Beynəlxalq aləmdə Azərbaycana qarşı davam edən ayrıseçkilik bizim həqiqətimizin dünyaya yayılmasına ciddi əngəllər törədib. Beynəlxalq təşkilatlar, lap elə beynəlxalq statuslu məhkəmələr Azərbaycanın şikayətləri ilə bağlı ədalətli qərarlar verməyə qətiyyən tələsmirlər.
Ermənistanın Azərbaycana təcavüzünə, bu ölkənin keçmiş və indiki rəhbərliyinin insanlıq əleyhinə müharibə cinayətləri törətməsinə baxmayaraq, hələ də müharibə canilərini cəzalandırmayıb. Amma həmin beynəlxalq təşkilatlar, beynəlxalq məhkəmə Ukrayna-Rusiya müharibəsinə dərhal reaksiya verdilər. Artıq BMT-nin Beynəlxalq Məhkəməsi - Haaqa Məhkəməsi Rusiya ilə bağlı tədqiqat aparır, eyni zamanda Rusiya qarşısına konkret tələblər qoyur və sair. Hətta Putinin özünə qarşı da bu məhkəmədə hökm veriləcəyi deyilir. Artıq bu barədə fikirlər də söylənilir. ABŞ prezidenti Co Baydenin və İngiltərənin baş naziri Boris Consonun səsləndirdiyi fikirlər bunu düşünməyə imkan verir.
Bəs Azərbaycana qarşı müharibə cinayətləri törətmiş Köçəryan, Sarkisyan və başqaları nə üçün Haaqa Tribunalında məhşər ayağına çəkilmir? Biz Sarkisyana, Köçəryana və başqa müharibə canilərinə Haaqa tribunalı tərəfindən hərbi cani kimi yanaşılmasını nə zaman görəcəyik? Gerçək canilər göz qabağındadır, onların cəzalandırılması vacibdən vacibdir. Biz onda görərik ki, Haaqa məhkəməsi ədalət naminə fəaliyyət göstərir.
“Haaqa məhkəməsi, nəhayət ki, Azərbaycan xalqına qarşı müharibə cinayətləri törədənləri məşhər ayağına çəkməlidir”
Qarabağ Azadlıq Təşkilatının (QAT) sədri Akif Nağının “Bakı-Xəbər”ə şərhində bildirdiyinə görə, bu yanaşma bir daha göstərir ki, dünyada haqq-ədalət yoxdur. “Bu qərarlar siyasi motivlərlə qəbul olunur. Rusiyaya qarşı Qərbin xüsusi planları var. Bu planları həyata keçirməyə çalışırlar. Təbii, Rusiya Ukraynaya qarşı işğal faktı törədib, dəhşətli hadisələr baş verib. Yüz minlərlə insan bu işğal faktının qurbanı olub. Şübhəsiz, Rusiya ittiham olunmalıdır. Beynəlxalq məhkəmədə də, digər səviyyələrdə də Rusiya cəzalandırılmalıdır. Bu öz yerində. Amma bizə gələndə, biz dəfələrlə ədalətsizliyin şahidi olmuşuq. Hətta Rusiyanın Gürcüstana qarşı təcavüzü zamanı, Abxaziya və Osetiya məsələsinə görə dünya Rusiyanı qınadı, müəyyən sanksiyalar tətbiq etdilər. Eyni zamanda digər istiqamətlərdə biz bunu görmüşük. Amma Ermənistana qarşı bu mövqenin şahidi olmamışıq. Birinci növbədə Ermənistana, Köçəryana, Sarkisyana və digərilərinə qarşı Haaqa Məhkəməsində qərarlar qəbul olunmalı idi. Beynəlxalq məhkəmələrdə, insan haqları məhkəməsində onların insanlıq əleyhinə törətdikləri cinayətlərlə bağlı məsələ qaldırılmalı idi. Azərbaycan tərəfi dəfələrlə bu istiqamətdə təşəbbüslər edib. Fakt ortadadır ki, Azərbaycana qarşı törədilən həm işğal faktına, həm Xocalı cinayətlərinə, həm də dinc azərbaycanlıların kütləvi qətliamına görə Köçəryan da, Sərkisyan da, başqaları da birbaşa məsuliyyət daşıyır. Bu, göz qabağında baş verən cinayətdir. Beynəlxalq məhkəmələr müharibə caniləri Köçəryanın, Sarkisyanın hərbi cinayətlərinə göz yumurlar. Çox təəssüflər olsun ki, Ermənistana fərqli yanaşırlar. Bu ilk növbədə xristianlıq amili, həmrəyliyi ilə bağlıdır. Eyni zamanda onlar Ermənistan üzərindən regiondakı maraqlarını təmin edə bilirlər. Bu səbəbə görə də Ermənistanın cinayətlərinin üstündən sükutla keçirlər”.
A.Nağının sözlərinə görə, ona görə də onlar Ermənistana qarşı mövqe sərgiləmir. Məsələnin kökündə bu amilin dayandığını deyən QAT sədri qeyd etdi ki, onlar Ermənistanı bölgədə onların maraqlarına xidmət edən qüvvə kimi saxlayırlar. “Buna başqa cür yanaşmaq olmaz. Ona görə də bizim şikayətlərimizə bu şəkildə yanaşırlar. Hesab edirəm ki, Köçəryanın, Sarkisyanın, Ohanyanın cinayət məsuliyyətinə cəlb edilməsi, onlara Haaqa tribunalının qurulmasına nail olmalıyıq. Yorulmadan müraciətlər edilməli, faktlar, sübutlar göndərilməlidir. Azərbaycanın bu məsələdə mövqeyi reallığı qiymətləndirən bir mövqe olmalııdr. Bugünkü mövqe də ondan ibarətdir ki, nə qədər imkan var, onların cinayət məsuliyyətinə cəlb edilməsi ilə bağlı beynəlxalq məhkəmədə cinayət işi qaldırılmalıdır. Bütün bunlar davamlı şəkildə beynəlxalq birliyin diqqətinə çatdırılmalıdır.
Fikrimcə, Haaqa Məhkəməsi, nəhayət ki, Azərbaycan xalqına qarşı müharibə cinayətləri törədənləri məhşər ayağına çəkməlidir. Biz bu istiqamətdə işlərimizi gücləndirməliyik”- deyə A.Nağı qeyd etdi.
İradə SARIYEVA
