Antaliya diplomatik forumu çərçivəsində Ermənistan xarici işlər naziri Ararat Mirzoyanla Rusiya xarici işlər naziri Sergey Lavrov arasında görüş keçirilib. Görüş zamanı A.Mirzoyan və S.Lavrov Ermənistan-Rusiya əməkdaşlığının gündəliyinə toxunub, müttəfiqlik əlaqələrinin daha da möhkəmləndirilməsi ilə bağlı məsələləri müzakirə ediblər. Tərəflər iki ölkə arasında siyasi dialoqun səviyyəsindən, yüksək səviyyədə təmasların fəallığından məmnunluq ifadə ediblər.
Tərəflər 2020-ci il 10 noyabr, 2021-ci il 11 yanvar və 2021-ci il 26 noyabr tarixli üçtərəfli bəyanatların həyata keçirilməsinə də toxunublar. Görüşdə iki ölkənin XİN başçıları ATƏT-in Minsk Qrupu həmsədrlərinin mandatı altında Dağlıq Qarabağ münaqişəsinin hərtərəfli həlli üçün sülh danışıqlarının tam bərpasının zərurliyini vurğulayıblar. Rusiya rəsmisinin məhz indiki dövrdə Minsk Qrupu mandatının bərpasını dəstəkləməsi təəccüb doğurmaya bilməz. Məgər Lavrov görmür ki, ən azından Qərblə qarşıdurma fonunda Minsk Qrupunun fəaliyyəti mümkünsüzdür? Bunu bilə-bilə Lavrovun Minsk Qrupu məsələsində A.Mirzoyanla həmrəylik nümayiş etdirməsi nə deməkdir?
“Kimin nə deməsindən asılı olmayaraq, Minsk Qrupuna Qarabağ məsələsində yer yoxdur”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, Lavrovun məlum yanaşması Rusiyanın ikili oyun oynadığını özündə ehtiva edir: “Yoxsa onun kimi təcrübəli bir diplomatın belə mövqe sərgiləməsi təsadüf ola bilməz. Zatən S.Lavrov bunun mümkünsüz olduğunu hamıdan yaxşı bilir. Nəzərə almaq lazımdır ki, Ukraynaya təcavüzlə bağlı Rusiya-Qərb qarşıdurması kəskinləşir. Ola bilsin ki, Rusiya Minsk Qrupu kartından istifadə etməklə Qərblə münasibətləri yumuşaltmaq istəyir. Rusiya çox istəyər ki, Avropa İttifaqı ilə ABŞ arasında kəskin fikir ayrılığı yaransın. Ancaq hesab edirəm ki, bu mümkün deyil. Çünki situasiya tamamilə fərqlidir. Başqa bir tərəfdən, İkinci Qarabağ müharibəsi olmadan əvvəl onsuz da Minsk Qrupu gərəksiz bir quruma çevrilmişdi. Müharibə və onun nəticələri isə praktiki olaraq bu formatın üstündən xətt çəkdi. Ermənistan və həmsədr dövlətlər bunu qəbul etməsələr belə, yaranan reallığı dəyişmək gücündə deyillər. Ən azından ona görə ki, Azərbaycan Ermənistanın işğalına son qoyub. Nəticədə münaqişə beynəlxalq statusunu itirib. Sülhməramlıların nəzarətində qalan Xankəndi və digər yerlərə gəldikdə isə, oradakı ermənilərin reinteqrasiyası Azərbaycanın daxili işidir. Yəni bu, Minsk Qrupuna aid olan məsələ deyil. O üzdən, Rusiyanın bu məsələdə hansı mövqe tutmasının heç bir əhəmiyyəti yoxdur. Rusiya bir tərəfdən Qərbi Cənubi Qafqaza buraxmaq istəmir, o biri tərəfdən Minsk Qrupu barədə danışır. Bunlar isə bir-biri ilə uzlaşmayan məsələlərdir. Kimin nə deməsindən asılı olmayaraq, Minsk Qrupuna Qarabağ məsələsində yer yoxdur”.
Bu səbəbdən Ə.Mustafayev hesab edir ki, mövcud reallıqlar dəyişməyəcək.
Vidadi ORDAHALLI
