalının uzadılmasına, onlara yönəlik təzyiqlərin neytrallaşdırılmasına çalışıblar. Ən başlıcası, bu minvalla xeyli yardım diləniblər. Etiraf etməliyik ki, bir sıra hallarda buna nail də olublar. Artıq elə bir dövr gəlib ki, erməni saxtakarlığı əvvəlki effektini vermir. Ən başlıcası ona görə ki, Qarabağın işğalına son qoyuldu və dünya birliyi beynəlxalq hüququ dəstəklədi. Beynəlxalq hüquq da Azərbaycanın ərazi bütövlüyündən yanadır. Digər tərəfdən, 2021-ci ilin aprelində ABŞ prezidenti Cozef Baydenin “soyqırım” ifadəsini işlətməsi nəyisə dəyişmədi. Hansı ki, neçə vaxt idi erməni lobbisi bundan ötrü dərindən-qabığdan çıxırdı. Ən nəhayət, get-gedə dünya dövlətləri ermənilərin saxta “soyqırım” təbliğatının fərqinə varır. O üzdən, bu məsələdə nəzərəçarpacaq durğunluq müşahidə edilir. Əvvəlki kimi ermənilər dünya ictimayətini aldadıb nələrisə qopara bilmirlər”.
Partiya funksioneri onu da əlavə etdi ki, aparıcı dövlətlərin timsalında erməniləri maşa kimi istifadə etməyə də maraq azalıb.
Vidadi ORDAHALLI
