Rusiya Prezidenti Vladimir Putin Ukrayna hərbçilərini ölkədə hakimiyyəti ələ almağa çağırıb. Bu barədə Putin Təhlükəsizlik Şurasının daimi üzvləri ilə keçirdiyi onlayn konfransda bildirib. Dövlət başçısı, həmçinin Ukrayna əsgərlərini radikalların dinc əhalidən canlı qalxan kimi istifadə etməsinə imkan verməməyə çağırıb.
Daha əvvəl Müdafiə Nazirliyi bəyan etmişdi ki, Kiyev hakimiyyəti Ukrayna paytaxtının yaşayış məntəqələrində “Qrad” qurğuları yerləşdirib. Bir gün əvvəl V.Putin Donbasda xüsusi hərbi əməliyyat keçirəcəyini açıqlayıb. O, əmin edib ki, Moskvanın planlarına Ukraynanın işğalı deyil, yalnız onun demilitarizasiyası daxildir.
Putinin Ukrayna hakimiyyətinə deyil, hərbçilərinə belə güvəni nə ilə bağlı ola bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Putinin bu çağırışlarının kökündə ciddi mətləblər dayanır: “Rusiya Ukraynaya qarşı müharibəyə başlamasını əsaslandıranda ilk olaraq Donbasdakı vəziyyəti geniş şərh edirdi. Deyirdi ki, oradakı əhalinin təhlükəsizliyini qorumaq üçün bu addımları atır. Ancaq biz gördük ki, müharibə daha geniş arealı əhatə etməyə başladı. Hücumun trayektoriyasından belə başa düşülür ki, Rusiya Ukraynanı tam ram edib, özünə tabe etdirmək istəyir. Artıq biz görürük ki, rus əsgərləri paytaxt Kiyevə də girib. Putinin bu çağırışından belə nəticə çıxara bilərik ki, Moskvanın nəzərdə tutduğu plan alınmayıb. Rusiya genişmiqyaslı hücumla həm də ölkə daxilindəki əhalini Ukrayna hakimiyyətinə qarşı qaldırmaq istəyib. Bunun nəticəsində mövcud hakimiyyətin devrilməsi, onun yerinə Rusiyaya uyğun yeni qüvvələrin gətirilməsi hədəf olub. Ancaq fərqli mənzərə yarandı. Ukrayna müqavimət göstərir, Rusiya ilə müharibə etməkdən çəkinmir. Bir sözlə, proseslər Moskvanın istəmədiyi məcrada davam edir. Müharibə uzandıqca Rusiyaya qarşı olan koalisiya da genişlənir. Bu həm iqtisadi, həm də siyasi aspektdən Rusiyaya çox ziyan vurur. Bu səbəbdən də Putin belə çağırış edir ki, bəlkə hərbçilərin əli ilə öz planını reallaşdıra bilsin. Bu, heç də Putinin Ukrayna hərbçilərinə olan sevgisindən irəli gəlmir”.
Məhəmmədəli QƏRİBLİ
