KTMT-nin üzvü olan ölkələr BMT və kimyəvi silahın qadağan edilməsinə məsul olan təşkilatlara şikayətlə müraciət edib. Şikayətdə bildirilir ki, təşkilat üzvü olan ölkələr kimyəvi silahın yayılmasından, həmin silahın terrorçuların əlinə keçməsindən narahatdırlar. Təbiidir ki, KTMT Rusiyanın tam nəzarəti altında fəaliyyət göstərir. Ukrayna ilə gedən müharibə fonunda belə bir şikayətin ortaya çıxması şantajdır, yoxsa reallıq?
Apardığımız araşdırmalar göstərir ki, Rusiya bu təbliğatı çoxdan aparır. KTMT-nin Rusiyanın ardınca belə bir şikayət etməsi təsadüf deyil, Moskvaya dəstək mahiyyəti daşıyır.
Birləşmiş Millətlər Təşkilatının Təhlükəsizlik Şurası Suriya ilə bağlı sessiyada kimyəvi silahlara etibarı şübhə altına alınan Moskvanın tələbi ilə Ukraynada iddia edilən bioloji silah istehsalı ilə bağlı fövqəladə iclas keçirəcək. Rusiya cümə axşamı ABŞ-ı fevralın 24-dən on minlərlə rus hərbçisinin hücumu ilə üzləşən Ukraynada bioloji silahların yaradılması üzrə tədqiqatları maliyyələşdirməkdə ittiham edib.
Həm Vaşinqton, həm də Kiyev bu ittihamları rədd edir. Birləşmiş Ştatlar bildirir ki, bu, qabaqdangəlmə siyasətidir və Moskvanın tezliklə bu silahlardan istifadə edə biləcəyinə işarədir.
Ukrayna prezidenti Vladimir Zelenski video-müraciətində Rusiyanın iddialarını rədd edərək deyib: “Heç kim Ukraynada heç bir kimyəvi və ya hər hansı digər kütləvi qırğın silahı hazırlamır”.
Qərb dövlətləri Rusiyanın opponentlərini və Birləşmiş Ştatları Ukraynada mümkün istifadəsinə zəmin yaratmaq üçün bioloji və kimyəvi silahlar hazırlamaqda ittiham edərək hiylə işlətməkdə ittiham edir. Moskva Suriyada bunu etməkdə ittiham olunur.
Təhlükəsizlik Şurasının Suriyada kimyəvi silahdan istifadəyə dair aylıq iclasında həll olunmamış və BMT-nin Dəməşqdən məlumat çatışmazlığından əziyyət çəkməyə davam edən bir işlə bağlı həm Vaşinqton, həm də London Ukraynanı gündəmə gətirib.
ABŞ-ın BMT-dəki nümayəndəsinin müavini Riçard Mills deyib: “Rusiya Federasiyası dəfələrlə Suriyanın kimyəvi silahdan istifadə etməsi ilə bağlı dezinformasiya yayıb”.
Millsin britaniyalı həmkarı Ceyms Kariuki Moskvanın Ukraynaya hücumunu pisləyib və deyib ki, Rusiyanın kimyəvi silahları ilə bağlı dezinformasiyasının Ukraynada baş qaldırdığını görürük.
2018-ci ildə Moskva ABŞ-ı Ukrayna kimi NATO və Avropa İttifaqına üzv olmaq ambisiyaları olan başqa bir keçmiş sovet respublikası olan Gürcüstandakı laboratoriyada gizli şəkildə bioloji silah təcrübələri keçirməkdə ittiham edib.
ABŞ-ın Ukraynada bioloji və kimyəvi silah yaratması ilə bağlı Rusiyanın iddiaları cəfəngiyatdır.
Bunu da Ağ Evin sözçüsü Cen Psaki bildirib: “Hamımız Rusiyanın Ukraynada kimyəvi və ya bioloji silahdan istifadə etməklə hücuma keçməsinə, yaxud bundan istifadə edərək saxta bayraq əməliyyatı reallaşdırması ehtimalına qarşı tətikdə olmalıyıq”.
ABŞ Mərkəzi Kəşfiyyat İdarəsinin (MKİ) baş direktoru Uilyam Börns isə Senatın kəşfiyyat məsələləri üzrə komitəsinin iclasında bildirib ki, Rusiya kimyəvi silah tətbiq edə bilər.
Baş direktor deyib ki, Rusiya Ukraynadakı həqiqətləri qeyri-müəyyən müddətədək gizli saxlaya bilməyəcək.
U.Börns Rusiyanın özgəsinin bayrağı altında qurama əməliyyat keçirərək kimyəvi silahdan potensial istifadəsinə diqqət yetirməyin zəruriliyinə işarə edib: “Bu, hamınızın çox yaxşı bildiyi Rusiyanın metodlarının bir hissəsidir. Onlar bu silahları öz vətəndaşlarına qarşı istifadə ediblər. Onlar, ən azı, Suriyada və başqa yerlərdə bu silahdan istifadəyə sövq ediblər. Ona görə də biz bunu çox ciddi qəbul edirik”.
Göründüyü kimi, KTMT-nin bu cəhdi də əsaslı sayıla bilməz. Sadəcə, təşkilatın Rusiyanın siyasətinə yedəklik etmək cəhdi açıq görünür.
Məhəmmədəli QƏRİBLİ
