Ermənistanın baş naziri Nikol Paşinyan Rusiyaya səfər etməyi planlaşdırır. Rusiyanın TASS agentliyinin məlumatına görə, səfər aprelin 9-na nəzərdə tutulub. Paşinyan özü səfərlə bağlı bildirib: “Biz bu səfərə hazırlıq görürük. Səfərin yüksək səviyyədə və daha əhatəli, məhsuldar keçməsi üçün vacib olanların hamısını etmək lazımdır”.
Qeyd edək ki, Nikol Paşinyan martın 9-da Fransaya işgüzar səfər edib. Amma bu səfər Rusiyada narazılıqla qarşılanıb. İndi hesab edilir ki, əslində gələn ay Paşinyan Moskvada məhşər ayağına çəkiləcək. Bunu erməni mediası da etiraf edir. Məsələn, “Qraparak” qəzeti yazır ki, Rusiya artıq Paşinyanın ikili oyunlarına dözməyə hazır deyil. Bildirilir ki, Rusiya Ermənistanın anti-Rusiya davranışından narahatdır və hesab edir ki, Ermənistan hakimiyyəti gizli şəkildə Avropa və ABŞ-la sövdələşməkdə davam edir: “Bizdə olan məlumata görə, Rusiyanın güc strukturları hakimiyyət nümayəndələrinin Rusiya-Ukrayna münaqişəsi ilə bağlı özünü necə ifadə etdiyini başa düşmək üçün erməni mediasını fəal şəkildə izləyir. Dövlət mediasının məzmununa da eyni qaydada nəzarət edilir. Monitorinq nəticəsində gündəlik hesabatlar tərtib edilərək Ermənistanın hakimiyyət orqanlarına göndərilir. Hesabatlar Ermənistanda anti-Rusiya təbliğatına sponsorluq etdiklərinin sübutu kimi Nikol Paşinyanın masasına qoyulur və hakimiyyət orqanlarında anti-rus baxışları var. Hər bir belə halla bağlı təxirəsalınmaz tədbirlərin görülməsi və günahkarların cəzalandırılması təklif edilir. Rusiya artıq Paşinyanın ikili oyunlarına dözmək niyyətində deyil və mütləq sədaqət və müttəfiqlik sübutunu tələb edir”. Rusiyalı ekspert Mixail Zaxarov da məsələyə məhz bu prizmadan yanaşır: “Hazırda Moskva Ukraynadakı əməliyyatlara görə çox güclü iqtisadi və siyasi blokada ilə üzləşib. Bu situasiyada Rusiyanın azsaylı müttəfiqlərinin siyasi dəstəyinə heç vaxt olmadığı qədər ehtiyacı var. Ermənistan baş naziri Nikol Paşinyan da özünü publik olaraq bu müttəfiqlər sırasına aid etmişdi. Amma Moskva üçün bu cür ağır məqamda Paşinyan Fransaya rəsmi səfər edib”.
O xatırladır ki, Ukraynaya qarşı hərbi müdaxilədən az əvvəl Rusiya prezidenti Vladimir Putin Ermənistan baş nazirinə zəng vurub, onunla ikitərəfli münasibətlərə dair aktual məsələləri müzakirə edib və Paşinyanı Moskvaya səfərə çağırıb: “Maraqlıdır ki, Paşinyanı əslində Yelisey sarayında yox, Kremldə gözləyirdilər, hələ Ukrayna hadisələrindən əvvəl Vladimir Putin Ermənistan baş nazirini ora şəxsən dəvət etmişdi”. Rusiyalı politoloqun fikrincə, Paşinyan Ukraynada hadisələrin sonrakı inkişafını görərək öz müttəfiqindən məsafə saxlamağa qərar verib: “Amma Ukrayna hadisələri və daha sonra Moskvanın beynəlxalq təcridi, sanksiyaların tətbiq edilməsi erməni rəhbərliyinin planlarını kəskin dəyişdirdi. Görünür Paşinyan, yeri gəlmişkən, o bu il KTMT-yə sədrlik edir, hesab edir ki, indi Rusiya ilə siyasi ittifaqların zamanı deyil və öz müttəfiqindən çox sərt şəkildə məsafə saxlayır”. Erməni politoloq Qrant Məlik-Şahnazaryan hesab edir ki, Rusiya rəhbərliyi Paşinyanın Parisə səfərindən narazıdır: “Ola bilsin, Paşinyanın Parisə səfəri adi vaxtlarda Moskvada daha az qıcıq yaradardı, çünki Fransanın Ermənistanla ənənəvi yaxın münasibətlərini Rusiyada da nəzərə alırlar. Və əslində Ukrayna hadisələrinə qədər Rusiya prezidenti Vladimir Putin dəfələrlə Fransa prezidenti Emmanuel Makronla Qafqazın məsələlərini, o cümlədən Qarabağı müzakirə edib. Lakin indi Rusiya heç vaxt olmadığı kimi təklənib və çox güclü beynəlxalq təzyiqlər altındadır. Bu fonda indi Moskva Paşinyandan çox narazıdır”. Nikol Paşinyanın Parisə səfərindən Rusiyanan narazı qaldığı bir vaxtda Ermənistan xarici işlər naziri Ararat Mirzoyanın da Brüsselə, NATO-nun mənzil-qərargahına səfərə hazırlaşdığı məlum olub. Məlumata əsasən, səfər martın 17-də baş tutacaq. Rusiyanın Cənubi Qafqazdakı “ən yaxın və təbii” müttəfiqinin xarici işlər nazirinin NATO mənzil-qərargahına səfərinin məqsədi haqda heç nə deyilmir, amma mühüm fakt budur ki, Mirzoyan NATO ilə Rusiyanın faktiki olaraq müharibə vəziyyətində olduğu bir vaxtda alyans rəhbərliyi ilə məsləhətləşmələrə yollanır. Belə hesab edilir ki, Rusiya bir daha Ermənistanın xəyanətkar mövqedə olmasını görür və buna görə İrəvanı mütləq cəzalandırmağa çalışacaq. Ermənistan hakimiyyəti əvvəllər də bu sayaq hərəkətlər edib. Paşiyanın başçılıq etdiyi komandanın üzvlərinin çoxu vaxtilə Qərbin maliyyə dəstəyi, qrantları ilə anti-Rusiya çıxışları edib. Ermənistan hakimiyyəti indi də yenidən arxasını Rusiyaya çevirərək Qərb ölkələrinin qapılarında gəzir. Bu, Ermənistan hakimiyyətinin və onların xidmət etdiyi siyasi-ideologiyanın mahiyyətidir. Nikol Paşinyan da bu idelogiyanın daşıyıcısı kimi Qərblə Rusiya arasında əsl üzünü göstərir. Azərbaycan qarşısında kapitulyasiyaya imza atan Ermənistanın şərtlərə əməl etməməsi də bu xislətdən doğur. Artıq Ermənistanın növbəti xəyanətini Rusiya da aydın şəkildə görür. Hesab edilir ki, Kreml buna görə Ermənistana qarşı cəzalandırıcı tədbirləri də işə salacaq.
Nahid SALAYEV
