Rusiyanın Ukraynaya hucumu bütün dünyanı narahat edir. Rusiyanın özündə də bu ölkə ordusunun Ukraynaya daxil olması kəskin etirazla qarşılanır.
Fevralın 24-dən, yəni müharibə rəsmən başlayan andan etibarən Rusiyanın paytaxtı Moskvada, Sankt-Peterburqda və başqa iri şəhərlərində müharibə əleyhinə kütləvi mitinqlər başlayıb. Dünən yayılan məlumata görə, təkcə Moskvada mitinq zamanı 600 nəfərdən artıq aksiya iştirakçısı saxlanıb. Onlar antimüharibə, anti-Putin bəyanatları səsləndirir, Putindən Rusiya qoşunlarını Ukraynadan çıxarmağı tələb edirlər. Türkiyə mətbuatının yaydığı məlumata görə, Rusiyanın 53 şəhərində bu cür etiraz mitinqləri keçirilir. Bir sözlə, Rusiyada rus xalqı müharibəyə "yox" deyir, ukraynalılara həmrəylik nümayiş etdirir. Deyərdik ki, hazırda Ukraynaya ən çox dəstəyi ruslar verir. Putin hökuməti əhalini meydanlardan dağıda bilmir, nə həbslər, nə də zorakılıq meydanlara axışan rusların qarşısını kəsə bilir. Eyni zamanda da Rusiyanın 200-dən artıq görkəmli elm, təhsil, mədəniyyət xadimi, jurnalistlər Putinə etiraz məktubu göndərərək, onu müharibəni dayandırmağa, Rusiya qoşunlarını Ukraynadan çıxarmağa çağırıblar. Bildiriblər ki, Avropada əsası qoyulan böyük və qanlı müharibənin məsuliyyətini Rusiya daşıyacaq.
Qeyd edək ki, Ukrayna prezidenti Zelenski yenidən rusiyalılara müraciət edib, bildirib ki, mübarizə aparın və Ukrayna Rusiyada müharibəyə etiraz edən vətəndaşları görür. "Rusiyanın etiraza çıxan bütün vətəndaşlarına demək istəyirəm ki, sizi görürük. Bu o deməkdir ki, siz bizi eşitdiniz, bizə inanmağa başlamısınız. Bizim üçün müharibənin əleyhinə mübarizə aparın”.
“Açıq görsənən odur ki, Putinin bu addımından rus xalqı narazıdır”
“Müasir İnkişaf” İctimai Birliyinin sədri, siyasi şərhçi Mübariz Göyüşlü bizimlə söhbətində bildirdi ki, bu gün rusların kütləvi etiraz aksiyaları keçirib müharibəyə açıq etiraz etməsi çox müsbət haldır. “Bu onu göstərir ki, Rusiyanın Ukraynaya hərbi təcavüzü nəinki Ukraynada və başqa qonşu ölkələrdə, eləcə də Rusiyada narazılıqla qarşılanır. Açıq görsənən odur ki, Putinin bu addımından rus xalqı narazıdır. Rusiyanın ayrı-ayrı şəhərlərində müharibəyə qarşı etiraz mitinqləri keçirən insanlar demək istəyirlər ki, bu, rus xalqının yox, Putinin müharibəsidir. Ruslar da anlayır ki, Putinin yürütdüyü bu aqressiv siyasət rus xalqının da, Rusiya dövlətinin də ziyanınadır. Putin bu hərbi təcavüzü sırf öz siyasi ambisyalarını gerçəkləşdirmək üçün həyata keçirir. Halbuki, Ukrayna dövlətindən, Ukrayna xalqından Rusiyaya heç bir təhlükə yoxdur. Bu ağlasığmazdır ki, sən “NATO-ya üzv olma, NATO-ya üzv olsan mən sənə qarşı müharibəyə başlayacağam” şərtini qoyasan, sonra da təcavüzə başlayasan. Hansı təşkilata üzv olmaq hər bir dövlətin özünün seçimidir, istəsə NATO-ya daxil olar, istəsə də olmaz. Bu mənada sadə ruslar da bu həqiqəti dərk edirlər və bu səbəbdən də etiraz edirlər. Ukraynaya hərbi təcavüz Putin erasının sonunu da gətirə bilər. Rusların etiraz aksiyaları daha da genişlənərsə Putin hakimiyyəti üçün çox ciddi baş ağrısına da çevrilə bilər. Bir müddət əvvəl Rusiyada müxalifət liderinin saxlanmasına görə də çox geniş aksiyalar başlamışdı, bu aksiya bütün Rusiya haklimiyyətini silkələdi. Bu müharibə də həmin aksiyaların təkrarlanması və Putinin çox ciddi problem yaratması ilə nəticələnə bilər. Hesab edirəm ki, müharibədə rus əsgərlərinin ölümü rus aiələləri, rus anaları üçün çox ciddi narahatlıq yaradır, hiddət doğurur. Onlar Ukraynada öz oğullarının ölməsini istəmirlər. Rus xalqı Putinin avantüralarından artıq bezib. Necə ki, qonşu ölkələr, o cümlədən Azərbaycan da, Ukrayna da əziyyət çəkir, elə rus xalqının özü də Putinin davranışlarından əziyyət çəkir. Bu etiraz mitinqləri təkcə Ukraynanı dəstəkləmək, müharibə əleyhinə çıxmaq deyil, bütövlükdə Putinin siyasətinə qarşı çıxmaqdır, etiraz etməkdir. Bu mitinqlər təkcə müharibəyə, Ukraynaya hərbi təcavüzə deyil, həm də Putinə “yox” deməkdir”.
M.Göyüşlü hesab edir ki, rus xalqının ayağa qalxıb mitinqlər keçirməsi həm də Putinə xəbərdarlıqdır. Siyasi şərhçinin fikrincə, Putin bu hadisələrdən özü üçün nəticə çıxarmağa tələsməlidir və bu hərbi aqressiyanı, aqressiv tonla danışmağı dayandırmalıdır, normal qonşuluq münasibətlərinə keçməlidir. O qeyd edir ki, Rusiya öz daxilindəki problmləri qoyub qonşuların, eləcə də başqa ölkələrin işlərinə qarışmağa son qoymalıdır.
İradə SARIYEVA
