Bir neçə gün öncə Füzuli şəhərində kütləvi məzarlıq aşkarlanıb. Məzarlıq 300 metrlik ərazini əhatə edir. Məzarlıqda nə qədər insanın dəfn edildiyi məlum olmadığı kimi, onların Birinci Qrabağ müharibəsinə aid olub-olmadığı da hələ ki, məlum deyil.
Qeyd edək ki, bir müddət əvvəl isə Xocavəndin Edilli kəndində kütləvi məzarlıq aşkarlanıb. Həmin məzarlıqda 15-20 nəfərin cəsədləri dəfn edilib.
Rəsmi məlumatlara görə, bu günə qədər 3 min 890 nəfər itkin düşmüş kimi qeydiyyatdadır. 30 illik dövrdə Ermənistan tərəfindən bir çox beynəlxalq hüquq normaları kobud şəkildə pozulub. Mülki əhali girov götürülərək vəhşicəsinə öldürülüb, onların meyitləri kütləvi şəkildə dəfn edilib. Aşkar edilən meyitlərdən görünür ki, onlar xüsusi amansızlıqla öldürülüb.
Erməni vandalizminin növbəti sübutu haqqında danışan siyasi şərhçi Azər Həsrət qeyd edib ki, Qarabağ ərazisində kütləvi məzarlıqların tapılması bizi təəccübləndirmir: “Məlumdur ki, son razılaşmalara əsasən Ermənistan tərəfi kütləvi məzarlıqlarla bağlı Azərbaycana məlumat vermək öhdəliyini üzərinə götürmüşdü. Uzun müddətdir ki, Azərbaycan dünyaya bəyan edir ki, Birinci Qarabağ savaşından 4000-ə yaxın azərbaycanlı itkin düşmüş hesab edilir. Ermənilər quyular qazaraq vəhşi şəkildə öldürdükləri insanları toplu şəkildə basdırdılar. Qarabağ torpaqları işğaldan azad edildikdən sonra orada aparılan istənilən işlər zamanı qarşımıza kütləvi məzarlıqlar çıxa bilər”.
A.Həsrət bildirdi ki, ermənilərin bir yox, bir neçə dəfə azərbaycanlılara qarşı soyqırım etdiyini görürük. Qubada, Şamaxıda və Bakıda da soyqırımlar törədilib. Ermənilər üçün spesifik xüsusiyyətlərdən biri odur ki, beynəlxalq hüquq və humanitar qaydalara qəti şəkildə əməl etmirlər. Bunun da ən bariz nümunəsi, ermənilərin soyqırım aktlarından sonra geridə iz kimi qoyduğu toplu məzarlıqlar və insanlar üzərində işgəncə metodlarıdır. Adətən aşkar olunan kütləvi məzarlar erməni vandalizmini sübut edir.
Günel CƏLİLOVA
