Ermənistanın sabiq prezidentləri Köçəryan Robert Sedrakoviç və Sarkisyan Serj Azatoviç Cinayət Məcəlləsinin müvafiq maddələri ilə cinayət məsuliyyətinə cəlb edilib və axtarışa veriliblər. Bunu Respublika Hərbi Prokurorluğunun Xüsusi istintaq şöbəsinin rəisi, baş ədliyyə müşaviri Emil Tağıyev deyib.
O bildirib ki, adıçəkilən şəxslər 1988-ci ilin fevral ayından etibarən Azərbaycan və erməni xalqları arasında milli düşmənçilik salmaq, nifrət oyatmaq niyyəti ilə şəhərin təşkilat və müəssisələrində erməni millətindən olan işçiləri yığıb iclaslar keçiriblər: “Onlar Qarabağın ermənilərə məxsus olduğunu və orada yalnız ermənilərin yaşamalı olduğunu, azərbaycanlıları işdən qovmağı, şəhərdən və Dağlıq Qarabağdan zorla köçürməyi, evlərini yandırmağı təbliğ etdiklərinə, özbaşına olaraq özlərinə dövlət hakimiyyəti nümayəndələrinin adını verərək, Azərbaycan Respublikasının Konstitusiyasına zidd olaraq 02 sentyabr 1991-ci il tarixdə keçmiş Şaumyan rayonu da birləşdirilməklə, “Dağlıq Qarabağ Respublikası”nın elan olunması, bütün hakimiyyətin vilayət xalq deputatları sovetliyinə və onun icraiyyə komitəsinə verilməsi, həmin ərazidə Azərbaycan Respublikası Konstitusiyasının və Qanunlarının qüvvədən düşməsi barədə qanunsuz qərar qəbul etdiklərinə və digər cinayətlər törətdiklərinə görə Cinayət Məcəlləsinin müvafiq maddələri ilə cinayət məsuliyyətinə cəlb edilib və axtarışa veriliblər”.
Bəllidir ki, axtarışa verilən hər iki şəxs Qarabağa səfərlər edir. Bundan sonra belə səfərlər reallaşarsa, Rusiya sülhməramlıları onları saxlaya bilərmi?
Politoloq Elşən Mustafayev “Bakı-Xəbər”ə bildirdi ki, son günlər Ermənistan hakimiyyəti Azərbaycanla sülh anlaşması imzalamağa hazırlığını elan etsə də, rəsmi İrəvanın sərgilədiyi siyasət bunun əksini deyir:
“Ermənistan parlamentinin iclasına “Şuşa Bəyannaməsi”nin müzakirəsini daxil etməsi də Nikol Paşinyan hakimiyyətinin dedikləri ilə əməllərinin uzlaşmadığını növbəti dəfə təsdiqləyir. Bundan əlavə, Rusiya sülhməramlılarının kölgəsində gizlənmiş Qarabağdakı qondarma qurumun davranışları Azərbaycanı sərt tədbirlərə əl atmağa sövq edir. Bir müddət əvvəl yay aylarından etibarən Qarabağa Ermənistandan əsgər göndərilməyəcəyi barədə məlumatlar yayılsa da, yenə də gərginliyi tətikləyən hərəkətləri, həyasız davranışları izləməkdəyik. Belə ki, Qarabağdakı separatçı qurumun “təhlükəsizlik katibi” Vitaliy Balasanyan bu ilin fevralından etibarən “döyüş hazırlığı”na start verildiyini, bu təlimlərin may ayınadək davam edəcəyini elan edib. Bu, açıq-aydın antiterror əməliyyatlarının keçirilməsinə əsas yaradan davranışdır. Baş verənlər bir daha sübut edir ki, separatçıların fəallığı Rusiya sülhməramlılarının nəzarətində olan ərazilərdə məhz onların qanunsuz addımlarına göz yumulduğu üçün baş verir. Laçın dəhlizindən gedib-gələnlər ciddi yoxlanılmalıdır. Köçəryan və Sarkisyan axtarışa verilibsə, demək ki, onlar başqa ölkəyə keçəndə mütləq saxlanılmalıdır. Ola bilər ki, Ermənistan bütün beynəlxalq konversiyaları bu məsələdə qulağardına vursun. Ancaq həmin adamlar istənilən ölkəyə gedərkən mütləq saxlanılmalıdır. Qarabağa səfər edərlərsə, mütləq saxlanılıb, bizim istintaq orqanlarına təhvil verilməlidir. Sülhməramlılar bunu etməsələr, öz missiyalarını pozmuş olacaqlar. Buna görə də, təbiidir ki, Azərbaycan öz etirazını və tələbini bildirəcək”.
Məhəmmədəli QƏRİBLİ
