Məlum olduğu kimi, fevralın 24-ü gecəyarısı Rusiya prezidenti Vladimir Putin Ukraynanın Donbas bölgəsində genişmiqyaslı hərbi əməliyyatlara başladığını elan edib. Putin Ukraynanın şərqindəki ukraynalı əsgərləri silahları yerə qoymağa və evlərinə qayıtmağa çağırıb. Onun hücum əmrindən dərhal sonra sərhəddə toplanmış hərbi qüvvələr qanadlı və ballistik raketlərlə Ukraynaya nöqtəli zərbələr endirməyə başlayıblar. Daha sonra quru qoşunları müxtəlif istiqamətlərdən hücuma keçib.
Heyrət doğuran məqam odur ki, Qərb Ukraynanı Rusiya kimi böyük dövlətlə təkbətək qoyub. Başda ABŞ olmaqla, Qərbin aparıcı dövlətləri utanmadan bəyan edirlər ki, biz Ukraynanın yerinə döyüşə bilmərik. Ukrayna prezidenti Volodimir Zelenskinin çağırışlarına rəğmən, Qərb dövlətləri hərbi iştirakdan imtina edirlər. ABŞ prezidenti Cozef Bayden bəyan edib ki, onlar Rusiya ilə döyüşməyəcəklər: “Mən bir daha təkrar edirəm ki, ABŞ əsgərləri Ukraynada Rusiya qoşunları ilə vuruşmayacaq. Bizim hərbi qüvvələrimiz Avropaya Ukraynada döyüşmək üçün deyil, NATO müttəfiqlərini qorumaq və şərq cinahdakı müttəfiqlərimizi dəstəkləmək üçün göndərilib”.
Avropanın aparıcı dövlətləri olan Almaniya ilə Fransa Ukraynaya silah satmaqdan belə imtina edir. Bəyan edirlər ki, guya bu, həmin dövlətlərin Rusiya ilə münasibətlərinə mənfi təsir edəcək.
Bir sözlə, Baydenin timsalında Qərbin riyakarlığı üzündən Ukrayna hərbi poliqona çevrilərək məhv olur.
“Məhz onun səriştəsizliyi və qətiyyətsizliyi Ukraynanı fəlakətə sürüklədi”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Baydenin qətiyyətsizliyi, iradəsizliyi üzündən Ukraynada bu fəlakətlər yaşanır: “Əslində ABŞ-ın əsas məqsədi Rusiyanı öz istəyinə uyğun dizayn etməkdir. Təəssüflər olsun ki, bunu Ukrayna üzərindən həyata keçirir. Nəticədə Ukrayna xalqını rus ayısına yem edir. Məqsəd Rusiyanı zəiflətmək üçün bütün Avropanı, dünyanı onun üzərinə qaldırmaq, Avropanı onun enerji resursları asılılığından azad etmək və həm onun yerini tutmaq, həm də, təbii ki, əsas maliyyə qaynağından məhrum etməkdir. Zaman göstərdi ki, demokratiyanın beşiyi dediyimiz Qərb öz maraqları naminə istənilən ölkələri və xalqları qurban durumuna sala bilir. İndi qardaş Ukrayna xalqı həmin durumdadır. Bütün bu qırğınlara görə Putin qədər Bayden də məsuliyyət daşıyır. Məhz onun səriştəsizliyi, qətiyətsizliyi Ukraynanı fəlakətə sürüklədi. ABŞ-ın yaradılışına baxsaq görərik ki, ilk vaxtlar kantonlar yaradıldı. Daha sonra yerli əhalini qanına qəltan etdilər. Bu həmin Birləşmiş Ştatlardır ki, Xirasimoda, Vyetnamda, İraqda insanları kütləvi şəkildə öldürdü. Bu ölkənin mahiyyəti işğalçılıq üzərində qurulub. Rusiyanın da siyasəti işğalçılıq üzərində qurulub. Bayden məlum mövqeyi ilə hadisələrə çox vicdansızcasına yanaşır. Almaniya ilə Fransa isə hər zaman Rusiyaya yarınmağa çalışıb. O üzdən, bütün dəyərlərə tüpürərək silah yardımından belə imtina edirlər”.
Bu baxımdan partiya sədri hesab edir ki, Ukrayna müharibəsi Qərbin iç üzünü bir daha ortaya qoydu.
Vidadi ORDAHALLI
