Antalya Diplomatiya Forumunda "Post-həqiqət dövründə dezinformasiya ilə mübarizə" mövzusunda panel baş tutub.
Paneldə çıxış edən Azərbaycan Prezidentinin köməkçisi Hikmət Hacıyev dezinformasiya ilə mübarizədə qlobal yanaşmanın tətbiq edilməli olduğunu bildirib. Hikmət Hacıyev yalan məlumatların ötürülməsinin təkcə sosial mediada və ya ənənəvi mediada deyil, siyasətdə də olduğunu deyib: "Doğru məlumatı mümkün qədər tez yaradıb təqdim etmək vacibdir. Susmaq və ya görməzlikdən gəlmək lazım deyil, buna yol verilməməlidir. “Kiçik məlumatdır, heç nə olmaz” deyilməməlidir. Tez cavab verilməlidir”.
Hikmət Hacıyev bildirib ki, Ermənistan-Azərbaycan münaqişəsi, Ermənistanın Azərbaycana qarşı müharibəsi informasiya müharibəsi və informasiya blokadası ilə başlayıb: “1990-cı illərin əvvəllərində Ermənistan Azərbaycanla müharibəyə başladı və kütləvi qırğınlar törətdi. Belə bir şəraitdə ABŞ Konqresi 907-ci Düzəlişi qəbul etdi ki, guya Azərbaycan Ermənistana hücum edir. Bu, informasiya müharibəsinin ironiyasıdır. Proses davam etdi. Azərbaycanın işğal olunmuş əraziləri azad edildikdən sonra, həqiqətən, mən həyatımda belə dağıntı görməmişəm. Azərbaycanın 9-dan çox şəhəri yer üzündən silinib, Azərbaycanın 67 məscidi dağıdılıb. Azərbaycan xalqını təhqir etmək üçün məscidlərdə donuz saxlayıblar. Azərbaycan xalqının bütün mədəni irsi məhv edilib. Bəs biz bu insan hekayələrinin əksini, o cümlədən Fazil kimi insanların hekayələrini “Fiqaro” kimi media orqanlarında gördükmü, yox, amma yazırlar ki, Azərbaycan erməni mədəni irsini məhv edir və mənim sualım budur ki, harada, necə, mənə bir fakt verin. Fakt yoxdur. Təbii ki, biz onları dəvət etmişik, səfirlərini də (işğaldan azad olunan) ərazilərə götürmüşük, jurnalistləri də götürmüşük, onlar yerlərdə özlərinin faktaraşdırma missiyasını həyata keçirmişlər. Heç bir reaksiya yoxdur. Dünən bu dezinformasiyanın davamı çərçivəsində, Avropa vətəndaşlarından yığılan vergilərlə fəaliyyət göstərən qurumda qətnamə qəbul edildi. Təbii ki, Azərbaycan üçün bu bir kağız parçasıdır. Bizim Avropa Parlamenti qarşısında öhdəliyimiz yoxdur. Lakin bu qurum özünə hörmət etməlidir. Qətnamədə "Azərbaycan erməni mədəni irsini məhv edir" deyilir. Mənim sualım budur: Harada? Mənə misal çəkin, sübut göstərin. Sübut yoxdur. Bəs Fazilin və qaçqın və məcburi köçkünə çevrilmiş azərbaycanlıların hekayələri haradadır? Ona görə də bu rəqəmsal anarxiyada belə ədalətsizliklə üzləşirik”.
Hikmət Hacıyevin ermənipərəst qətnamə qəbul edən Avropa Parlamentinə qarşı gətirdiyi arqumentləri necə qiymətləndirmək olar?
Milli Qeyri Hökumət Forumunun prezidenti Rauf Zeyni “Bakı-Xəbər”ə açıqlamasında bildirdi ki, Antaliya Forumunda deyilən paneldə keçirilən müzakirədə Hikmət Hacıyevin ifadə etdiyi mövqeyi tam dəstəkləyir: “Hikmət müəllim konkret dəlillərə söykənərək həm ermənilərin vandallığını, həm də dezinformasiyalar vasitəsilə dünyanın nüfuzlu qurumlarını və dövlətlərini necə aldatlıqlarını ortaya qoymuş oldu. Biz QHT-lər olaraq Avropa Parlamentinin əsassız və məntiqsiz qərarına öz etirazımızı bildirdik. Biz belə etirazları 30 ildir edirik. Ancaq Avropa institutları öz qərəzlərindən geri qalmırlar. Onlar özlərinin mandatlarına, nizamnamələrinə hörmət etməyən qurumlara çevriliblər. Bununla bağlı dünya birliyi dəyərləndirmə aparıb, saf-çürük etməlidir. Hansı beynəlxalq qurumun dünyada etimadı yoxdursa, ona heç münasibət bildirmək lazım deyil. Biz bu təşkilatlarla sağlam əməkdaşlıq etmək istəyirik, onlar isə günü-gündən bəşəri dəyərləri ayaqlar altına atırlar. Ürəkləri istəyən qərarları qəbul etməklə bəşəri ədalətsizliyə yol verirlər. Çox acınacaqlı vəziyyətdir. Ermənilər 200 ildir bizim mədən irsimizi məhv edir, buna baxan yoxdur. İndu bunlar güya erməni mədəni irsinin məhv edilməsilə bağlı saxta qətnamə qəbul edirlər. Hesab edirəm ki, hörmətli Hikmət müəllim bu yalanları lazımi şəkildə ifşa etməyi bacardı”.
Məhəmmədəli QƏRİBLİ
