“Ukraynanın demilitarizasiyası və denasifikasiyası üzrə xüsusi hərbi əməliyyat sona qədər aparılacaq”. Bu barədə Rusiya prezidenti Vladimir Putin regionlara dəstək tədbirləri ilə bağlı iclasda bildirib. Dövlət başçısı bu açıqlaması ilə müharibənin davam edəcəyini söyləyib.
Putinin sözlərinə görə, Qərb Rusiyanın müstəqil kursunu bağışlamayacaq və onu sıxışdırmağa, ərazi bütövlüyünü pozmağa çalışacaq, lakin ABŞ və müttəfiqləri bunu edə bilməyəcək: “Rusiya qoşunları yalnız Donbasda fəaliyyət göstərsəydi, bu, təhlükənin aradan qaldırılmasına gətirib çıxarmazdı”.
Qeyd edək ki, fevralın 24-də Rusiya ordusu Ukraynaya qarşı hərbi əməliyyatlara başlayıb. BMT-nin son məlumatına görə, Ukraynada qaçqınların sayı 3 milyonu keçib. Putin müharibəni dayandırmaqla bağlı geri addım atmadıqca, Qərb Ukraynaya silah yardımını daha da artırır. Bu arada ABŞ prezidenti Cosef Bayden bəyan etdi ki, ABŞ bu həftə Ukraynaya 800 hava hücumundan müdafiə sistemi və 9 min tank əleyhinə sistemdən ibarət 1 milyard dollar dəyərində müdafiə yardımı köçürəcək. Belə görünür ki, vasitəçilik səylərinə rəğmən müharibə hələ davam edəcək. Konfrontasiyanın kəskin şəkildə davam etməsi nə vəd edir?
“Burada əsas məsələ Ukrayna xalqının iradəsidir”
Məsələyə münasibət bildirən Aydınlar Partiyasının sədr müavini Qorxmaz İbrahimlinin fikrincə, Putinin tarana getməsi Rusiyaya Əfqanıstan müharibəsindən baha başa gələcək: “Əvvəla, Valadimir Putin elə bir diktatordur ki, onun belə açıqlama ilə çıxış edəcəyi gözlənilən idi. O, başladığı işi dayandırmaq istəmir. Çünki diktatorların xarakteri belə olur. Onu yalnız rus xalqı dayandıra bilər. Təəssüflər olsun ki, biz bunu görmürük. Nə yazıq ki, rus cəmiyyəti belələrini imperiya xislətində yetişdirib. Bir neçə gün əvvəl ORT telekanalında redaktorun efirdə etirazı onu göstərdi ki, rus cəmiyyətində etiraz dalğası artmaqdadır. Bunlar publik şəkildə bunu edirlərsə, deməli, Putinin durumu heç də yaxşı deyil. Digər tərəfdən, Putin bu xisləti ilə savaşı dayandırsa, o zaman istefaya getməlidir. Putin fikirləşir ki, geri addım atsa, ölkə daxilində ciddi etirazlarla üzləşəcək və bu onun məhvinə gətirib çıxaracaq. O üzdən, onun müharibəni dayandıracağını güman etmirəm. ABŞ-ın hərbi yardımı artıracağına gəldikdə isə, hesab edirəm ki, bu, Rusiya ordusuna böyük zərbə olacaq. Zatən Birlşmiş Ştatlar Ukraynanı portativ silahlarla təchiz edirdi. Bundan sonra düşünürəm ki, daha müasir hava hücumundan müdafiə silahları ilə təmin edəcək. O cümlədən, digər əlavə hərbi yardımlar olacaq. Burada əsas məsələ Ukrayna xalqının iradəsidir. Ukrayna xalqı da işğala baş əymir və prezidentinin yanındadır. Hesab edirəm ki, yazın gəlişi ilə Rusiya ordusunun Ukrayna bataqlıqlarında itkiləri daha da artacaq. Meşələr yaşıllaşandan sonra Rusiya ordusuna müqavimət güclənəcək. Nəticədə rus ordusu Əfqanıstanda verdiyi itkidən çox əsgər itirəcək”.
Sədr müavini onu da qeyd etdi ki, sanksiyalar Rusiyaya fəlakət vəd edir.
Vidadi ORDAHALLI
