“...İkinci Qarabağ müharibəsindən sonra işğaldan azad etdiyimiz ərazilərdə 1700-dən çox həlak olmuş erməni hərbi qulluqçusu bizim tərəfimizdən tapılıb və biz onların hamısını qaytarmışıq. Birinci Qarabağ müharibəsi dövründən 3890 azərbaycanlı, o cümlədən təqribən 200 uşaq indiyədək itkin düşmüş hesab edilir. Biz erməni tərəfinə kütləvi məzarlıqların yerini göstərmələri barədə müraciət etmişik, lakin hələ cavab yoxdur. Mən bilmirəm niyə. Yəqin onlar başa düşürlər ki, orada, sadəcə, hərbi cinayətlərin sübutları olacaq. Lakin bununla belə biz tələb edirik və yeri gəlmişkən, Avropa İttifaqı da bu məsələ ilə bağlı fikrini bildirib ki, kütləvi məzarlıqların yeri bizə təqdim edilsin. Çünki ehtimal çox böyükdür ki, hər şey Qarabağdadır, bizim işğaldan azad etdiyimiz ərazilərdədir...”
Bu sözləri Prezident İlham Əliyev Rusiya Federasiyasına rəsmi səfəri çərçivəsində fevralın 23-də TASS agentliyində bu ölkənin aparıcı kütləvi informasiya vasitələrinin rəhbərləri ilə görüşdə deyib.
Prezident İlham Əliyevin Moskvada Rusiyanın aparıcı KİV nümayəndələri ilə söhbətində Ermənistanın hələ də bizə kütləvi məzarlıqların yerini deməməsini, Birinci Qarabağ müharibəsində itkin düşən vətəndaşlarımızın taleyi barədə məlumat verməməsini qabartması çox mühüm bir məsələdədir. Prezident bunu Rusiyada qaldırmaqla, əslində bir güclü gediş etdi ki, Rusiyanın hakimiyyət orqanları da, Rusiyanın mediası da bu istiqamətdə Ermənistana təzyiqlər göstərsinlər. Kütləvi məzarlıqlarla və indiyə qədər Birinci Qarabağ müharibəsində itkin düşənlərlə bağlı Ermənistanın cinayətkar siyasətinin mahiyyətini göstərib.
“…Bütün dünya həmin media təmsilçilərinin yaydığı informasiyaya inanır və istinad edir”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, Azərbaycan prezidentinin Rusiyanın paytaxtında nəinki Rusiyada, eləcə də bütün dünyada tanınmış nüfuzlu media nümayəndələri, media rəhbərləri ilə görüşdə məhz bu məsələni vurğulamasının çox böyük əhəmiyyəti var: “Prezidentin Ermənistanın cinayətkar siyasəti ilə bağlı nəinki Rusiyada, eləcə də bütün dünyada böyük nüfuza malik olan rusiyalı media təmsilçilərinə açıqlama verməsi çox mühüm əhəmiyyətə malikdir. Bunun ən böyük əhəmiyyəti odur ki, bütün dünya həmin media təmsilçilərinin yaydığı informasiyaya inanır və istinad edir. Onu da deyim ki, o adamların hamısı Rusiya prezidentinin mətbuat pultuna aid olan mətbuat rəhbərləridir. Bu görüşdə Ermənistanın azərbaycanlılara aid kütləvi məzarlıqların yerini hələ Azərbaycana deməməsi, itkin düşənlərimizin taleyi ilə bağlı məlumat verməməsi kimi mühüm məsələnin qabardılması nəticəsiz qalmayacaq. Əlbəttə, Prezident bu fikirləri söyləməklə Ermənistanın illərdir öz üzərinə götürdüyü öhtəliklərdən yayındığını, onun etibarsız bir ölkə olduğunu bəyan etmiş oldu. Prezident orada digər məsələlər barədə danışdı. Bütün bunlar ondan irəli gəlir ki, görüşdə iştirak edən media rəhbərlərinin rəhbərlik etdikləri informasiya vasitələrində və üzv olduğu Prezident pultunda bu məsələlər qaldırılsın, yazılsın, təbliğ olunsun. Əlbəttə, bütün bunlar onunla nəticələnməlidir ki, həmin media kapitanları öz rəhbərlik etdikləri media subyektlərində Ermənistanın cinayətkar mahiyyətini açsınlar. Həmin media orqanlarında Ermənistnın öz üzərinə götürdüyü öhdəlikləri yerinə yetirməməsi, kütləvi məzarlıqların yerinin Azərbaycana bildirilməməsi kimi məsələlər işıqlandırılsın. Prezidentin dünyanın nüfuzlu rusiyalı media kapitanlarına bu barədə ətraflı məlumat verməsi bir daha Ermənistanın cinayətkar siyasətini ifşa etdi”.
Ş.Ağayev qeyd etdi ki, Rusiya mətbuatının bu mövzuda yazması bütün dünyaya bir mesaj olar və Rusiya cəmiyyəti də Ermənistanın antiinsani mahiyyətini ortaya çıxarar. “Ermənistanın bu antiinsani, antihumanist davranışlarının dünya ictimaiyyətinə çatdırılmasında onların rəhbərlik etdiyi media qurumların çox böyük rolu ola bilər. Bu faktların Rusiya cəmiyyətinə çatdırılmasında da onlar çox iş görə bilərlər. O media orqanları da dünyaya sübut edə bilər ki, Azərbaycan üzərinə düşən öhdəlikləri yerinə yetirdi halda Ermənistan həmişə müxtəlif bəhanələrlə yayınır. Heş şübhəsiz, onların rəhbərlik etdiyi media orqanları Ermənistana ciddi təzyiq göstərib bu ölkədən azərbaycanlıların basdırıldığı kütləvi məzarlıqların yerini deməsini, itkin düşənlərin taleyi barədə məlumat verməsini tələb edə bilər. Ermənistan 30 ildir ki, məsuliyyətdən yayınır. Rusiyanın həmin nüfuzlu media qurumlarına rəhbərlik edən şəxslərin imkanları var ki, Ermənistana bu barədə sorğu göndərib ondan cavab ala bilsinlər”- deyə Ş.Ağayev qeyd etdi.
İradə SARIYEVA
