Dövlət gerbləri hər hansı bir dövlətin tarixi və fəlsəfi mahiyyətini əks etdirən dövlətçilik rəmzlərindən biri olan miras tərəfindən ötürülən fərqli bir işarədir. Qeyd etdiyimiz kimi, hər bir dövlətin gerbində, bayrağında o ölkəyə məxsus işarə qeyd olunur.
Qondarma "Donetsk Xalq Respublikası"nın bayrağının üzərində ikibaşlı qartal rəsmi var. Məlumat üçün bildirək ki, Rusiya Federasiyasının dövlət gerbində də ikibaşlı qartal işarəsi var.
Qeyd edək ki, ikibaşlı qartal Avrasiyada bir çox fərqli mədəniyyətin qəbul etdiyi tarixi bir simvoldur. Bu gün Albaniya, Monteneqro və Serbiya dövlətlərinin rəsmi bayrağında və bir çox ölkələrdə bəzi şəhərlərin və bəzi təşkilatların emblem və gerblərində hələ də ikibaşlı qartal motivi mövcuddur.
Maraqlıdır, separatçı Donetsk “Xalq Respublikası”nın bayrağında olan ikibaşlı qartalın Rusiyanın dövlət gerbindəkinin təkrarı olması nə məna verir?
“…bayrağın üzərində ikibaşlı qartal işarəsinin olmasının yeganə anlamı onların Rusiyaya bağlı olmasıdır”
AMEA-nın Fəsələfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, Rusiya Federasiyasının dəstəyi ilə yaradılan qondarma rejimlər özlərini həmin ölkəyə bağlamaq üçün bu kimi elementlərdən istifadə edir: “Danılmaz faktdır ki, həmin qondarma rejimlər varlıqlarını Rusiyaya borcludurlar. Rusiya istənilən anda onları ləğv edə və ya özünə birləşdirə bilər. Donetsk “Xalq Respublikası”nın bayrağının üzərində ikibaşlı qartal işarəsinin olmasının yeganə anlamı onların Rusiyaya bağlı olmasıdır. Məlumat üçün bildirim ki, ikibaşlı qartal türk dövlətlərinə məxsusdur. Bu işarə Səlcuq və bir çox dövlətlərində olub”.
Həmsöhbətimizin sözlərinə görə, Donetskin varlığı Rusiyadan asılıdır. Bu kimi dövlətlərin bayraq və ya gerbində hansısa işarənin olması elə də önəmli deyil: “Ukraynanın suverenliyinin pozulması şəraitində bu kimi halların baş verməsi, Rusiyayönümlü qondarma rejimlərin sayının artması ancaq təəssüf doğurur. Nəzərə almaq lazımdır ki, həmin rejimlərin ömrü heç də uzun olmayacaq”.
Günel CƏLİLOVA
