“Bu gün başqa dövlətlərin rəhbərləri ilə nə qədər söhbət etmişəmsə də, bir neçə şey eşitmişəm. Birincisi, bizə dəstək verilir. Mən Ukraynaya xüsusi yardım edən hər bir dövlətə minnətdaram. Yalnız sözlərlə deyil. Amma ikinci bir şey də var - dövlətimizin müdafiəsində tək qalmışıq. Kim bizimlə döyüşməyə hazırdır? Mən bunları görmürəm. Ukraynaya NATO-ya daxil olmaq üçün kim zəmanət verməyə hazırdır? Hamı qorxur”.
Bunları Ukrayna prezidenti Volodimir Zelenski xalqa müraciətində deyib.
Ukrayna lideri Rusiyanın danışıq təkliflərinə də toxunub: “Bu gün Moskvadan eşitdik ki, onlar hələ də danışmaq istəyirlər. Onlar Ukraynanın neytral statusundan danışmaq istəyirlər.
Mən dövlətimizin bütün tərəfdaşlarına deyirəm: indi ölkəmizin taleyi həll olunur. Onlardan soruşuram: bizimləsiniz? Onlar buna bizimlə olmaları ilə cavab verirlər. Amma bizi də özləri ilə Alyansa aparmağa hazır deyillər. Mən Avropanın iyirmi yeddi dövlətinin liderindən Ukraynanın NATO-da olub-olmadığını soruşdum. Birbaşa soruşdum. Onların hamısı qorxur. Amma biz qorxmuruq. Bəs biz hansı təhlükəsizlik zəmanətlərinə malik olacağıq? Onu hansı ölkələr verəcək?”
Ukrayna lideri vurğulayıb ki, bu işğalın sonu haqqında danışmaq lazımdır: “Alovun dayandırılması haqqında danışmaq lazımdır.
Amma indi ölkənin taleyi bütünlüklə ordumuzdan, təhlükəsizlik qüvvələrimizdən, bütün müdafiəçilərimizdən asılıdır. Xalqımız, sizin müdrikliyinizdən asılıdır”.
Zelenski bu çıxışı ilə ABŞ və Qərbin “qırdı-qaçdı” siyasətini tam ifşa etmiş oldumu?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Ukraynada baş verənləri böyük narahatlıqla izləyirlər: “Zelenskinin sözləri bir daha təsdiq etdi ki, Rusiyanın təcavüzünə qarşı Ukrayna tək qalıb. ABŞ da daxil olmaqla, Qərb başqasının taleyinə vicdansızca laqeyd qalmağın bariz nümunəsini göstərir. Bəli, Ukraynanın bu günə düşməsində, aldadılmasında ABŞ-ın xüsusi rolunu qeyd etmək lazımdır.
ABŞ Rusiyanı Ukrayna xalqının canı-qanı bahasına dizayn etmək istəyir. Əzilən, ərazisi itirilən, hərtərəfli dağıntıya məruz qalan Ukraynadır, bundan dividend uman və qazanan isə ABŞ-dır. Rusiyanın bu cinayətkar təcavüzündən istifadə edən ABŞ və Qərb həm Rusiyanın iqtisadi bazarını ələ keçirəcək, həm də diğər ölkələrin köməyilə onu iqtisadi baxımdan zəiflədəcək. Sonda lazım gəlsə, Rusiya ilə gizi razılaşmalara gedəcək.
Azərbaycanda da bir sıra Qərb əlaltıları öz yiyələrinə güvənib populist təkliflər söyləyirlər. İndi vəziyyətdən nəticə çıxarsınlar.
Biz bütün hallarda Rusiyanın Ukraynaya təcavüzünü pisləyirik, eyni zamanda Qərbin ikiüzlülüyünü və etibarsızlığını da xüsusi qeyd edirik”.
Məhəmmədəli QƏRİBLİ
