Rusiya ABŞ prezidenti Co Baydenə, eləcə də ABŞ rəhbərliyinin digər nümayəndələrinə qarşı sanksiya tətbiq etdiyini bəyan edib. Bu barədə Rusiya Xarici İşlər Nazirliyinin yaydığı məlumatda deyilir.
Bildirilir ki, bu addım Vaşinqtonun Rusiyaya tətbiq etdiyi sanksiyalara cavab olaraq atılıb və siyahıda olan şəxslərin ölkəyə girişi qadağan edilir.
“Stop siyahısı”nda olanlar:
Cozef Bayden – ABŞ prezidenti;
Entoni Blinken – Dövlət katibi;
Lloyd Ostin – Pentaqonun rəhbəri;
Mark Milley – Birləşmiş Qərargah Rəisləri Komitəsinin sədri;
Ceykob Sallivan – Prezidentin Milli Təhlükəsizlik üzrə köməkçisi;
Uilyam Berns – Mərkəzi Kəşfiyyat İdarəsinin direktoru;
Cenifer Psaki – Ağ Evin mətbuat katibi;
Dalip Sinqh – Prezidentin Milli Təhlükəsizlik üzrə köməkçisinin müavini;
Samanta Pauer – Beynəlxalq İnkişaf Agentliyinin direktoru;
Hanter Bayden – prezidentin oğlu;
Hillari Klinton – ABŞ-ın keçmiş dövlət katibi
Adeveyl Adeyemo – maliyyə nazirinin birinci müavini;
Reta Co – İxrac-İdxal Bankının prezidenti və Direktorlar Şurasının sədri.
O da vurğulanıb ki, yaxın gələcəkdə ABŞ-ın yüksək rütbəli məmurları, hərbçiləri və iş adamlarına qarşı sanksiyalar genişləndiriləcək.
Bəllidir ki, Rusiya bunu ABŞ-ın Rusiyanın yüksək rəsmilərinə tətbiq etdiyi sanksiyalara cavab addımı olaraq edib. Maraqlıdır, Rusiyanın sanksiyalarının ABŞ-a və tətbiq edilən şəxslərə hər hansı təsiri olacaqmı?
Milli Dirçəliş Hərəkatı Partiyasının sədri Fərəc Quliyev “Bakı-Xəbər”ə açıqlamasında bildirdi ki, bunun heç bir ciddi təsiri olmayacaq: “Mən buna “taktiki” gediş deyərdim. Yadınızdadırsa, 44 günlük müharibənin gedişində ermənilər öz məğlubiyyətlərinə qəribə izah verirdilər. Uğursuzluqlarına “taktiki geriçəkilmə” adını verməklə daxili ictimai rəylərini aldadırdılar. Rusiyanın atdığı bu addımı həmin siyasətə oxşatdım. Rusiyanın nə imkanları var ki, kiməsə sanksiya da tətbiq eləsin? Rusiyadan fərqli olaraq, ABŞ rəsmilərinin xarici banklarda oğurluq pulları, əmlakları yoxdur. Rusiya kimi dövlətlərdə vətəndaşlar özlərinin qanuni pullarını belə saxlamağa ehtiyat edirlər. Hesab edirəm, bu addım daxili ictimai rəyə hesablanıb ki, Rusiyadakı “vətənpərvərlərin” danışması üçün əsasları olsun. “İnstaqram” adlı sosial şəbəkəyə güya alternativ yaradırlar. Digər tərəfdən deyirlər ki, Avropa onlara lazımi avadanlıqları verməsə, Kosmosdakı cihazları yerə düşüb faciə yarada bilər. Çabalamaqla məşğuldurlar. Çəmbər o qədər daralıb ki, başlarını itiriblər. Hazırda ötən əsrin 70-ci illəri deyil ki, SSRİ kimi soyuq müharibə aparmaq mümkün olsun. Dünya kiçilib, informasiya saniyələr içində dünyanın bu başından digərinə çata bilir. Getmiş qatarı belə təbliğat köpüyü ilə də düzəldə bilməyəcəklər. Bütün bunları mənasız mübarizə üsulu sayıram”.
Məhəmmədəli QƏRİBLİ
