Rusiyada 8 general istefaya göndərilib və Ukraynada aparılan müharibənin taktikası dəyişib. Kremldə Kiyevi iki-üç günə tutmağı hesablamışdılar, amma bu plan iflasa uğradı. Bu haqda Ukraynanın milli təhlükəsizlik və müdafiə Şurasının katibi Aleksey Danilov bildirib.
Onun sözlərinə görə, Ukrayna rəhbərliyinin düşmənin planı barədə dəqiq anlayışı var, hazırda Rusiyanın niyyəti dəyişib, habelə qarşıya qoyulan vəzifələri yerinə yetirə bilməyən 8 general istefaya göndərilib:
“Ukrayna tərəfinin məlumatına görə, müharibənin 15-ci günündə Rusiya ordusunun canlı qüvvə sarıdan itkiləri 12 min nəfəri keçib. Minlərlə rus əsgəri əsir alınıb, 350-yə yaxın tank və 2 minə qədər digər hərbi texnika məhv edilib.
Rusiya hazırda hücum əməliyyatlarını dayandırıb və əsasən mühasirədə saxladığı yaşayış məntəqələrini aviasiya, artilleriya zərbələri ilə dağıtmaqla məşğuldur. Ukraynanın hava məkanını bağlamaq üçün Qərbə etdiyi çağırışlara isə hələlik müsbət cavab verilmir.
Eyni zamanda Qərb Ukraynaya Rusiya aviasiyası ilə mübarizə aparmaq üçün qırıcılar da verməyə tələsmir. ABŞ-ın Avropadakı komandanlığının rəhbəri general Tod Uolters bildirib ki, indiki halda Qərbin Ukraynaya verə biləcəyi ən yaxşı silah MiQ-29 qırıcıları deyil, tank əleyhinə raketlər və zenit silahlarıdır”.
Rusiyanın generallarla bağlı atdığı addım müharibənin gedişində nəyisə dəyişə bilərmi?
Hərbi-siyasi ekspert Ramil Məmmədli “ Bakı-Xəbər”ə açıqlamasında bildirdi ki, bu müharibə haqqında danışarkən bir məsələni xüsusi qeyd etmək lazımdır: “Ukrayna üçün bu müharibədir, Rusiya üçün isə hərbi əməliyyatdır. Rusiyanın apardığı döyüş taktikası da müharibə şəraitinə uyğun deyil. Müharibənin taktikası döyüşün aparılması taktikasından fərqlənir. Rusiya ordusu bu taktikadan geniş istifadə etmir. Dərinlikdə olan qüvvələr sıradan çıxarılır və irəliləmə həyata keçirilir. Bu müharibədə, demək olar ki, müdafiə xətti yoxdur. Rusiya ordusu bütün gücü ilə hərbi əməliyyatları keçirsə, biz qısa müddətdə Kiyevin ələ keçirildiyinin şahidi ola bilərik. Rusiya çalışır ki, yerli əhalidə özünə nifrət hissini çox da oyatmasın. Ola bilər ki, hansısa rəhbər şəxslər istefaya göndərilsin. Belə hallar müharibədə daim olacaq. İnanmıram ki, Rusiyanın bu addımı müharibənin taleyini dəyişə bilər. Rusiya bundan sonra döyüşlərin taktikasını dəyişərək, daha irimiqyaslı hərbi əməliyyatlara start verəcək. Belə olan təqdirdə Ukraynanın müdafiə olunması çətinləşəcək. Hazırda Rusiya ərazində dislokasiya edilən 100 minlik ordu hələ hərbi əməliyyatlara cəlb edilməyib. Rusiya həmin qüvvələri də döyüşə atarsa, müharibənin taleyi qısa müddətdə həll edilər. Rusiya özünü SSRİ ordusunun varisi sayır. Onlar da hədəfə asta-asta gediblər. Biz bunu Rusiya və SSRİ-nin etdiyi bütün müharibələr zamanı görmüşük”.
Məhəmmədəli QƏRİBLİ
