Ukraynada əsir düşən rusiyalı zabit Qarabağ döyüşlərində iştirakını etiraf edib. Belə ki, Ukrayna silahlı qüvvələri tərəfindən əsir götürülmüş rusiyalı zabit Nikonorov Roman Aleksandroviç dindirilmə zamanı Qarabağda gedən döyüşlərdə iştirak etdiyini deyib: “Suriya Ərəb Respublikasında və Dağlıq Qarabağda döyüşlərdə iştirak etmişəm”.
Yerli KİV-in yazdığına görə, 1991-ci il təvvəlüdlü baş leytenant həmçinin Ukraynaya hərbi təlim üçün göndərildiyini düşündüyünü deyib.
“Rusiya Ermənistana sadəcə siyasi və hərbi dəstək göstərməyib, həm də hərbçilərini Azərbaycana qarşı döyüşməyə göndərib”
“Müasir İnkişaf” İctimai Birliyinin sədri, siyasi şərhçi Mübariz Göyüşlü "Bakı-Xəbər"ə şərhində bildirdi ki, rus-erməni əməkdaşlığı yeni hadisə deyil və 200 ildir onlar birgə hərəkət edirlər. Ermənilərin Qafqaza çar Rusiyası tərəfindən köçürüldüyünü xatırladan M.Göyüşlünün sözlərinə görə, onların da burada Rusiyanın hesabına səsləri çıxır. Bu baxımdan, Rusiya ordusunun hərbçilərinin Qarabağda Azərbaycana qarşı döyüşlərdə iştirak etməsində təəccüblü bir hal olmadığını deyən M.Göyüşlünün qeyd etdiyinə görə, Birinci Qarabağ müharibəsində rus ordusunun ermənilər tərəfindən döyüşdüyü faktdır. Rus əsgərlərinin İkinci Qarabağ müharibəsində iştirak etməsi faktını bu gün rus hərbçisi açıq şəkildə etiraf edib :"Erməni-rus işbirliyinin çoxdan mövcud olduğu barədə hamımızın məlumatı var. Biz Birinci Qarabağ müharibəsində bunun şahidi olmuşuq, Xocalı soyqırımında rus ordusunun iştirakı danılmaz faktdır, onların ermənilərlə birgə xalqımıza qarşı törətdikləri vəhşilikləri də unutmamışıq. Azərbaycan ərazilərinin işğal olunmasında Rusiya ordusunun, hərbçilərinin iştirakı olub. Rus əsgərləri Rusiya ordusuna məxsus hərbi geyim formalarını dəyişib erməni hərbi formasını geyinib bizə qarşı döyüşüblər. 200 ildir ki, biz erməni-rus birliyinin canlı şahidiyik".
M.Göyüşlü vurğuladı ki, Birinci Qarabağ müharibəsində olduğu kimi, İkinci Qarabağ müharibəsində də Ermənistan tərəfindən Azərbaycana qarşı bir sıra xarici ölkələrdən muzdlular döyüşüb, onların arasında, şübhəsiz, rus hərbiçiləri də olub. "Müharibədə ermənilər tərəfindən bizə qarşı terrorçular, muzdlu hərbiçilər də döyüşürdü. Ukraynada əsir götürülən Rusiya hərbçisinin Qarabağ müharibəsində döyüşdüyünü etiraf etməsi bir sıra gizlinləri üzə çıxarır. Bu fakt bir daha təsdiqləyir ki, erməni hərbi birləşmələrinin tərkibində Rusiya hərbiçiləri də olub və onlar müxtəlif kimliklər altında bizə qarşı vuruşub. Açıq görsənir ki, Rusiya hərbiçiləri çox aktiv şəkildə bu əməliyyatlarda iştirak ediblər, amma heç gözləmədikləri bir mücadilə, mübarizə, müqavimətlə rastlaşıblar, Azərbaycan Ordusunun qəhrəmanlığının şahidi olublar”.
M.Göyüşlü bildirdi ki, müharibədən əvvəl də, müharibənin gedişində də biz Rusiyanın Ermənistanı silah-sursatla, çox bahalı döyüş avadanlıqları ilə təmin etməsinin, silahlandırmasının şahidi olmuşuq: “Bu barədə müharibə dövründə çoxlu məlumatlar yayılırdı. O hərbçinin də etirafı göstərir ki, ruslar Ermənistanı yalnız silahlandırmayıb, həm də konkret olaraq hərbçilərinin müharibədə iştirakını təmin edib. Bu da sübut edir ki, ruslar həmişə Ermənistandan, ermənilərdən yana olub. Rusiya ATƏT-in Minsk Qrupunun həmsədr ölkəsi olmasına, bölgədə barışdırıcılıq missiyasını həyata keçirmə iddiasını ortaya qoymasına baxmayaraq, konkret olaraq tərəf tutub, ermənilərə arxa-dayaq olub. Rusiya Ermənistana sadəcə siyasi və hərbi dəstək göstərməyib, həm də hərbçilərini Azərbaycana qarşı döyüşməyə göndərib. Amma yenə deyirəm, bütün bu fəaliyyətlər, bu hərəkətlər Azərbaycan ordusu tərəfindən darmadağın edilib. Qalib Azərbaycan Ordusu Rusiyanın da hərbçilərinə göstərdi ki, öz torpaqlarının müdafiəsinə və onu azad etməyə qadirdir”.
İradə SARIYEVA
