Yerli mətbuatın yaydığı məlumata görə, Qarabağdakı erməni separatçılarının başçısı Araik Arutyunyan 2020-ci ilin payızında baş vermiş 44 günlük müharibə ilə bağlı yeni açıqlamalar verib. Xankəndidə erməni “ziyalılarının” nümayəndələri ilə görüşən A.Arutyunyan ermənilərin ilk növbədə "demoqrafik müharibə"də uduzduğunu vurğulayıb. O iddia edib ki, Qarabağda ermənilərin sayı 250-300 min nəfər olsaydı, o zaman müharibədə məğlubiyyət olmazdı.
Araik uduzmaqlarının səbəbini demoqrafik problemdə görür, guya “demoqrafik müharibədə” uduzduqlarını iddia edir. Bildiyimiz kimi, həm Birinci, həm də İkinci Qarabağ müharibəsi Ermənistanla Azərbaycan arasında baş verib və Qarabağdakı separatçılar heç zaman tərəf olmayıb, onlar Ermənistan ordusunun tərkibində döyüşüblər. Bu gün Araik çox çalışır ki, “müstəqil respublika” obrazı yaratsın, amma bacara bilmir. Çünki Qarabağ Azərbaycanın tərkib hissəsidir və orada yaşayan ermənilər də Azərbaycan vətəndaşlarıdır. Bu baxımdan Araikin nağıllarına yalnız özü ağıldakılar inana bilər.
“...Camaata “demoqrafiya” nağılı danışmaqla Araik özünü növbəti dəfə gülünc vəziyyətə salıb”
Qarabağ Azadlıq Təşkilatının (QAT) rəhbəri Akif Nağı “Bakı-Xəbər”ə şərhində bildirdi ki, separatçılar “demoqrafiya” məsələsini uzun illərdir qabartmağa çalışırlar və həmişə süni surətdə Qarabağda ermənilərin sayını çoxaltmağa çalışıblar, lakin nail ola bilməyiblər. “Ermənilərin Qarabağda sayının süni sürətdə artırılması məsələsi keçən əsrin 90-cı illərində dönə-dönə səsləndirilirdi. Hətta o vaxt Robert Köçəryanın da belə bir iddiası vardı ki, “yaxın on ildə” Qarabağdakı ermənilərin sayını 300 min nəfərə çatdıracaq (?). Ermənilər qarşılarına belə bir məqsəd qoymuşdular və bunun üçün də müəyyən məsələləri “həll etməyə” çalışırdılar. Lakin nə qədər çalışsalar da Qarabağda ermənilərin sayını 300 min nəfərə çatdırmağı bacarmadılar, bacara da bilməzdilər. Çünki təbii artımla həmin saya nail olmaq mümkün deyildi. Sayı süni şəkildə artırmaq üçün ora erməniləri kənardan köçürüb gətirməyə üstünlük verirdilər. Bu da beynəlxalq hüquq normalarının pozulması demək idi”.
A.Nağının sözlərinə görə, Ermənistan Qarabağa nə qədər kənardan, başqa ölkələrdən erməniləri köçürsə də, iddia etdikləri saya nail ola və “demoqrafik üstünlüyü” qazana bilmədilər. A.Nağının dediyinə görə, heç Qarabağda yaşayan ermənilərin özləri orada qalıb yaşamaq istəmirlər, o ki qaldı xarıcdən gələnlər: “Qarabağda yaşayan ermənilər özləri oranı tərk edirdilər. Kənardan müxtəlif şirnikləndirici vədlərlə aldadıb gətirdikləri ermənilərə vəsait ayırırdılar, evlər verirdilər, başqa şeylər təklif edirdilər, güzəştli şərait yaradırdılar ki, heç olmasa onlar qalıb yaşasınlar. Amma onlar da orada qalmayıb tərk edib gedirdilər. Süni şəkildə nə qədər erməni ailəsini Qarabağa köçürsələr də, “demoqrafik üstünlüyə” nail ola bilmədilər. Münaqişəyə qədər orada təxminən 137-140 minə qədər erməni yaşadığı deyilirdi, təbii, bu da saxtalaşdırılmış, şişirdilmiş bir rəqəm idi. Onların sayı az idi. Hələ Sovet dövründə Qarabağda yaşayan ermənilərin hamısının ikili qeydiyyatı vardı. Onlar həm Azərbaycanın Qarabağ bölgəsində, həm də Ermənistanda qeydiyyatda idilər. O cümlədən, keçmiş SSRİ-nin müxtəlif yerlərində də qeydiyyata düşmüşdülər. Ermənilərin belə bir siyasəti vardı ki, Qarabağda erməni sayını saxlasınlar, siyahıyaalma zamanı müəyyən bir say göstərilsin. Təqdim edilən say süni şəkildə şişirdilmişdi və Qarabağda o sayda erməni yaşamırdı, statistika üçün kənarda yaşayan ermənilərin qeydiyyatını orada saxlayırdılar. Hər dəfə də siyahıyaalma olanda rəqəmləri saxtalaşdırırdılar”.
A.Nağı qeyd etdi ki, münaqişə zamanı nə qədər istədilər sayı artıra bilmədilər və separatçıların 4-5 il əvvəlki statisikasında 137-140 min nəfər qalmışdı, sayı artıra bilməmişdilər. “Separatçıların iddia etdiyinə görə, hazırda Qarabağda maksimum 50-60 min nəfər yaşayır. Əslində isə Azərbaycan Prezidentinin vurğuladığı kimi, orada 25 min nəfərdən artıq əhali yoxdur. Araik yenidən “demoqrafik” məsələni səsləndirir və məğlubiyyətlərinə müxtəlif bəhanələr axtarır. Qarabağda nə qədər erməni olsa da, fərq etmir, onlar o torpaqda yaddırlar, yerli əhali deyillər. Azərbaycan xalqının və dövlətinin də iradəsi ortada idi ki, o torpaqlar işğaldan azad olunmalıdır, həmin ərazidə Azərbaycan hakimiyyəti bərpa olunmalıdır. O istiqamətdə siyasət yeridilirdi, o istiqamətdə də işlər davam etdirilir. Qarabağda ermənilərin sayını gündəmə gətirməklə və camaata “demoqrafiya” nağılı danışmaqla Araik özünü növbəti dəfə gülünc vəziyyətə salıb. Separatçılar süni, şişirtmə rəqəmlərlə Qarabağdakı əhalinin sayını heç zaman artıra bilməz. Heç əhalinin sayını 25 mindən yuxarı qaldırmağı bacarmayacaqlar. Sadəcə, separatçılar reallığı düzgün qiymətləndirib reallıqdan çıxış etmək istəmirlər. Reallıq isə ondan ibarətdir ki, onlar Qarabağa kənardan köçüb gəliblər, yerli əhali deyillər, say artımları da yoxdur. Orada 15-20 min nəfər erməni yaşayırsa Azərbaycan da onlara hər cür şərait yaratsın, onlar da yaşasın. Bu gün reallığı başa düşmək istəmirlər. Onlar reallıqla barışmasalar, xam xəyallara düşməkdə davam etsələr, heç o 15-20 min erməni də qalmayacaq çıxıb gedəcəklər. Azərbaycan onların orada yaşamasına etiraz etmir, biz beynəlxalq hüquq normalarına riayət edirik, insani dəyərlərə əməl edirik, amma onlar özləri özlərini qanundan kənarda qoyurlar, əlavə problem açırlar. Ona görə, separatşıların sayartımı arzusu xam xəyal olaraq qalacaq”.
A.Nağı hesab edir ki, erməni əhali separatçıların yanlış siyasətinə uysa, daha böyük problemlərlə üzləşəcək və bu səbəbdən də onıar nəhayət, separatçılarla yollarını ayırmalı və Azərbaycan vətəndaşları kimi yaşamağa üstünlük verməlidirlər. A.Nağının fikrincə, onsuz da separatçıların axırı yoxdur və onların ziyanlı fəaliyyətləri erməni əhalinin də zərərinə işləyir.
İradə SARIYEVA
