Ermənistan Baş naziri Nikol Paşinyanla ABŞ Dövlət katibi Entoni Blinken arasında telefon danışığı olub.
Telefon danışığı zamanı tərəflər Ermənistan-ABŞ münasibətlərinin gündəliyində duran məsələlərə toxunub və müxtəlif sahələrdə ikitərəfli əməkdaşlığın inkişafı və möhkəmləndirilməsi məqsədilə strateji dialoqun vaxtının təyin edilməsinin vacibliyini qeyd ediblər. Nikol Paşinyan Entoni Blinkenlə söhbətində Qarabağ ətrafındakı vəziyyətə və artan gərginliyə toxunub. Bununla yanaşı, tərəflər regionda sabitliyin və sülhün təmin edilməsinin vacibliyini qeyd edərək, “ Qarabağ problemi”nin ATƏT-in Minsk Qrupunun həmsədrliyi çərçivəsində hərtərəfli həllinin Azərbaycan və Ermənistan arasında sülhün bərqərar olmasına töhfə verəcəyini vurğulayıb. Blinkenin fikrincə, bu çərçivədə fəaliyyət Ermənistan və Azərbaycan arasında sülhün bərqərar olmasına töhfə verəcək.
Görünən odur ki, Birləşmiş Ştatların baş diplomatı da erməni yalanlarına alət olaraq, iflasa uğramış Minsk Qrupunun yenidən dirçəldilməsi təşəbbüsü ilə çıxış edir. Halbuki, Rusiya ilə kəskin qarşıdurma fonunda bunun rel olmadığını Blinken bilməmiş deyil. Belə olan halda ABŞ-ın bu yalana ortaq olması təəccüb doğurur.
“Qərb-Rusiya qarşıdurması fonunda Minsk Qrupundan danışmaq sadəcə gülüncdür”
Məsələyə münasibət bildirən AMİP sədri Arzuxan Əlizadənin fikrincə, Birləşmiş Ştatların Minsk Qrupunun fəallaşdırılması ilə bağlı sərgilədiyi məsuliyyətsiz mövqe Ermənistanı danışıqlarda qeyri-konstruktiv mövqe tutmağa bir növ həvəsləndirir: “Amorf bir qurumu yenidən prosesə cəlb etmək cəhdi, bu işə yalnız ziyan gətirəcək. ABŞ Dövlət katibi Entoni Blinken ATƏT-in Minsk Qrupunun Qarabağ nizamlamasına töhvə verə bilmədiyini təcrübəli diplomat olaraq yaxşı bilir. Baxmayaraq ki, Minsk Qrupu bəlkə də yeganə format idi ki, 3 həmsədr ölkənin mövqeyi üst-üstə düşürdü. Hər üç dövlət, prinsipcə, Ermənistanın maraqlarından çıxış edirdi. Qarabağdakı separatizmə bu və ya digər formada himayədarlıq edirdilər. Rusiya hərbi anlamda, ABŞ iqtisadi formada, Fransada əsasən siyasi formada yardım göstərirdi. Ancaq bütün bunlar Azərbaycanı işğalla barışmağa və onu qəbul etməyə məcbur edə bilmədi. Uzun illərdən sonra Azərbaycan əlverişli məqamdan istifadə edərək 30 illik işğala son qoydu. Hərb yolu ilə ərazi bütövlüyünü bərpa etdi. Zatən müharibə başlayana qədər Minsk Qrupu praktiki olaraq iflasa uğramışdı. Bu qurumun adı gələndə hamıda ikrah hissi yaranırdı. Müharibədən sonra Minsk Qrupunun bərpasından söhbət gedə bilməz. Çünki tamamilə yeni reallıqlar yaranıb. Üstəlik Qərb-Rusiya qarşıdurması fonunda Minsk Qrupundan danışmaq sadəcə gülüncdür. Üstəlik bu qarşıdurmanın hələ uzun müddət çəkəcəyini nəzərə alsaq, ümumiyyətlə bu haqda danışmaq yersizdir”.
Bir sözlə, partiya sədri Blinkenin yanaşmasının mənasız olduğunu qeyd etdi.
Vidadi ORDAHALLI
