Sərdar Berdıməhəmmədov Türkmənistanda keçirilən növbədənkənar prezident seçkilərində 72,97% səslə qalib gəlib. Bu barədə məlumatı Türkmənistanın Mərkəzi Seçki Komissiyası yayıb.
Xatırladaq ki, Sərdar Berdıməhəmmədov ölkənin hazırki prezidenti Qurbanqulu Berdıməhəmmədovun oğludur. Növbədənkənar prezident seçkiləri martın 12-si keçirilib.
Sərdar Berdiməhəmmədov 1981-ci il sentyabrın 22-də Aşqabadda anadan olub.
O, Türkmən Kənd Təsərrüfatı Universitetində texnologiya mühəndisi ixtisası üzrə məzun olub, müxtəlif illərdə sənaye sahələrində məsul postlar tutub. 2008-2011-ci illərdə Sərdar Berdiməhəmmədov Türkmənistanın Rusiyadakı səfirliyində çalışıb. Rusiya paytaxtında diplomatik fəaliyyəti dövründə ikinci ali təhsil proqramı üzrə Rusiya Xarici İşlər Nazirliyinin Diplomatik Akademiyasını beynəlxalq münasibətlər ixtisası üzrə bitirib.
2011-2013-cü illərdə BMT-nin Cenevrədəki ofisində diplomatik vəzifədə çalışıb. 2016-cı ildən Xarici İşlər Nazirliyinin Beynəlxalq İnformasiya Departamentinə başçılıq edib. Elə həmin il də parlamentin deputatı seçilib. Ölkədə deputatlara başqa dövlət vəzifəsi tutmaq və bizneslə məşğul olmaq qadağan edilsə də, o, 2018-ci ildən xarici işlər nazirinin müavini, 2020-ci ildən sənaye naziri vəzifələrini tutub. Ötən ilin 11 fevralından isə Nazirlər Kabineti sədrinin müavinidir.
Sərdar Berdiməhəmmədov 2014-cü ilin avqust ayında texnika elmləri namizədi, 2015-ci ilin iyul ayında texnika elmləri doktoru elmi dərəcəsini alıb. Qeyd edək ki, Sərdar Berdiməhəmmədov evlidir, bir oğlu, üç qızı var.
Qurbanqulu Berdiməhəmmədov oğlunu prezident seçdirmək üçün çox uyğun zaman seçib. Dünyanın başı Ukraynadakı müharibəyə qarışdığı zamanda belə planı reallaşdırmaq Qurbanqulu Berdiməhəmmədovun uğurlu siyasi taktikasından xəbər verə bilərmi?
Politoloq Qabil Hüseynli “Bakı-Xəbər”ə açıqlamasında bildirdi ki, Türkəmənistanda seçkilərin nəticəsi hakimiyyətin atadan oğula ötürülməsilə nəticələndi: “Adətən belə hallara daha çox Qərb və ABŞ-dan sərt reaksiyalar verilirdi. Həmçinin həmin dövlətlərə bağlı olan beynəlxalq təşkilatlardan gəlirdi. Hələ ki, oradakı seçkilərə kəskin reaksiyaya rast gəlmədim. Türkiyə seçkilərin nəticəsini alqışlayıb. Rəsmi bəyanatda bildirilib ki, Türkiyə prezident seçkilərinin nəticələrinin dost və qardaş Türkmənistan üçün faydalı olmasını arzu edir. Bu barədə Türkiyə Xarici İşlər Nazirliyi məlumat yayıb. Türkmənistan prezidenti 7 il müddətinə seçilir. Təbiidir ki, Ukrayna müharibəsi olmasaydı, dediyimiz dairələrin həmin seçkilərə münasibəti daha sərt olacaqdı. Ancaq bu o anlama gəlmir ki, belə amilə görə Türkmənistana təzyiqlər olmayacaq. Həmin ölkə zəngin təbii ehtiyatlara malikdir. Qərb bundan maksimum faydalanmağa çalışacaq. Bir sözlə, Berdiməhəmmədovun hakimiyyəti oğluna ötürməsindən həmin dairələr daima Türkmənistana qarşı bir təzyiq üsulu kimi istifadə edəcəklər. Bütün bunlar nəticəni dəyişən deyil. Ata Berdiməhəmmədov enerjilidir. Əminəm ki, ölkənin idarə olunmasında yaxından iştirak edəcək”.
Məhəmmədəli QƏRİBLİ
