Milli Məclisin deputatı Şahin Seyidzadə "İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri təyin edildiyi üçün mandatından imtina etməsi ilə bağlı ərizə yazıb. Konstitusiyanın 89-cu maddəsinin I hissəsinin 4-cü bəndinə əsasən, Milli Məclisin üzvü dövlət orqanlarında vəzifə tutduqda mandatından məhrum edilir.
Seçki Məcəlləsinin 176.2-ci maddəsinə əsasən, bu hallarla əlaqədar Mərkəzi Seçki Komissiyasına ərizə (rəsmi məlumat) daxil olduqda, Mərkəzi Seçki Komissiyası ərizədə (rəsmi məlumatda) göstərilən faktları 2 aydan gec olmayan müddətdə araşdırır, qərar qəbul edir. Qərarın Mərkəzi Seçki Komissiyası tərəfindən qəbul edilməsi günündən birmandatlı seçki dairəsi üzrə seçilmiş deputat mandatından məhrum edilmiş sayılır.
Millət vəkilinin mandatından imtina etməsi ilə deputatsız dairələrin sayı 7-yə çatıb. Belə ki, 2020-ci il fevralın 9-da keçirilən növbədənkənar parlament seçkilərinin nəticələrinə əsasən, 125 seçki dairəsinin 121-dən qanunverici orqana deputat seçilib. 33 saylı Xətai birinci, 35 saylı Xətai üçüncü, 74 saylı Lənkəran kənd və 80 saylı İmişli-Beyləqan seçki dairəsinin nəticələri isə etibarsız sayılıb. Ötən ilin yayında deputat Fəttah Heydərovun dünyasını dəyişməsindən sonra parlament üzvlərinin sayı 120 nəfərə enib. 2021-in avqustunda isə 55 saylı Xaçmaz şəhər seçki dairəsinin deputatı Eldəniz Səlimov həbs edilib.
Qanunvericiliyə əsasən, bu dairələr üzrə təkrar seçki keçirilməlidir. Hələ ki, parlamentdə boş qalan deputat yerlərinə seçkilər keçirilməsi barədə qərar verilməyib. Lakin Mərkəzi Seçki Komissiyasının (MSK) sədri Məzahir Pənahov bir neçə ay öncə jurnalistlərə açıqlamasında bildirmişdi ki, Milli Məclisdə boş qalan dairələrə seçkilərin keçirilməsi yaxın zamanda gerçəkləşəcək.
Ancaq görünən budur ki, boş qalan deputat yerlərinə seçki keçirilməsi hələ gözlənilmir. İctimai rəydə belə məlumatlar gəzir ki, həmin yerlərə seçkilərin keçirilməməsinin başlıca səbəbi yeni parlamentin özünü doğrultmamasıdır. Hətta belə versiyalar var ki, parlamentin ümumuiyyətlə buraxılaraq Milli Məclisə yeni seçkilərin keçiriləcəyi ilə bağlı planlar olduğu üçün boş qalan yerlərə təkrar seçkilər keçirilmir. Səslənən bu versiyaları nə dərəcədə inandırıcı saymaq olar?
Böyük Azərbaycan Partiyadının sədri Elşad Musayev “Bakı-Xəbər”ə açıqlamasında bildirdi ki, Azərbaycan Konstitusiyasına görə, bizim Milli Məclisin üzvlərinin sayı 125 nəfərdi: “Faktiki olaraq 7 mandat boşdur. Ancaq təkrar seçkilərin keçirilməməsinin səbəbini pandemiya ilə əlaqələndirirdilər. Artıq pandemiyanın da təsiri çox deyil. Boş qalmaş yerlərə seçkiləri keçirmək mümkündür. Görünən budur ki, hakimiyyət seçkilərin keçirilməsində maraqlı deyil. Çünki seçki olanda həm də siyasi gərginlik artmış olur. Ölkənin müxalifətinin də elə bir gücü yoxdur ki, hakimiyyəti seçki keçirməyə məcbur edə bilsin. Azərbaycan parlamentinin indiki fəaliyyəti əksəriyyəti qane etmir. Bu parlamentin böyük əksəriyyəti özlərini buraxmış deputatlardı. Təzədən gedib yeni parlamentdə oturublar. Biz 44 günlük müharibənin gedişində gördük ki, Azərbaycan parlamentinin böyük əksəriyyəti ya danışa bilmir, ya da danışmaq istəmir. Hakimiyyət təəssüf ki, bu lal deputatları dəyişmək istəmir. Mənim proqnozuma görə, parlament seçkiləri 2024-cü ildə keçiriləcək. Çünki növbəti seçkinin vaxtı 2025-ci ilə düşür. Həmin il həm də Prezident seçkilərinin keçirilməsinin vaxtıdır. 2024-cü ilin dekabrına bələdiyyə seçkiləri düşür. Ən yaxşı halda çalışacaqlar ki, seçkini 2024-cü ilin əvvəlində keçirsinlər. Bu mənim ehtimalımdır”.
Məhəmmədəli QƏRİBLİ
