Son zamanlar Qarabağ separatçıları diqqəti özlərinə daha çox cəlb etmək cəhdləri nümayiş etdirirlər. Bu arada onlar Rusiyanın Ukraynaya hərbi təcavüzü şəraitində Donbasdakı separatçılara “humanitar yardım” göstərməyə qərar veriblər.
Separatçıların qondarma “dövlət naziri” Artak Beqlaryan bəyan edib ki, Rusiya sülhməramlıları vasitəsilə Ukraynadakı hərbi əməliyyatlar nəticəsində ehtiyacı olan insanlara 14 ton humanitar yardım göndəriblər. Onun sözlərinə görə, 14 ton çox böyük həcm olmasa da, imkanları ilə müqayisədə kiçik deyil.
Məlum olduğu kimi, dünyanın bir sıra ölkələrindən Qarabağa hümanitar yardım göstərilir. ABŞ MDB məkanında digər separatçılara humanitar yardım etmədiyi halda, məxsusən uzun illərdir Qarabağ ermənilərinə bu məqsədlə vəsait ayırır. O cümlədən, dünyadakı erməni lobbisi sözügedən yardımların ayrılmasında fəal iştirak edir. Bu yardımlar ona görə edilir ki, Qarabağdakı ermənilər oradan getməsin. Qarabağ separatçıları isə həmin yardımları öz adından Donbas separatçılarına göndərir. Əslində bu, ABŞ maraqlarına qarşı yönəlmiş bir addımdır. Belə məlum olur ki, Vaşinqtonun Ukrayna siyasətində tutduğu mövqeyə qarşı ən böyük təxribatı ABŞ-dakı erməni lobbisi edir.
“Prinsipcə, Vaşinqton buna sərt reaksiya verməlidir”
Məsələyə münasibət bildirən Dirçəliş və Tərəqqi Partiyasının sədri Ramil Hüseynovun sözlərinə görə, prinsipcə, ABŞ erməni separatçıların digər separatçılara yardım etməsini cavabsız qoymamalıdır: “Məsələ ondadır ki, Birləşmiş Ştatlar MDB məkanında Qarabağdan fərqli olaraq, digər separatçı qurumlara münasibətdə çox sərt mövqe sərgiləyir. Təsəvvür belə etmək olmaz ki, ABŞ Abxaziyada və yaxud da Donbasda separatçılara hansısa humanitar yardım göstərsin. Əfsuslar olsun ki, Qarabağdakı separatçılara eyni münasibət sərgilənmir. Həm dövlət səviyyəsində humanitar yardım edilir, həm də digər təsisatlar vasitəsi ilə yardıma şərait yaradılır. Söhbət ondan gedir ki, uzun illərdir Birləşmiş Ştatlardakı erməni lobbisi Qarabağ ermənilərinə yardım etməkdən ötrü hər il xeyriyyə marafonu təşkil edir. Bu kampaniya zamanı milyonlarla vəsait toplanır. Qarabağdakı separatçıların iqtisadi baxımdan duruş gətirmələrində bu yardımların rolu böyükdür. Təəssüflər olsun ki, indinin özündə də bu yardımlar davam edir. Gör erməni separatçıları necə arxayındılar ki, onlara edilən yardımı digər separatçılara göndərirlər. Hansı ki, Donbasdakı separatçılar üzündən Ukrayna 15 gündür bombalanır. ABŞ Rusiyaya qarşı bütün sanksiyaları işə saldığı şəraitdə, erməni lobbisi Vaşinqtonun maraqlarına qarşı yönəlmiş addımlar atır. O baxımdan hesab edirəm ki, Vaşinqton buna sərt reaksiya verməlidir. Bu olmayacaqsa, deməli ABŞ məqsədyönlü şəkildə ikili standartlardan çıxış edir”.
Partiya sədri hesab edir ki, sözügedən məsələ daim gündəmdə saxlanmalıdır.
Vidadi ORDAHALLI
