Rusiyanın “Birinci kanal”ının efirində gözlənilməz hadisə yaşanıb. “Zaman" xəbərlər proqramı zamanı telekanalın redaktoru Marina Ovsyannikova əlində müharibə əleyhinə şüarlar əks olunmuş plakatla efirə müdaxilə edib.
“Müharibəni dayandırın. Təbliğata inanmayın. Burada sizə yalan danışırlar” deyə plakatda yazılan sözləri xanım əməkdaş bir neçə dəfə təkrar edib.
Bu hadisə reallıqdır, yoxsa səhnələşdirilib? Reallıqdırsa, nəyin göstəricisi sayıla bilər?
Azər Həsrət: “Efirdəki səhnə quramadan daha çox reallığı əks etdirir”
Media eksperti Azər Həsrət “Bakı-Xəbər”ə açıqlamasında bildurdi ki, bu mənzərə ilə bağlı hər cür ehtimal irəli sürmək olar: “Ümumi ovqatı və Rusiya ictimaiyyətinin müharibəyə münasibətini nəzərə alsaq, bunun real bir səhnə olduğunu deyə bilərik. Çünki nə qədər Rusiya informasiya ilə bağlı sərhədləri bağlı tutmağa çalışsa da, oradakı ovqat hamıya bəllidir. Rusiya vətəndaşlarının əksəriyyəti bu müharibıyə qarşıdır. Rusiya insanları yaxşı dərk edir ki, bu ədalətsiz bir müharibədir. Bu bir təcavüzdür və işğaldır. Özü də doğma kökləri olan bir ölkəyə qarşı. Buna görə də, efirdəki səhnə quramadan daha çox reallığı əks etdirir. Üstəlik də, belə bir səhnənin qurulması Rusiya dövlətinə heç bir fayda verə bilməzdi”.
Müşfiq Ələsgərli: “Həmin addımı Rusiya cəmiyyətinin müharibəyə olan münasibətinin göstəricisi saymaq olar”
Digər media eksperti Müşfiq Ələsgərli qəzetimizə bildirdi ki, faktiki olaraq, Rusiya Ukrayna ərazisinə hücum etməklə ədalətsizliyə yol verib: “Bir ölkənin daxili işlərinə müdaxilə edir, onun siyasi yön seçməsinə mane olur. Aparılan bu müharibə həm də kobuddur. Müharibənin özünün gedişi, taktikası bunu sübut edir. Rusiya xəstəxanaları, təhsil müəssisələrini bombalayır. İstənilən halda bunu Rusiya cəmiyyətindən gizlətmək memkün deyil. Nə qədər gizlətməyə çalışsalar da, bacarmadılar. Jurnalistlər daha aktiv təbəqədirlər. Onlar baş verənləri daha yaxşı anlayır. Rusiya televiziyasındakı hadisə göstərir ki, Rysiyanın siyasi aktiv təbəqəsi nəyin baş verdiyinin fərqindədir. Həmin addımı Rusiya cəmiyyətinin müharibəyə olan münasibətinin göstəricisi saymaq olar”.
Məhəmmədəli QƏRİBLİ
