Ermənistan tezliklə Azərbaycanla sülh danışıqlarına başlamaq məsələsi ilə bağlı ATƏT-in Minsk Qrupunun həmsədrliyinə müraciət edə bilər. Bunu Ermənistan Xarici İşlər Nazirliyi açıqlayıb. Ermənistan XİN nümayəndəsi Vahan Hunanyan bildirib ki, sənədin imzalanmasından əvvəl, əlbəttə ki, bu mövzuda danışıqlar prosesi aparılmalıdır: “ Hər iki tərəfin bəyanatları hələ danışıqlar prosesinə çevrilmədiyindən, ölkələrin birbaşa danışıqlarda zəngin təcrübəsi olmadığından, Ermənistan yəqin ki, yaxın gələcəkdə vasitəçilərə (ATƏT-in Minsk Qrupunun həmsədrliyi) müraciət edəcək”.
Onun sözlərinə görə, məsələ üzərində hazırda iş aparılır.
Xatırladaq ki, bir müddət əvvəl Azərbaycanın xarici işlər naziri Ceyhun Bayramovun bəyanatını şərh edən Hunanyan bildirib ki, Ermənistan hökuməti ölkənin və Cənubi Qafqaz regionunun sülh yolu ilə inkişafı erası elan etmək strategiyasını rəhbər tutur və bu istiqamətdə müəyyən addımlar atmağa hazırdır.
Bayramov isə bildirib ki, Bakı dəfələrlə İrəvana sülh müqaviləsi bağlamağı təklif edib və çətinliklərə baxmayaraq, münasibətləri normallaşdırmaq barədə düşünmək olar.
“Sülh müqaviləsinin konkret imzalanmasına gəlincə, biz dəfələrlə ən yüksək səviyyədə bəyan etmişik ki, bu, hökumətin prioritetlərindən biridir”, - deyə Hunanyan bildirib.
O qeyd edib ki, regional kommunikasiyaların açılması da hökumət üçün prioritet məsələdir və bu istiqamətdə konkret addımlar atılır.
Martın 2-də Ermənistanın baş naziri Nikol Paşinyan bəyan edib ki, Azərbaycanla sülh sazişinin bağlanması üçün danışıqlara başlamaq məsələsi gündəmdədir. Onun sözlərinə görə, gündəliyə regional kommunikasiyaların açılması, Ermənistan-Azərbaycan sərhədinin demarkasiyası və delimitasiyası, Azərbaycanla sülh sazişi üzrə danışıqlara başlamaq məsələsi daxildir.
Göründüyü kimi, Ermənistan Minsk Qrupunu prosesə cəlb etmək üçün bütün mümkün variantlardan istifadə edir. Onların son bəhanəsi də, güya tırəflərin danışıq aparmaqla bağlı təcrübələrinin az olmasıdır.
Yeganə Hacıyeva: “30 il əvvəl yaradılan qurum öz fəaliyyətini doğrultmayıbsa, indiki məqamda nə edə bilər?”
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan nəyin bahasına olursa-olsun, Minsk Qrupunu yenidən prosesə cəlb etmək istəyir: “Sülh sazişini imzalamaq üçün danışıq aparmaq təcrübəsinin olmadığını əsas götürüb Minsk Qrupunun prosesdə iştirakını tələb etmək olduqca absurddur. Azərbaycan Minsk Qrupunu artıq vasitəçi kimi görmək istəmədiyini deyib. 30 il əvvəl yaradılan qurum öz fəaliyyətini doğrultmayıbsa, indiki məqamda nə edə bilər? Ermənistan rəsmiləri daha çox ATƏT-in Minsk Qrupunun hazırki həmsədr ölkələrinin saxlanılmasında maraqlı olduqlarını tez-tez vurğulayırlar.
Onlar əsas tərəfdaş kimi Rusiyanı görsələr də, digər həmsədrlər olan Fransa və ABŞ da onlar üçün uyğun tərəfdaşdır. Azərbaycan rəsmi bəyanatlarında ATƏT-in Minsk Qrupunun fəaliyyətini uğursuz adlandırıb, həmsədrlərini isə ikili standartlarda ittiham edib.
Prezident İlham Əliyev müsahibələrində deyib ki, səmərəlilik və nəticəlilik baxımından Minsk Qrupu özünü doğrultmayıb.
Minsk Qrupunun həmsədrləri BMT Təhlükəsizlik Şurasının üç daimi üzvü, üç nüvə dövləti olduğu halda onların Ermənistana təzyiq göstərməsinin mümkün olmaması, əlbəttə, çoxlu suallar doğurur. Ermənistan bu təsisatı əsasən Qarabağdakı ermənilərə status verilməsində göstərəcəyi səylərə görə prosesdə görmək istəyir. Azərbaycan isə dəfələrlə bəyan edib ki, heç bir statusdan söhbət gedə bilməz. Yaxşısı budur ki, Ermənistan reallıqları qəbul edib, sülh sazişini imzalamaq üçün özü masaya otursun”.
Məhəmmədəli QƏRİBLİ
