Rus ordusunun Ukraynaya daxil olmasını əks etdirən çoxsaylı fotolar və videolar yayılıb. Teleqram kanallarında və digər platformalarda yayilan fotolarda, video görüntülərdə açıq görsənir ki, Ukraynaya daxil olan Rusiya tanklarının bəzilərinin üzərinə SSRİ bayrağı taxılıb.
Bu arada ABŞ prezidenti Co Bayden açıqlama verib ki, Putinin məqsədi SSRİ-ni bərpa etməkdir.
Rusiya ordusuna məxsus bəzi tankların üzərində SSRİ bayrağının əks olunması hansı anlamı daşıyır? Niyə məhz SSRİ bayrağı?
"Məqsəd SSRİ-yə nostalji hisslər bəsləyən insanlara təsir etməkdir"
AVCİYA-nın vitse-prezidenti, siyasi şərhçi, professor Məhərrəm Zülfüqarli "Bakı-Xəbər"ə bildirdi ki, Putinin çıxış və bəyanatlarında Sovet imperiyasını bərpa etmək niyyəti açıq-aydın görünür. Professor Zülfüqarlı hesab edir ki, Putin qondarma LXR və DXR-nin "müstəqilliyinin" tanınması ilə bağlı fərman imzalamaqla və xalqa müraciətində SSRİ-ni quran Lenini və Stalini tənqid etməklə niyyətini bir daha ortaya qoydu: "Putinin SSRİ-ni bərpa etmək niyyəti bütün çılpaqlığı ilə ortadadır. Ukrayna ərazisinə daxil olan rus tanklarının bəzilərinin üstündə SSRİ bayrağının əks olunmasının səbəblərinə gəlincə, bunun bir neçə səbəbi var. Səbəblərdən biri də Ukraynada SSRİ-yə nostalji hisslər bəsləyən insanlara təsir etməkdir. Mənə belə gəlir ki, Putin çar Rusiyasının davamı olan SSRİ imperiyasının tərəfdarı kimi çıxış edir. Lenini qınayır ki, nəyə görə millətlərə öz müqəddaratını təyin etmək hüququ verdi, respublikalar yarandı. Hesab edirəm, Putun açıb Rusiya tarixini yenidən oxumalıdır ki, baxıb görsün Rusiya imperiyası necə yaranıb. Başqa xalqların, dövlətlərin torpaqlarını işğal etmək hesabına imperiya yaranmışdısa, bu mütləq dağılmalıdır. Çünki dünyada xalqların öz müqəddəratını təyin etmək hüququ var. Beynəlxalq hüquqda da, BMT çərçivəsində də bu hüquq tanınıb. Rusiya BMT-yə indiki sərhədlər çərçivəsində daxil olub. Lakin bilmirsiz ki, Putinin rəhbərlik etdiyi Rusiya dövlətinin məqsədi keçmiş sovet məkanında qaynar nöqtələr yaratmaq, hansısa xalqların öz "müqəddəratını təyin etməsinə" açıq və dolayısı ilə dəstək verməkdir".
M.Zülfüqarlının sözlərinə görə, Putin yürütdüyü qeyri-müəyyən və dolaşıq siyasətlə Rusiyanın özünün ağır imtahanla üzləşməsinə şərait yaradır. Putinin keçmiş ittifaq ölkələrində qarışıqlıq yaratmaqla beynəlxalq hüquqa zidd mövqe sərgilədiyini deyən M.Zülfüqarlının fikrincə, Rusiyanın daxilində yaşayan azsaylı xalqlara azadlıq, öz müqəddəratını təyin etmək hüququ verilmir, amma Putun hər kəsin işinə qarışmaq istəyir: "Putinə sual olunur ki, abxazların, osetinlərin, Donbasda, Luqanskda yaşayan azsaylı xalqların hüququnu tanıyırsansa, onda bəs çeçenlərin, tatarların və öz daxilindəki başqa xalqların hüquqlarını niyə tanımırsan? Yəni bu Putin o qədər dolaşıq siyasət yeridir ki, bunlar da bir-birini təkzib edən məsələləri ortaya çıxarır. Bu gün nə etmək istədiyini heç Putinin özü də bilmir. Mənə elə gəlir ki, Putinin etdiyi bütün hərəkətlər Rusiyanın iflasına rəvac verən siyasətdir. XXI əsrdir və Putinin nəyəsə zorla nail olması mümkün deyil. Müxtəlif bəhanələrlə Ukrayna kimi bir ölkəyə hucum etmək çox yanlışdır. Rusiya ordusunun Ukraynaya tankların üzərinə SSRİ bayrağı taxıb daxil olması Putinin imperiyanı bərpa etmək niyyətlərindən irəli gəlir. Putin Ukraynanı parçalamaq istəyir".
M.Zülfüqarlı hesab edir ki, Putin Ukraynanı dağıtmaq istəyir: "Bilirsiz ki, Putin son çıxışlarında da Ukrayna haqqında kifayət qədər qeyri-obyektiv fikirlər bildirib. Ukraynanın SSRİ dövründə Lenin tərəfindən yaradıldığını, Xruşşovun vaxtında bəzi ərazulərin bu ölkəyə verildiyini deyir. Bunun nə demək olduğunu təsəvvür edirsiz? Putin Ukraynaya SSRİ-nin "əsəri" kimi baxır, özü də demişdi ki, Ukraynanın "memarı" Lenindir. Ukrayna kimi dövlətə bu cür yanaşılması qəbuledilməzdir. Belə rəy yarana bilər ki, Ukraynaya daxil olan tankların üzərinə SSRİ bayrağı sancmaqla Putin SSRİ imperiyasını bərpa etməyə Ukraynadan başlamaq istəyir. Yəni SSRİ bayrağının "dirildilməsinə" müxtəlif cür yanaşmaq olar, başlıcası isə bu, imperiyanın özünü "diriltmək" ideyasına qulluq edir".
M.Zülfüqarlı hesab edir ki, iki slavyan ölkəsi arasında müharibənin başlaması Qərb ölkələrinin də marağındadır. Professor deyir ki, bu özünü Qərb dövlətlətinin mövqeyində də göstərdi.
İradə SARIYEVA
