“Əgər Rusiya KTMT-də olmasa, KTMT heç kəsin yadına düşməz”. Bunu Prezident İlham Əliyev TASS agentliyində Rusiyanın aparıcı kütləvi informasiya vasitələrinin rəhbərləri ilə görüşü zamanı Azərbaycanın KTMT-də təmsil olunması ilə bağlı sualı cavablandırarkən deyib.
Ölkə başçısının sözlərinə görə, biz bunun məqsədəuyğunluğunu və milli maraqlarımıza nə dərəcədə cavab verməsini əsas götürürük: “Fikrimcə, heç kəs üçün sirr deyil ki, Kollektiv Təhlükəsizlik Müqaviləsi Təşkilatında aparıcı rol Rusiyaya məxsusdur. Bu, yaxın vaxtlarda MDB məkanında nümayiş etdirildi və hətta Qazaxıstan hadisələrindən əvvəl də hamıya aydın idi. Rusiya Federasiyası ilə müttəfiqlik münasibətləri, habelə 43 bənddən 2-si - 6-cı və 16-cı bəndlər, - zəruri hallarda hərbi yardım göstərilməsi ilə bağlı məsələlərə birbaşa dəlalət edir. Mənim fikrimcə, bu tamamilə kifayətdir. Axı aydındır ki, KTMT-ni KTMT edən Rusiyanın orada olmasıdır. Əgər Rusiya KTMT-də olmasa, KTMT heç kəsin yadına düşməz. Hər şey bundan irəli gəlir. Rusiya ilə Azərbaycan arasında hərbi-siyasi əməkdaşlığın səviyyəsinin artırılması istiqamətində bir addım artıq atılıb. Ermənistan istisna olmaqla KTMT-nin digər üzvləri ilə bizim çox etimadlı, yaxın, dostluq münasibətlərimiz var”.
Görünən odur ki, ölkə prezidenti hazırkı dövrdə Azərbaycanın KTMT-də təmsil olunmağına ehtiyac olmamasını məqsədəuyğun sayır.
“Ölkəmizin KTMT-yə üzv olmasına ehtiyac yoxdur”
Məsələyə münasibət bildirən hərbi ekspert Ramil Məmmədli hesab edir ki, ölkə başçısının KTMT-ilə bağlı sərgilədiyi mövqe tamamilə məntiqə uyğundur: “Zatən uzun illərdir Rusiya ilə Azərbaycan arasında hərbi əməkdaşlıq mövcuddur. Azərbaycan ən müasir silah sistemlərinin böyük hissəsini Rusiyadan alır. O cümlədən, KTMT-nin digər üzvü Belarusla da hərbi sahədə əməkdaşlıq var. Azərbaycan ərazisi heç vaxt Rusiyaya qarşı təhdid mərkəzi olmayıb. Üstəlik, bu günlərdə Rusiya ilə Azərbaycan arasında müttəfiqlik Bəyannaməsi imzalanıb. Həmin bəyannamədə 2 bənd tərəflərin zəruri hallarda bir-birinə hərbi yardım göstərməsini nəzərdə tutur. Başqa bir tərəfdən, Ermənistan xaric digər KTMT ölkələri ilə də Azərbaycan çox yaxın münasibətlərə malikdir. Belə olan halda, təbii ki, Azərbaycanın KTMT-yə üzv olmasına ehtiyac yoxdur. Nəinki ehtiyac, buna heç zərurət də yoxdur. Üstəlik nəzərə almalıyıq ki, Azərbaycanla Ermənistan arasında sülh sazişi imzalanmayıb. Ermənistanın ölkəmizə yönəlik ərazi iddialarından əl çəkəcəyi də hələlik real görünmür”.
Bu baxımdan hərbi ekspert hesab edir ki, KTMT-yə üzv olmağa ehtiyac yoxdur.
Vidadi ORDAHALLI
