Avropa qurumları ATƏT-in Minsk Qrupunun fəaliyyətə başlaması ilə bağlı çağırışlardan sonra indi də erməni diversantları məsələsini qabardırlar. Ard-arda bəyan edirlər ki, diversantlar qeyd-şərtsiz azad edilməlidir.
Bu arada AVRONEST Parlament Assambleyasının həmsədri Andrius Kubilius erməni mediasına müsahibəsində bəyan edib ki, Azərbaycan tərəfinin regionda sülh və sabitlik barədə bəyanatları səmimi arzudursa, o zaman hərbi əsirlərin azad edilməsini təmin etməlidir: “Təbii ki, kimin etməsindən asılı olmayaraq, insan haqlarının pozulması bizi narahat edir. Bu hər zaman bizi narahat edir. Sabitlik və sülh yaratmaq üçün ilk növbədə qonşular arasında etimad qarşılıqlı olmalıdır. Məncə, bu böyük səhvdir. Mən Azərbaycan parlamentinin deputatlarından eşitdim ki, onlar regionda sülh və sabitlik naminə çalışmaq istəyirlər. Əgər bu həqiqətən də Azərbaycan tərəfinin səmimi istəyidirsə, o zaman problemi dərhal həll etməlidirlər”.
Aİ-Ermənistan Parlament Əməkdaşlıq Komitəsinin həmsədri Marina Kaljuran da bənzər fikirlərlə çıxış edib. Onun sözlərinə görə, hərbi əsirlərin həyatı sövdələşmə obyekti ola bilməz: “Biz Azərbaycanda həbsdə olan hərbi əsirlərin, Ermənistan vətəndaşlarının geri qaytarılmasının vacibliyini vurğuladıq. Son vətəndaş Ermənistana qaytarılana qədər bunu təkrar edəcəyik”.
Məlum olduğu kimi, AVRONEST Parlament Assambleyası iclasında iştirak edən Milli Məclisin deputatları Tahir Mirkişili və Soltan Məmmədov İrəvanda səfərdə olublar. Təəccüb doğuran məqam odur ki, bütün bunlar adıçəkilən deputatların məlum tədbirdə iştirak etməsi fonunda baş verir. Avropa qurumlarının qərəzli olması yeni deyil. O zaman Ermənistanda səfərdə olan 2 deputatımız nə iş görüb?
“Bütün bunlar Avropa qurumlarının Azərbaycana münasibətdə sərgilədikləri ənənəvi qərəzli münasibətin davamıdır”
Məsələyə münasibət bildirən AMİP sədrinin müavini Afsəddin Nəbiyev hesab edir ki, bütün bunlar Avropa qurumlarının Azərbaycana münasibətdə sərgilədikləri ənənəvi qərəzli münasibətin davamıdır: “AVRONEST Parlament Assambleyasının həmsədri Andrius Kubilius Birinci Qarabağ müharibəsi dövründə ermənilər tərəfindən əsir, girov götürülmüş, itkin düşmüş dörd minə yaxın Azərbaycan vətəndaşının taleyi haqqında bir dəfə də olsun narahatlıq ifadə etməyib. Avropalı siyasətçilərin Azərbaycana qarşı qərəzli yanaşmaları ikili standartların bariz nümunəsidir. Azərbaycanın beynəlxalq hüquq tərəfindən tanınmış ərazilərində hərbi cinayətlər törətmiş ermənilərin cinayətkarlar deyil, hərbi əsirlər adlandırılması bu siyasətçilərin riyakarlığını ifadə edən ən tutarlı faktdır. Bu gün biz erməni mətbuatını yaxından izləyirik. Görürük ki, bu xalq hələ 44 günlük müharibədən doğru-düzgün nəticə çıxarmaq istəmir. Qarabağda yerləşən qondarma qurumun ətrafında olan qeyri-qanuni erməni silahlı hərbi birləşmələrini özünümüdafiə qüvvələri adlandırmaqla, sülhün təmin olunmasına ağır zərbə vururlar. Bu gün dünyanın əksər dövlətləri etnik separatçılıqdan, terrordan əziyyət çəkir. Nədənsə, Avropa dövlətlərini təmsil edən siyasətçilər bu mövzunu kənara qoyub bir ovuc erməninin yalançı uydurma fikirlərini səsləndirməklə məşğuldurlar. Şəxsən mən o konfransda onlara belə bir sual ünvanlayardım: Avropa dövlətlərinin hər hansı birində silahlı bir şəxs etnik separatçılıq zəminində dinc əhalini öldürdüyü halda onu nə edərdilər? Açıb buraxardılar ki, bu hərbi əsirdir? Bax, əslində onlara veriləcək ən tutarlı suallar bu olmalıdır. Bunların dediyi hərbi əsirlər Azərbaycan ərazisində dinc əhalimizə təhlükə törədən erməni silahlılarıdlr. Bunları hərbi əsir adlandırmaq və Ermənistana təhvil verilməsini tələb etmək siyasətçiyə uyğun olmayan hərəkətdir. Digər tərəfdən, görünür həm də tədbirdə iştirak edən bizim deputatların passivliyi üzündən bunlar baş verir. Deputatlarımız yetərincə fəal olsaydılar, bəlkə də belə ədalətsiz çağırışlar səslənməzdi”.
Bu baxımdan sədr müavini hesab edir ki, beynəlxalq müstəvidə fəal olmaq lazımdır.
Vidadi ORDAHALLI
