Artıq 19 gündür Rusiyanın Ukraynada apardığı müharibə davam edir. Ancaq Rusiyanın gözləntiləri özünü doğrultmur. Məsələ ondadır ki, ilk günlərdə Ukrayna müharibəsinin 2-3 günə yekunlaşdırılması planlaşdırılırdı.
Kreml hesab edirdi ki, ildırım sürəti ilə Ukrayna ordusunu məğlub edəcək və öz istəyinə çatacaq. Ancaq gözləntilər tam əksinə oldu. Həm Ukrayna müharibəsi uzanır, həm də Rusiyanın itkiləri artır. Vəziyyət o həddə gəlib çatıb ki, Rusiya hakimiyyətinin əsas təbliğatçıları belə, yanıldıqlarını etiraf edirlər. Məsələn, rusiyalı telejurnalist Vladimir Solovyov və hərbi ekspert Yakov Kedmi “Soloviev Live” verilişinin efirində Ukraynadakı vəziyyəti müzakirə ediblər. Kedmi əməliyyatın uğurunu şübhə altına alıb. O bəyan edib ki, demək olar, iki həftə ərzində Rusiya ordusu heç bir şəhəri ələ keçirməyib, heç bir şəhərdə hakimiyyət dəyişməyib.
Bir neçə gün əvvəl biz, “Bakı-Xəbər” olaraq, Rusiyanın müharibədə istəyinə tez bir zamanda nail ola bilməməsini Putinə müvafiq qurumların səhv məlumat verməsi ilə əlaqələndirən yazı ilə çıxış etmişdik. Hadisələrin gedişi göstərir ki, bizim proqnozlarımız tam olaraq özünü doğruldur.
Rusiya-Ukrayna müharibəsinin 19-ci günü davam edərkən, qanlı toqquşmalarda hər iki tərəf böyük itkilər verir. Ukraynanın bir çox şəhərləri mühasirədədir. Bu arada Rusiya xüsusi xidmət orqanları ilə bağlı səs-küy doğuracaq bir iddia ortaya atılıb. İddialara görə, Rusiya Federal Təhlükəsizlik Xidmətinin (FTX) Beynəlxalq Əlaqələr Xidmətinin rəhbəri Sergey Orestoviç və onun müavini Anatoli Bolyux Rusiya prezidenti Vladimir Putinin göstərişi ilə əvvəlcə həbs olunub, sonra onlar ev dustaqlığına buraxılıb.
İddiaya görə, Ukrayna müharibəsində FTX-nin kəşfiyyatda böyük uğursuzluq nümayiş etdirdiyini düşünən Putin bunun məsuliyyətini Orestoviç və Bolyuxda görüb. Qeyd edilir ki, FTX-nin Ukrayna müharibəsi ilə bağlı ona yanlış məlumat verdiyini düşünən Putin bu iki şəxsin korrupsiyada əli olduğunu güman edir. FTX-nin Ukrayna ordusunun müqavimətinin kifayət qədər zəif olduğunu bildirdiyi iddia edilərkən, müharibə başlayandan bəri Rusiya ordusuna böyük müqavimət göstərməsinin Putini qəzəbləndirdiyi bildirilir.
Müharibə başlayandan bəri FTX -nin xəbərlərinin kifayət qədər tutarsız olduğunu düşünən Putinin bu səbəbdən iki yüksək rütbəli şəxsi ev dustağı etdiyi vurğulanır.
Təhlükəsizlik orqanlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, artıq bu xəbəri dünyanın ən nüfuzlu nəşrləri tirajlayır: “Məlumatı gedən müharibənin fonunda informasiya savaşının elementi sayılan dezinformasiya kimi qiymətləndirmək olmaz. Yəni məlumat Qərb mediasında tirajlansa da, ilkin mənbə rus hərbi jurnalistləridir. Etibarlılığı şübhə doğurmayan, Rusiya xüsusi xidmət orqanları üzrə ən yaxşı ekspert sayılan və sistem daxilində ciddi əlaqələri olan tanınmış jurnalist və yazıçısı Andrey Soldatov bu iddia ilə çıxış edib. Həmin mənbə iddia edir ki, Putin kəşfiyyat qurumunda təmizləməyə başlayıb. Təmizləməyə FTX-nin "5-ci xidməti" nin məruz qaldığı bildirilir. Bu xidmətin 1990-cı illərin sonunda yaradıldığı və postsovet məkanında xarici kəşfiyyat funksiyalarını yerinə yetirdiyi bildirilir. Ermənistan və Qarabağ istiqamətində işlərin əlaqələndirilməsi də eyni xidmət tərəfindən həyata keçirilir. Qeyd edim ki, barəsində ev dustaqlığı qərarı verilən şəxslər FTX-nin ən nüfuzlu generallarından sayılır. Onlara qarşı repressiyalar bütün "5-ci xidmət"də ciddi dəyişikliklərin başlanğıcı ola bilər. Hadisələrin gedişi də göstərir ki, Putinə yanlış məlumatın verilməsi inandırıcıdır. Əks təqdirdə proseslər fərqli istiqamətdə cərəyan edərdi”.
Məhəmmədəli QƏRİBLİ
