Qarabağdakı separatçılar heç cür durub dayanmaq istəmirlər. Min cür yalan-palan danışıb, gündə bir qondarma iddia irəli sürüb özlərini aldatmaqla məşğuldurlar. Bu azmış kimi, Qarabağdakı Azərbaycan kəndlərinin adlarını dəyişdirməkdən, saxtalaşdırmaqdan, bu saxtakarlığı sosial şəbəkələrdə təbliğ etməkdən usanmırlar.
Birmənalı olaraq saxtakarlıq bunların yaşam tərzinə çevirilib. “Müdafiə ordusunun” keçmiş mətbuat katibi Senor Hasratyan Facebook-da iddia edib ki, guya Şuşa rayonunun Böyük Qaladərəsi ( Mets Şen) kəndindəki “qədim erməni kilsəsi” azərbaycanlıların “əməlləri nəticəsində” sökülmək təhlükəsi ilə üzləşib. Guya keçmiş “mətbaut katibi” özü bu günlərdə o kənddə olarkən bunu “gözləri ilə görüb”. Nəzərə alsaq ki, hazırda həmin ərazidə ermənilər yaşayır, azərbaycanlılar o kilsəyə necə ziyan vura bilər ki, bunlar yenə hay-küyə başlayıblar?
“Biz burada növbəti iftira və növbəti həyasızlıqdan başqa heç nə müşahidə etmirik”
Siyasi ekspert Rövşən Rəsulov bizimlə söhbətində bildirdi ki, ermənilər bizim kəndlərin adlarını kütləvi şəkildə dəyişməklə böyük cinayət edirlər.
“Ermənilərin bu qədər əl-ayağa düşmələrinin, özlərini əzabkeş, məzlum kimi göstərmələrinin arxasında əsla dini abidələrə hörmət məqsədi dayanmır. Bütün bunların arxasında yalnız bir kirli maraq dayanır – “xristian mənsubları” donuna girməklə, maksimum şəkildə Azərbaycana qarşı ittihamlar yağdırmaqla xristian mərkəzlərinin diqqətini özlərinə çəkmək. Məlumdur ki, ermənilər özlərini dünyanın bir sıra xristian millətlərindən və xalqlarından ayırmaqla ayrıca dini cərəyana, yaxud məzhəbə - qriqorianlığa aid olduqlarını bildirirlər. Yəni onların “məzhəbi” yalnız özlərinə aiddir və bu əslində din deyil, sektantlıq faktorunu ehtiva edir. Ermənilər özlərini “dünyada ilk xristianlar” kimi təqdim etməklə digər xristian məzhəblərindən üstün olduqlarını, məhz özlərinin “əsl xristian” olduqlarını zorla dünya ictimai rəyinə sırımaqla məşğuldurlar. Və bu xüsusda öz sektant baxışlarını siyasətə calayırlar. Daha dəqiq desək, hətta “dinlərindən” sui-istifadə etməklə öz kirli məqsədlərini həyata keçirməyə cəhdlər göstərirlər”.
R.Rəsulovun vurğuladığına görə, bu gün separatçılar daha ağ yalanlar söyləyirlər ki, bəlkə dünyada kimlərinsə tükünü tərpədə bilələr: “Rusiya sülhməramlılarının müvəqqəti yerləşdikləri ərazilərimizdə yaşayan ermənilər bir az da irəliyə gedərək iddia edirlər ki, Şuşa rayonunun Böyük Qaladərəsi deyilən yerində tarixi kilsə guya azərbaycanlılar tərəfindən dağıdılıb. Halbuki, üçtərəfli bəyanat imzalandıqdan sonra bu ərazidə RSK dayanır və azərbaycanlıların, ümumiyyətlə, orada hər hansı bir əməl törətməsi qeyri-mümkündür. Göründüyü kimi, biz burada növbəti iftira və növbəti həyasızlıqdan başqa heç nə müşahidə etmirik. Eyni zamanda, bu kilsənin tarixi Qafqaz Albaniyasına məxsus məbəd olduğu da bir çox mənbələrdə qeyd edilib. Hər yerdə olduğu kimi, bu ərazidəki qədim Alban kilsəsini də özününküləşdirən ermənilər indi onun üzərindən Azərbaycana qarşı iddialar səsləndirməyə başlayıblar. Və çox yəqin ki, saxtalaşdırdıqları kilsə üzərində özlərinin törətdikləri dağıntıları da Azərbaycanın ayağına “yazmağa” cəhdlər göstərirlər. Onlar əslində bu vasitə ilə 30 il işğal altında qalmış ərazilərimizdə dağıtdıqları, təhqirlərə məruz qoyduqları məscidlərimizi, pir və ocaqlarımızı, tarixi və dini abidələrimizi xarici ölkələrin gözündən yayındırmağa çalışır, diqqəti isə bu cür sərsəm iddiaları ilə öz üzərlərinə çəkə biləcəklərini sanırlar.
Lakin buradan digər bir sual da yaranır ki, əgər ermənilər özlərini dünyanın “ilk xristianları” hesab edirlərsə, vaxtilə işğal etdikləri Şuşadakı tarixi rus pravoslav kilsəsini niyə erməniləşdirmişdilər? Axı bu barədə fotoları, videoları bol olan çoxsaylı faktlar, dəlillər, sənədlər mövcuddur! Yaxud, bugünün özündə Xocavənddəki rus pravoslav kilsəsini xaraba vəziyyətə qoymaqla onun daşlarını, kərpiclərini daşıdıqlarını niyə etiraf etmirlər? Məgər onlar dünyanı bu qədərmi ələ sala biləcəklərini sanırlar?
Hesab edirəm ki, artıq belə oyunbazlıqlar ümumiyyətlə diqqət cəlb etmir. Artıq o da məlumdur ki, UNESCO-nun və BMT-nin məsul şəxsləri Qarabağa səfər edərək həm tarixi abidələrə qarşı törədilmiş vandallıqları qeydə alacaqlar, həm də Azərbaycana 30 il müddətində dəymiş ziyanları hesablayacaqlar. Sərsəm iddialarla çıxış edən dünyanın “ən qədim xristianları” isə əslində qarşılarına qoyulan faktlardan əsla yaxa qurtara bilməyəcəklər. Dağıdılmış hər bir məscidin, hər bir tarixi, dini abidəmizin hesabı bu varvarlardan sorulacaq və əslində onların özləri də bunu çox gözəl anlayırlar. Ona görə də “olarsa-olar”, olmazsa-olmaz” deyib quyruqlarını qapı arasından çıxara biləcəklərini sanırlar, amma yanılırlar.
Bu gün dünya hər şeyi öz rəngində görür, ağı-qaradan seçməyi bacarır. Bəli, ola bilsin ki, bəzi dairələr ermənilərin maraqlarından çıxış edə bilərlər, amma sizi inandırım, belə dairələr də artıq barmaqla sayılacaq qədərdir. Söz yox ki, ermənilər nə qədər həyasızcasına haray-şivən qaldırıb özlərini “məzlum”, “əzabkeş” kimi göstərəcəklərsə, bir o qədər də ifşa olunacaqlar. Artıq dünya da bunların sözügedən hay-həşirlərindən, klounadalarından bezib və sözün əsl mənasında cana dolub. Eyni zamanda dünya yeni çağırışlar, mesajlar astanasındadır və baş verən siyasi kataklizmlər, müharibələr və s. qlobal faktorlar uzun illər bəşəriyyətin zəhləsini aparmış erməni bağırtılarını dərin quyunun dibinə tolazlayıb. Və bu gün bənzər erməni iddiaları müxtəlif sosial şəbəkələrdə, informasiya məkanlarında məsxərəyə qoyulur, ələ salınır. Bu gün ermənilər yalnız öz dediklərini deyib-eşidirlər. Haqqında bəhs etdiyimiz növbəti olay da əslində tam şəkildə məsxərəyə qoyulacaq bir reallıqdır”.
İradə SARIYEVA
