ABŞ prezidenti Co Bayden rusiyalı həmkarı Vladimir Putini “hərbi cinayətkar" adlandırıb. Ağ Evdə çıxışı zamanı jurnalistlərdən biri Baydenə rusiyalı həmkarını “hərbi cinayətkar” adlandırmağa hazır olub-olmadığını soruşub. Bayden əvvəlcə “yox” cavabını verib və otağı tərk edib. Lakin sonra geri qayıdaraq "O, hərbi cinayətkardır" deyib. ABŞ lideri ilk dəfə Putin haqqında bu ifadəni işlədib.
Artıq ox yaydan çıxıb və Bayden Putini "hərbi cinayətkar" adlandırıb.
Baydenin Putinə qarşı “hərbi cinayətkar” ittihamından sonra nə gəlir? Bu istiqamətdə daha nələr, daha hansı ittihamlar, addımlar gözlənilir?
“Həm də beynəlxalq aləmə bir siqnaldır ki, Putin “hərbi cinayətkar” kimi tanınmalıdır”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO-nun sədr müavini, siyasi şərhçi Faiq Ələkbərli “Bakı-Xəbər”ə ABŞ prezidenti Co Baydenin Rusiya prezidenti Vladimir Putini “hərbi cinayətkar” adlandırması ciddi məsələdir. “Baydenin Putini məhz “hərbi cinayətkar” adlandırması faktiki olaraq insanlıq adına suç işləmək anlamına gəlir. Putinə qarşı “hərbi cinayətkar” ittihamının işlədilməsi təsadüfi deyil. Bayden məhz bunu Ukraynada mülkü əhalinin, uşaqların, qocaların öldürülməsinə görə deyib. Mənə elə gəlir ki, bu kimi ittihamların irəli sürülməsi çox ciddi məsələdir. Baydenin Putini “hərbi cinayətkar” kimi ittiham etməsi dünya çapında Putinə qarşı güclü bir basqıdır. Həm də beynəlxalq aləmə bir siqnaldır ki, Putin “hərbi cinayətkar” kimi tanınmalıdır. Görünən odur ki, Bayden artıq Ukrayna və Rusiya arasında olan müharibədə Putinin, Rusiyanın ittihamçısı rolunda çıxış edir. Bəzi beynəlxalq təşkilatlar da artıq Putinin buna görə “müttəhim kürsüsündə” oturmalı olduğu barədə ara-sıra fikirlər səsləndirir. Belə qənaətə gəlmək olar ki, Baydenin Putinə qarşı “hərbi cinayətkar” ittihamı irəli sürməsinin kökündə çox ciddi bir məqam dayanır. Bayden bu ittihamı irəli sürməklə gələcəkdə Putinin “hərbi cani” kimi Haaqa Tribunalına verilməsi üçün bir zəmin hazırlayır. Məncə, Bayden beynəlxalq qurumlara “hazırlaşın, hərəkətə keçəcəksiniz” mesajını verir. Onu da deyim ki, Britaniyanın baş naziri Conson bir neçə gün əvvəl Putinin Haaqa Tribunalına veriləcəyini açıqlayıb. Digər tərəfdən də, nəzərə alsaq ki, hazırda Haaqa Tribunalı Rusiyaya qarşı tədqiqata başlayıb, bu baxımdan bu məsələ də real görsənir”.
Bayden tərəfindən Putinin qanlı bir müharibənin səbəbkarı, mülki əhaliyə, uşaqlara qarşı hərbi cinayət işlədən şəxs kimi dünyada tanıdıldığını deyən F.Ələkbərlinin sözlərinə görə, ola bilsin, Putinə qarşı bu və digər ittihamlar davam etdiriləcək. “Ukrayna xalqının müharibəyə cəlb edilməsi, dinc, mülki əhalinin öldürülməsi hərbi cinayətkarlıqdan başqa bir şey deyil. Bu birtərəfli müharibədir. Bu anlamda müharibənin suçlusu, başladanı bəllidir. Bu müharibəni Rusiya Federasiyasının prezidenti Vladimir Putin başladıb. Rusiyanın öz daxilində müharibə başlayan gündən indiyə qədər etiraz aksiyalar keçirilir, insanlar müharibə əleyhinə çağırışlar edir, görkəmli ziyalılar, fikir adamları, sənət adamları, biznesmenlər Putinin bu siyasətinə qarşı çıxır. Eyni zamanda müharibəyə cəlb edilənlər özləri etiraf edirlər ki, müharibə istəmirlər, döyüşmək fikirləri yoxdur, amma onları bu işə Rusiya təhrik edib, məcburiyyət qarşısında Ukraynaya qarşı döyüşürlər. Bütün bunların sorumlusu isə bütün hallarda Putindir. Ümid edirik ki, bu savaş dayanacaq və Ukrayna xalqı bu müharibədən qalib çıxacaq, buna inanırıq. Azərbaycan xalqı Ukrayna xalqının yanındadır. Bəşəri anlamda bizim Qərbi, Avropa Birliyini birmənalı olaraq haqlı çıxarmaq niyyətimiz də yoxdur. Amma müharibəyə görə əsas suç daşıyıcısının Putin olması danılmaz bir həqiqətdir” - deyə F.Ələkbərli qeyd etdi.
İradə SARIYEVA
