Müdafiə Nazirliyinin daha bir sabiq idarə rəisi həbs edilib. Bu barədə Baş Prokurorluqdan bildirilib.
Qeyd olunub ki, Müdafiə Nazirliyinin Satınalmalar və Təchizat İdarəsinin sabiq rəisi polkovnik Şirvanov Mahir Məhərrəm oğluna Hərbi Prokurorluğun İstintaq idarəsi tərəfindən Cinayət Məcəlləsinin 179.4, 341.2.1 və digər maddələrlə ittiham elan edilib və barəsində məhkəmənin qərarı ilə həbs-qətimkan tədbiri seçilib. Xatırladaq ki, M.Şirvanov Müdafiə Nazirliyinin Satınalmalar və Təchizat İdarəsinin sabiq rəisi polkovnik Qurbanov Məlikməmməd Oruc oğlundan əvvəl sözügedən vəzifədə çalışıb. M.Qurbanov da bir neçə gün əvvəl həbs olunub. Bir neçə gün əvvəl Müdafiə Nazirliyində maliyyə pozuntuları ilə bağlı Maliyyə İdarəsinin rəisi Rafael Xəlilov, “N” saylı hərbi hissənin maliyyə şöbəsinin rəisi Fəzail Əliyev, Quru Qoşunlarının maliyyə idarəsinin rəisi Bayram Bayramov və maliyyə idarəsinin zabiti Vüsal Ədalət oğlu Əlizadə həbs edilib. Ümumi zərərin 10 milyon manatdan çox olduğu bildirilir.
Son həbslərlə bağlı ekspertlər iddia edirlər ki, onlar Baş Qərargahın sabiq rəisi Nəcməddin Sadıqovun ən yaxın adamlarıdır. Həbs edilənlərin hamısı Nəcməddin Sadıqovun birbaşa dəstəyi ilə vəzifələrə təyin edilmiş şəxslərdir. Bəs Nəcməddin Sadıqova növbə nə vaxt çatacaq? Onun haqqında ölkədən çıxmamaq barədə qərar verildiyi deyilir.
Maraqlıdır, Nəcməddin Sadıqovun talançı dəstəsi həbs edilirsə, Baş Qərargahın sabiq rəhbəri azadlıqda qala bilər?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, Cinayət Prosessual Məcəllənin tələblərinə görə, aparılan istintaq hərəkətlərini qabaqlamaq olmaz: “Çünki bəzi ehtimallar artıq əsaslı şübhələr yaradır və cəmiyyətdə geniş müzakirə edilir. Bizə də imkan verir ki, bu istiqamətdə əsaslı müzakirələr aparaq. Çünki Müdafiə Nazirliyində baş verən maliyyə maxinasiyaları dövlətin müdafiə qüdrətini zəiflədən amildir. Burada hətta xəyanət əlamətlərini də görürük. Təbiidir ki, bütün bu əməllərə görə Müdafiə Nazirliyinin rəhbər işçiləri də məsuliyyət daşıyır. Çünki onlara tapşırıq verilməsə, belə adamlar himayə olunmasa belə milyonluq maxinasiyaları həyata keçirə bilməzlər. Müdafiə Nazirliyinin maliyyə işlərinə baxan dörd idarəsinin, bir şöbəsinin rəisləri milyon manatlıq mənimsəmədə ittiham olunaraq həbs olunub. Bu məbləğ istintaq zamanı 15-20 dəfə, bəlkə də daha çox arta bilər. Hər gün yeni həbslərin şahidi oluruq. İstintaqın gedişində bütün şəbəkə açıla bilər. Çünki adətən belə işlərlə bağlı tam əhatə dairəsi istintaq zamanı müəyyənləşir. Söhbət xırda məbləğlərdən getmir. Proseslərin gedişi göstərir ki, həbslərin əhatə dairəsi daha yuxarılara qədər gedib çata bilər. Nəcməddin Sadıqov həmin sistemdə çox böyük təsir gücünə malik adam olub. İstintaqın gedişində adı hallanarsa, onun da məsuliyyətə cəlb edilməsi təmin olunacaq”.
Məhəmmədəli QƏRİBLİ
