Fransanın Ermənistandakı səfiri Ann Luyo erməni mətbuatına geniş müsahibə verib. Müsahibəsində bir sıra məqamlara toxunan səfir Ermənistanın Fransa üçün xüsusi önəmindən bəhs edib.
Bununla yanaşı, Fransa səfiri Minsk Qrupuna da münasibət bildirməyi unutmayıb. Səfir bəyan edib ki, Fransa ATƏT-in Minsk Qrupunun həmsədri kimi Dağlıq Qarabağ münaqişəsinin həlli istiqamətində səylərini davam etdirmək arzusundadır: “Lakin Azərbaycan Minsk Qrupunun həmsədrlərinin işinə mane olduğundan, Paris Avropa İttifaqı vasitəsilə Ermənistan-Azərbaycan dialoqunu təmin etmək üçün başqa yollar tapmağa çalışır. Fransa 2022-ci il yanvarın 1-dən Avropa İttifaqı Şurasına sədrlik edəndən bəri regionda müxtəlif təşəbbüslər həyata keçirib. Prezident Makron, Avropa İttifaqı Şurasının prezidenti Şarl Mişel Ermənistanın baş naziri Nikol Paşinyanla Azərbaycan prezidenti İlham Əliyev arasında görüş təşkil edib. Fransanın məqsədi, ilk növbədə, iki ölkə arasında dialoqu təmin etmək, eləcə də müharibədən sonra yaranmış humanitar problemlərin həllinə töhfə verməkdir. Məlum olduğu kimi, Fransanın vasitəçiliyi sayəsində 8 erməni hərbi əsir azad edilərək Fransanın hərbi təyyarəsi ilə Ermənistana qaytarılıb”.
Səfirin açıqlamasından belə məlum olur ki, Fransa Minsk Qrupunu Avropa İttifaqı ilə əvəz etmək istəyir. Görünən odur ki, rəsmi Parisin hədəfi bu istiqamətdədir.
“Avropa İttifaqının artan fəallığı o demək deyil ki...”
Məsələyə münasibət bildirən politoloq Tural İsmayılov hesab edir ki, artıq Fransa Minsk Qrupunun əvvəlki formatda fəaliyyət göstərə bilməyəcəyinin fərqindədir: “Məlum olduğu kimi, Fransa hər zaman ATƏT-in Minsk Qrupunu fəallaşdırmaq istəyib. Lakin 30 il ərzində torpaqlarımızın işğalında ədalətsiz mövqe sərgiləyən həmsədrlər regiona boş-boş səfər etmələri ilə yadda qalıblar. O üzdən, bundan sonra Minsk Qrupunun dirçəldilməsi cəhdlərinin heç bir əhəmiyyəti yoxdur. Həmsədr ölkələrdən biri olan Fransa həm 44 günlük Vətən müharibəsi dövründə, həm də müharibədən sonra birmənalı surətdə ədalətsiz mövqe tutaraq Ermənistanın işğalçılıq siyasətini dəstəkləyirdi. O üzdən, əlbəttə ki, ATƏT-in Minsk Qrupu heç bir formada Azərbaycanı razı sala bilməzdi. Eyni zamanda biz 44 günlük Vətən müharibəsi ilə torpaqlarımızı azad etmişik. Prezident İlham Əliyev və Türkiyə prezidenti Rəcəb Tayyib Ərdoğan tərəfindən irəli sürülən 3+3 platforması çərçivəsində regionda əməkdaşlığın yeni imkanları müzakirə edilir. Həmçinin, Azərbaycan-Ermənistan sərhədlərinin delimitasiyası və demarkasiyası, Zəngəzur dəhlizinin açılması gündəmdədir. Bununla bağlı da işçi qrup səviyyəsində müzakirələr aparılır. Bütün bunlarla yanaşı, Azərbaycan tərəfindən Ermənistana yönəlik sülh çağırışları ortadadır. Eyni zamanda, Rusiyanın vasitəçiliyi ilə Türkiyə və Ermənistan arasında danışıqlar prosesi davam edir. Belə bir şəraitdə Minsk Qrupunu dirçəltmək cəhdləri boş bir fiaskodur. Fransa artıq bunun mümkün olmayacağını qəbul etmək zorundadır. Çünki regionun gələcəyi ilə bağlı ortada imzalanan konkret sənədlər var. Minsk Qrupunu digər alternativlərlə əvəz etmək cəhdləri də əvvəlki formatı geri qaytara bilməyəcək. Avropa İttifaqının artan fəallığı o demək deyil ki, hər şey əvvəlki kimi olacaq. Qətiyyən belə olmayacaq. Çünki Azərbaycanın qalib tərəf kimi diqtə etdiyi şərtlər var, regionda Türkiyə fəal təmsil olunur. Bu isə tamamilə yeni reallıqların yaranması deməkdir”.
Politoloq onu da qeyd etdi ki, bütün bu reallıqları Fransa və Ermənistan qəbul etməlidir.
Vidadi ORDAHALLI
