“Çalışacağıq ki, bizim informasiya agentliyimiz Azərbaycanın dünyada səsi ola bilsin”
Azərbaycan mediasında kifayət qədər tanınmış imza sahibi, "Şərq qapısı" qəzetinin keçmiş baş redaktoru Tural Səfərov TNS adlı İnformasiya Agentliyi yaradıb. Tural Səfərovla görüşüb onlayn mediamızda yeni-yeni addımlayan TNS İnformasiya Agentliyinin qarşıya qoyduğu hədəfləri barədə danışdıq.
- Tural bəy, xoş gördük. Aktiv jurnalistikaya qayıtmısız. Əslində, jurnalistikadan heç getməmişdiniz də, media ilə mütəmadi əlaqəniz vardı. Amma daşıdığınız vəzifə bəlkə də Sizin tam olaraq jurnalistikanın içində olmağınıza imkan vermirdi. Bu gün Sizinlə yeni yaratdığınız TNS İnformasiya Agentliyinin rəhbəri kimi görüşürük. Siz uzun müddət qəzetçilik sahəsində çalışmısınız, "Şərq qapısı" qəzetinin baş redaktoru olmusunuz, televiziya sahəsində çalışmısız.
Sizə sayt yaratmaq, onlayn mediaya keçmək çətin olmadı ki? Bu baxımdan ki, bu sahədə həddən artıq sıxlıq var, çətinliklər az deyil, bütün bunlar Sizə hansısa bir əngəl yaratmadı ki?
- Ali məktəbdə təhsil aldığım dövrdən peşəkar jurnalistika ilə məşğul olmağa başlamışam. Sizin də qeyd etdiyiniz kimi, həm televiziya, həm də qəzetçilik sahəsində təcrübəm var. Uzun müddət Naxçıvan Muxtar Respublikası Dövlət Televiziya və Radio Verilişləri Komitəsində çalışmışam. Komitənin Proqram-Buraxılış və Əlaqələndirmə Direksiyasının rəhbəri vəzifəsinə qədər yüksəlmişəm. Sonra Naxçıvan Muxtar Respublikası Ali Məclisinin Mətbuat və ictimaiyyətlə əlaqələr şöbəsində işləmişəm və 6 ilə yaxın müddət ərzində də Naxçıvan Muxtar Respublikası Ali Məclisinin və Nazirlər Kabinetinin rəsmi orqanı olan "Şərq qapısı" qəzetinə rəhbərlik etmişəm. Son iş yerim isə “Azərxalça” Açıq Səhmdar Cəmiyyəti olub. Cəmiyyətin mətbuat xidmətinin rəhbəri və sədrin müşaviri vəzifələrində çalışmışam.
Siz qəzetçilik fəaliyyətimi xatırlatdınız. Bildirmək istəyirəm ki, mənim onlayn media sahəsində də təcrübəm var. 2017-ci ildən 2022-ci ilə qədər müxtəlif fasilələrlə “Moderator.az” İnformasiya Agentliyinin baş redaktoru və baş redaktorun birinci müavini kimi çalışmışam. Yəni demək istəyirəm ki, onlayn media mənim üçün yad sahə deyil.
- Maraqlıdır, həyatınızın xeyli hissəsi məmurluq fəaliyyəti ilə bağlı olsa da, amma siz heç zaman jurnalistikadan qopmadınız.
- Bəli, həyatımın böyük bir dövrünü daha çox məmur kimi fəaliyyət göstərmişəm. Amma mənin həyatım həmişə jurnalistika, media ilə bağlı olub. Müstəqil media orqanı yaradıb ona rəhbərlik etmək arzularımdan biri idi.
-Niyə məhz qəzet yox, informasiya agentliyi, onlayn media?
- Düşünürəm ki, indi qəzet çıxarmaq o qədər də effektli deyil.
-Amma qəzet tarixdi, yazılanlar qalır...
-Razıyam. Qəzet tarixdir, qəzet həmişə aktualdır. Mən keçmişdə qəzet rəhbəri olduğum üçün açıq şəkildə deyə bilirəm ki, qəzet işi çətindir. Yəni indiki dövrdə, media orqanlarının bol olduğu bir vaxtda qəzet çıxarmaq və onun yayımını təşkil etmək çox çətin prosesdir. Ona görə də qəzetçilikdən daha çox onlayn mediaya üstünlük verməyi məqsədəuyğun hesab etdik.
- TNS İnformasiya Agentliyini nə vaxtdan yaratmısınız?
- Bu ilin əvvəlində yaratmışıq.
- Tanışam, maraqlı informasiyalar, araşdırma yazıları təqdim edirsiniz.
- Yeni fəaliyyətə başlamasına baxmayaraq, bizim informasiya agentliyimiz artıq informasiya mənbəyinə çevrilib. Ciddi oxunur, cəmiyyət arasında tanınır. Əlbəttə, etibar qazanmağa çalışırıq. İnformasiya agentliyini yaradanda qarşımıza konkret məqsədlər, hədəflər qoymuşuq.
- Məqsədiniz nə olub?
- Bizim informasiya agentliyimiz heç bir halda şou-biznes xəbərlərinə, bayağı, zorakılığı təbliğ edən mövzulara üstünlük verməyəcək.
- Bu gün saytlar bazara girmək və İP toplamaq üçün daha çox şou-biznes xəbərlərinə üstünlük verir, düşünürlər ki, oxucunu bu maqazin xəbərləri ilə daha çox cəlb etmək olar. Doğrudan da, maqazin xəbərlərinə tələbat var...
- Sizin fikrinizlə tamamilə razıyam. Bu gün çox təəssüflər olsun ki, bizim cəmiyyətimizin böyük bir hissəsi şou xəbərləri oxumağa daha çox üstünlük verir. Bunun bizim üçün oxucuların kütləviliyi baxımından nə qədər çətinliklər yaradacağını bilirəm. Bu kifayət qədər çətin prosesdir. Burda oxucu toplamaq, tanınmaq, bu formatda fəaliyyət göstərmək çox çətindir. Düşünürəm ki, əksər media orqanlarında təqdim olunan şou xəbərlər, eyni zamanda zorakılığı, qəddarlığı təbliğ edən informasiyalar Azərbaycan cəmiyyətini uçuruma aparır, bizim gələcəyimiz üçün çox böyük təhdiddir. Bizim informasiya agentliyi bu tipli yazıları təqdim etməməklə nəyisə dəyişməyəcək. Kifayət qədər tanınmış media orqanları belə informasiyalardan geninə-boluna istifadə edirlər. Amma bunun bir mənəvi tərəfi də var. Mənəvi cəhətdən özümüzü rahat hiss edəcəyik ki, ən azından biz bu dəyirmana su tökmürük, bu işə qoşulmuruq.
Hədəfimiz agentliyi daha ciddi media orqanı kimi təsdiq etməkdir. Ciddi xəbərlərə, analitik materiallara, müsahibələrə üstünlük veririk. Dediyim kimi, oxucu cəlb etmək baxımından bu bizim üçün o qədər də asan olmayacaq. Cəmiyyət bunu qəbul etmir, bu reallıqdır. Açıq danışaq, şou xəbərlərə daha çox baxış sayı var, nəinki ölkənin gələcəyi, taleyi ilə bağlı təqdim etdiyimiz hansısa ciddi analitik araşdırmaya.
- Tural bəy, hər bir media orqanının ortaya çıxmasında, özünü peşəkar olaraq təsdiqlənməsində kollektivin də çox böyük rolu var. İstərdim kollektiviniz haqda da danışasınız.
- Biz hələ yeni fəaliyyətə başlamışıq, say barədə hər hansı bir açıqlama vermək istəmirəm. Onu deyə bilərəm ki, kollektivimiz artıq formalaşır. Peşəkar müxbirlərimiz də, redaktorlarımız da, texniki heyətimiz də var. Gələcəkdə bu işlərimizi daha da genişləndirmək niyyətindəyik. Dediyim kimi, hədəflərimizə çatmaq üçün çox çətinliklərdən keçməli olacağıq, amma qarşımıza qoyduğumuz hədəfə nail olacağımıza şübhəm yoxdur, buna inanıram. Qarşımıza məqsəd qoymuşuq ki, TNS İnformasiya Agentliyini Azərbaycanın sayılıb-seçilən informasiya orqanlarından birinə çevirək. Çalışacağıq ki, bizim informasiya agentliyimiz Azərbaycanın dünyada səsi ola bilsin.
- Neçə dildə informasiya yayımlayırsınız?
- Hələlik Azərbaycan dilində materiallar yayımlanır. Sizin verdiyiniz fürsətdən istifadə edib oxucularımıza demək istəyirəm ki, yaxın zamanlarda biz rus dilində də yayıma başlayacağıq. İlin sonuna qədər isə ingilis dilində də yayım həyata keçirməyi hədəfləmişik.
-Belə başa düşdüm ki, əsas hədəfiniz beynəlxalq axına qoşulmaqdır.
- Bəli, məqsədimiz Azərbaycanı beynəlxalq səviyyədə doğru-düzgün təbliğ etməkdir.
- İnformasiya agentliyinin adını niyə TNS qoymusunuz? Bunun xüsusi mənası var, yoxsa yox?
- Tru Nyus Servis-Doğru Xəbər Xidməti.
- Adı ingiliscədi?
- Bəli. Bizim hədəfimiz Azərbaycanın beynəlxalq aləmdə təbliğinə yönəldiyi üçün bu cür ad seçdik. Amma onun başqa açıqlamaları da var. Hazırda o barədə danışmaq istəmirəm. İnformasiya agentliyimiz tam özünü doğruldandan, hədəflərimizə çatandan sonra biz TNS sözünün digər alt mənalarını da oxucularımıza çatdıracağıq.
- Sizin televiziya sahəsindəki təcrübənizi nəzərə alaraq soruşmaq istəyirəm ki, nə üçün internet televiziyası açmağa meyl etmədiniz? TNS sözü daha çox televiziya adına uyğun gəlir.
- Gələcək hədəflərimiz sırasında, əlbəttə ki, internet televiziyası yaratmaq da var. Amma ilkin olaraq biz informasiya agentliyi kimi fəaliyyətə başlamağı məqsədəuyğun hesab etdik. Əgər bu layihəmiz özünü doğrultsa, biz cəmiyyətdə etibar olunan informasiya orqanına çevrilə bilsək, o zaman internet televiziyası məsələsinə də baxılacaq.
- Bir də qayıdaq o məsələyə ki, cəmiyyətin hansı hissəsinin informasiya tələbatını ödəməyi hədəfləmisiniz.
- Bunu yenə də qeyd etmək istəyirəm, biz İP dalınca qaçmayacağıq. Məqsədimiz çox oxucu toplamaq deyil, sanballı oxucuya sahib olmaqdır. Yəni bizi 100 min oxucu deyil, 20 min oxusun, amma biz bilək ki, hədəfə istiqamətlənmişik, hədəfə xitab edə bilmişik. Sözün əsl mənasında bizi bu ölkənin, cəmiyyətin gələcəyini düşünən adamlar oxuyurlar. Bunun daha çox effekti ola biləcəyi qənaətindəyik.
- TNS barədə ilkin rəylər necədir?
- Qısa zaman ərzində fəaliyyət göstərməyimizə baxmayaraq, informasiya orqanımız artıq tanınır, istinad mənbəyinə çevirilib, ölkənin tanınmış simaları, millət vəkilləri, partiya sədrləri bizimlə əməkdaşlıq etməyə başlayıblar. Adətən, yeni yaranmış informasiya orqanlarına nüfuzlu adamlar müsahibə, açıqlama verməkdə o qədər də maraqlı deyillər. Hətta adını çəkmək istəmirəm, bir millət vəkilimiz mənə şəxsən söhbətimiz zamanı dedi ki, mən yenicə fəaliyyətə başlayan, çoxlarının tanımadığı TNS İnformasiya Agentliyinə deyil, Tural Səfərova müsahibə verirəm. Yəni bizim bu saytı yaradıb başında dayanmağımız dostlarımızın da bizimlə əməkdaşlıq etməsinə stimul verir. Ona görə də, düşünürəm ki, yaxın gələcəkdə biz daha geniş, maraqlı layihələrlə çıxış edə biləcəyik. Bizim yeni layihələrimiz var. Düzdür, bunlar ciddi layihələrdir. Bəlkə də bir o qədər oxucu cəlb etməyən layihələrdir. Hədəfimiz cəmiyyətimizi maarifləndirməkdir. Əsas işimiz maarifçilikdir, bu ölkənin gələcəyi naminə xidmətdir. Biz bu informasiya agentliyi vasitəsilə milli dəyərlərimizin qorunmasına çalışırıq, istəyirik ki, Azərbaycanın milli dəyərlərini, tarixini, mədəniyyətini, folklorunu təbliğ edək, unudulmuş dəyərlərimizin təbliğatçısına çevirilək.
- Yəni keçmişlə gələcəyin arasında bir körpü rolunu oynamaq istəyirsiniz...
- Bəli.
- Sizin hədəflərinizdən biri milli kökə, gələnəklərə, tariximizə, milli məfkurəmizə bağlı insanlara xitab etmək, başqa bir istiqamətdə isə beynəlxalq aləmdə Azərbaycanın səsinə çevrilməkdir. 44 günlük müharibədə Azərbaycan mediasının, informasiya agentliklərinin, saytların beynəlxalq aləmdə ermənilərə qarşı apardığı informasiya savaşının səviyyəsi sizi qane etdimi? Bu sualı niyə verdim. Çünki əksər mütəxəssislərə görə, Vətən müharibəsində beynəlxalq informasiya savaşında Prezident İlham Əliyev təkbaşına mübarizə apardı. Bu fikrə münasibətiniz necədi?
- Düşünürəm ki, 44 günlük müharibədə bizim informasiya orqanlarımız Azərbaycan həqiqətlərini olduğu kimi dünya ictimaiyyətinə çatdıra bilmədi. Bu mənim şəxsi qənaətimdir.
- Buna nə mane olurdu?
- Təəssüf ki, bizim hələ də xarici dillərdə yayımlanan informasiya orqanlarımız çox azdır. Bizim bir neçə ciddi informasiya orqanımızı çıxmaq şərtilə ölkəmizdə üzdə olduğu deyilən informasiya agentliklərinin, xəbər saytlarının heç birinin beynəlxalq aləmdə fəaliyyət göstərən informasiya qurumları ilə əməkdaşlığı yoxdur. Bu da, əlbəttə ki, proseslərə mənfi təsirini göstərir. Beynəlxalq media platformaları ilə əməkdaşlıq əlaqələrinin qurulması üçün isə gərək müxtəlif xarici dillərdə yayımlamaq imkanımız ola.
Düşünürəm ki, dövlətimiz informasiya agentliklərinə beynəxalq aləmə çıxış üçün, müxtəlif dillərdə xəbər yayımaq məqsədilə dəstək olmalıdır. Bu dəstək olmasa, müxtəlif xarici dillərdə yayımlamaq mümkün deyil. Buradan bir çağırış etmək istəyirəm ki, mütləq bizim ciddi informasiya orqanlarımız dəstəklənməlidir.
Əgər cənab Prezidentin beynəlxaq media orqanlarına, dünyanın nüfuzlu televiziyalarına, qəzetlərinə, informasiya agentliklərinə müsahibələri olmasaydı, biz informasiya müharibəsində və mübarizəsində erməni təbliğatına uduzacaqdıq. Bizim 44 günlük Vətən müharibəsində Qələbəmizi təmin edən hərbi uğurlarımızla yanaşı, informasiya savaşındakı nailiyyətlərimiz idi. Bunun tək müəllifi Azərbaycan Respublikasın Prezidenti cənab İlham Əliyevdir.
İradə SARIYEVA
