Birləşmiş Ştatlardakı erməni lobbisi, hər zaman olduğu kimi, əlaqələrindən istifadə edərək Azərbaycana qarşı məkrli fəaliyyətini davam etdirir. Bu istiqamətdə erməni diasporu son günlər fəallığını daha da artırıb.
Bu arada ABŞ Konqresinin Nümayəndələr Palatası “Artsaxa” qarşı hərbi əməliyyatların mümkünlüyü barədə hesabat tələb edən qanun layihəsini qəbul edib. Palata 2022-ci maliyyə ilinin xərclərini ümumiləşdirən və Ermənistana “ən azı” 45 milyon dollar və “Artsax”da humanitar minatəmizləmə üçün 2 milyon dollar nəzərdə tutan layihəni qəbul edib. Qanun layihəsinin özündə Azadlığa Dəstək Aktının 907-ci maddəsinin redaksiyası var və həmçinin “bu qanunun qüvvəyə mindiyi tarixdən sonra 90 gündən gec olmayaraq” “Artsaxa” qarşı hərbi əməliyyatların aparılması ehtimalı haqqında hesabat tələb olunur.
Əvvəla, "Arsax" nədir? Hansı əsasla ABŞ konqresmenləri deyir ki, oranın adı "Arsax"dır? Ərazinin adı Qarabağdır. İkincisi, hansı hərbi əməliyyatdan söhbət gedə bilər? Ümumilikdə, ABŞ konqresmenlərinin Qarabağda erməni separatçılarına belə qahmar çıxmağının arxasında nə dayanır?
“"Artsax" ifadəsinin işlədilməsi onsuz da işlək olmayan beynəlxalq hüququn fiaskoya uğramasının bariz sübutudur”
Məsələyə münasibət bildirən AMİP-in sədr müavini Afsəddin Nəbiyev bununla bağlı bir sıra məqamlara toxundu: “Görünən odur ki, özünü demokratiyanın "carçısı" adlandıran dövlətlərin beynəlxalq hüquq, ərazi bütövlüyü anlayışı sabun köpüyündən başqa bir şey deyil. Son günlər dünyada baş verən hadisələr bunu deməyə əsas yaradır. Yaşadığınız dünya qaynar bir "qazana" bənzəyir. Beynəlxalq təşkilatlar, super güclər insanlığa qarşı törədilən fəlakətləri sadəcə seyr etməkdədirlər. Gözlərimiz önündə dünyanın yeni siyasi bölgüsü aparılır. Çox ciddi siyasi proseslərin önündəyik. Bu dövrdə hər bir dövlət başqa dövlətə qarşı bəhanələr axtarır. O üzdən, çox ehtiyatlı olmalıyıq. Belə məqamlarda ani bir ehtiyatsızlıq istənilən dövləti onilliklər boyu geri ata bilər. Biz bu sınaqları Birinci Qarabağ müharibəsi dövründə görmüşük. İndi səhvlər buraxmağa ixtiyarımız yoxdur. ABŞ Konqresinin Nümayəndələr Palatasının "Artsax" ifadəsi işlətməsi onsuz da işlək olmayan beynəlxalq hüququn fiaskoya uğramasının bariz sübutudur. Azərbaycanın beynəlxalq hüquq tərəfindən təsdiq olunmuş ərazisində "Arsax" adlı qurum mövcud deyil. Bütün hüquqi sənədlərdə Qarabağ Azərbaycanın ayrılmaz tərkib hissəsidir. Bu günlərdə Ukraynada baş verən müharibənin əsas səbəblərindən biri də etnik separatçılıqla bağlıdır. Burada çox sadə məntiq ortadadır. Bir dövlətin ərazi bütövlüyünü rəsmən tanıyıb, sonra da imkan düşdükcə tanıdığın dövlətin ərazisində etnik separatçılığa dəstək vermək artıq riyakarlığın, ədalətsizliyin, qanunsuzluğun əsl sübutudur. ABŞ-ın Nümayəndələr Palatası o yardımları Azərbaycana verməlidir. Çünki bizim dövlət bu müharibədə ən çox ziyan görmüş tərəfdir. Təxmini hesablamalara görə, Ermənistanın işğalçılıq siyasəti nəticəsində yüz milyardlarla dollar Azərbaycana ziyan dəyib. Bunun hesabını sormaq əvəzinə, hələ də demokratiya "beşiyi" etnik separatçılığa rəvac verməkdədir. Azərbaycan dövləti ABŞ-ın bütün rəsmi qurumları ilə bu məsələ ilə əlaqədar olaraq fəal siyasət aparmalıdır və bütün dünyaya bir daha bəyan olunmalıdır ki, Azərbaycanın ərazisində "Artsax" adlı qurum mövcud deyil. Sadəcə Qarabağda yaşayan ermənilər mövcuddur. Onların da Azərbaycanın vətəndaşlığını qəbul etməsi üçün dövlətimiz öz üzərinə düşən işləri uğurla həyata keçirməklə məşğuldur”.
Sədr müavini onu da əlavə etdi ki, siyasət bunun üzərində qurulmalıdır.
Vidadi ORDAHALLI
