Avropa İttifaqının Cənubi Qafqaz üzrə xüsusi nümayəndəsi Toivo Klaar Ermənistanda səfərdədir. Aİ rəsmisi bir sıra görüşlər keçirib.
Ermənistan Təhlükəsizlik Şurasının katibi Armen Qriqoryan Toivo Klaar ilə görüşüb. Görüşdə tərəflər Ermənistan-Azərbaycan sərhədindəki vəziyyəti, sərhəddə təhlükəsizlik və sabitliyin səviyyəsinin artırılması istiqamətində görülən tədbirləri müzakirə edib. Bu kontekstdə Ermənistan-Azərbaycan sərhədinin demarkasiyası və delimitasiyası prosesinə başlanmasının zəruriliyi vurğulanıb. Tərəflər, eyni zamanda, Qarabağ münaqişəsinin ATƏT-in Minsk Qrupunun həmsədrliyinin mandatı çərçivəsində hərtərəfli və uzunmüddətli həllinin vacibliyini vurğulayıb.
Görünən odur ki, Aİ rəsmisi Azərbaycanda olanda bir söz, Ermənistanda səfərdə olanda tamam başqa söz deyir. Məsələ ondadır ki, Toivo Klaar fevralın sonlarında Bakıda səfərdə olub. Səfər çərçivəsində Azərbaycan rəsmiləri ilə keçirilən görüşlərdə o, Minsk Qrupu formatının bərpası barədə heç nə demədi. Zatən Aİ rəsmiləri Azərbaycanın MQ ilə bağlı mövqeyini yaxşı bilirlər. Belə olan halda necə olur ki, T.Klaar Bakıda görüşlər keçirərkən MQ-dən bir kəlmə danışmır, amma İrəvanda MQ mandatını qabardır?
“Klaarın bu yanaşması konkret olaraq Ermənistanın da əleyhinədir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Problem ondadır ki, Ermənistan tərəfinin hazırkı siyasətində biz qeyri-konstruktiv yanaşmanı görürük. Bəzən Baş nazir Nikol Paşinyan sülh sazişinin imzalanmasının vacibliyini vurğulayır. Ancaq bundan fərqli olaraq, hökumətin üzvləri münaqişəni yenidən ortaya atmaq kimi absurd mesajlar verirlər. Avropa qurumları istəyir ki, ATƏT-in Minsk Qrupu təşəbbüsü yenidən ələ alsın. Bu da bizim üçün qəbuledilməzdir. O baxımdan hesab edirəm ki, Avropa İttifaqı rəsmisinin məlum mövqeyinə Azərbaycan öz rəsmi etirazını bildirməlidir. İlk növbədə Avropa İttifaqı bunu qəbul edib və rəsmilərinin olkəmizə səfərində bunun şahidi oluruq. Ermənistana səfərində isə digər açıqlama vermələri, qeyri-peşəkarliqla yanaşı, sülhün əldə olunmasına qarşı bir gedişdir. Ermənistan rəsmiləri çox yaxşı bilirlər ki, bu məsələ Azərbaycan üçün bitib. Həmçinin, Azərbaycan hazırkı siyasəti ilə Xankəndidə öz suverenliyini bərpa etmək istiqamətində addımlar atır. İndi Ermənistan bu məsələmi qabardırsa, vəziyyətin yenidən gərginləşməsinə gətirəcək addımlar atırsa, o zaman iqtisadi blokadada qalacaq. Ümumiyyətlə, Avropa İttifaqı rəsmisinin bu yanaşması konkret olaraq Ermənistanın da əleyhinədir. Çünki nəticə etibari ilə bu, ölkənin iqtisadi blokadada qalmasına gətirib çıxarır. Kommunikasiya xətlərinin açılması yubanır”.
Bu baxımdan politoloq hesab edir ki, Avroittifaq Minsk Qrupu ilə bağlı istəklərindən əl çəkməlidir.
Vidadi ORDAHALLI
