Azərbaycan xarici işlər naziri Ceyhun Bayramov bəyan edib ki, Azərbaycan Ermənistana münasibətlərin normallaşması ilə bağlı 5 maddədən ibarət sənəd göndərib və cavab gözləyir. C.Bayramov bu barədə Tükiyənin Anadolu Agentliyinə (AA) açıqlama verib.
Ermənistanla Azərbaycan arasında uzun illərdir münasibətlərin olmamasının əsas səbəbinin “işğal faktoru” olduğunu deyən C.Bayramov Ermənistanın işğal etdiyi torpaqların azad edilməsi üçün 27 sentyabr 2020-ci il tarixində başlayan 44 günlük Vətən müharibəsindən sonra Azərbaycanın bu məsələ ilə bağlı çox aydın mesajlar verdiyini deyib: “Mesaj belə idi: Münasibətlərimizin qurulmasına əsas maneə olan “işğal” amili aradan qalxıb. Belə olan halda Azərbaycan tərəfi keçmişin bütün çətinliklərinə və problemlərinə baxmayaraq Ermənistanla münasibətlərin normallaşmasının tərəfdarıdır”.
Azərbaycan Prezidenti İlham Əliyevin bir il əvvəl Ermənistana “sülh imzalamağa hazırıq” mesajını verdiyini xatırladan Bayramov daha sonra deyib: "Bir ilə yaxındır ki, Ermənistan tərəfindən bizim təklifimizə hər hansı bir cavab yoxdur. Azərbaycan tərəfi öz xoşməramlılığını göstərmək üçün bu yaxınlarda Ermənistana yeni təklif verib...
Biz Ermənistan tərəfinə mahiyyətcə Azərbaycan və Ermənistan arasında münasibətlərin normallaşdırılmasını özündə əks etdirən bəzi əsas prinsipləri təklif etdik. Dövlətlərarası münasibətlərin tənzimlənməsinə dair əsas prinsiplərə və ənənələrə uyğun olaraq fikrimizi bildirdik. Biz “biz münasibətləri müəyyən prinsiplər əsasında inkişaf etdirməyə hazırıq” dedik. Ermənistan bunlara baxıb öz fikrini bildirməlidir. Əgər Ermənistan səmimi şəkildə münasibətlərin normallaşmasını istəyirsə, bu, onlar üçün çox yaxşı fürsətdir. Yaxın vaxtlarda Ermənistanın cavabı bəlli olacaq və təbii ki, bundan sonra müvafiq addımlar atacağıq".
Təklifin bu yaxınlarda göndərildiyini qeyd edən C.Bayramov, "Bir səhifəlik sənəddir. Əsas prinsiplər müəyyənləşdirilib və irəli sürülüb. Əgər Ermənistan tərəfi münasibətlərin normallaşmasını istəyirsə, bu təklifə dərhal münasibət bildirməlidir...”
Azərbaycanın dəfələrlə vurğuladığı iki ölkə arasında sərhədlərin müəyyən edilməsi məsələsinin də bu təkliflər sırasında olduğunu deyən C.Bayramov Azərbaycan tərəfinin bu məsələlərin həllini təklif etdiyini, lakin Ermənistanın hər dəfə ilkin şərtlər irəli sürdüyünü bildirib. Prosesin başlanması üçün ilkin şərtlərin qəbuledilməz olduğunu vurğulayan C.Bayramov deyib ki, ikitərəfli əməkdaşlıq qrupu yaradılmalı və fəaliyyətə başlamalıdır.
Nazir deyib ki, Azərbaycanın Ermənistana təklifi beş əsas maddədən ibarətdir.
Təxminən bir il əvvəl Ermənistana edilən təklifin cavabsız qaldığını xatırladan C.Bayramov bildirib ki, Ermənistan tərəfinin nə qədər səmimi olduğunu bu ikinci təklifə verdiyi cavabda görəcəyik.
TAHİR
