“Hazırda Xarkovdayam, vəziyyət çox gərgindir. Bütün otelləri boşaldıblar. İnsanlar pərişandır, mümkün qədər şəhəri tərk etmək istəyirlər. Artilleriyadan atəş açılır. Hazırda Rusiya tankları şəhərin girişlərindədir, şəhərə daxil olurlar. Şəhər rus ordusu tərəfindən mühasirəyə alınıb. Camaat çox narahatdır, əndişə və qorxu içindədir. Şəhərdə təcili yardım maşınları daha çox gözə dəyir, yaralananlar var. Xarkovun kənarlarında tələfat və yaralılar olduğu barədə danışılır”.
Bunu “Bakı-Xəbər”ə hazırda Ukraynanın Xarkov şəhərində olan İSBAM sədri Samir Adıgözəlli Ukraynadakı vəziyyəti şərh edərkən bildirib.
Soydaşlarımızın vəziyyəti ilə bağlı da məlumat verən S.Adıgözəllinin sözlərinə görə, azərbaycanlıların xəsarət almaqlarına dair hər hansı bir informasiya yoxdur. Orada azərbaycanlı tələbələrin olduğunu deyən S.Adıgözləlli bildirdi ki, o gənclərin ailələri ciddi narahatlıq içindədir: “Azərbaycanlılar arasında xəsarət alan yoxdur, amma soydaşlarımız da ciddi narahatlıq keçirir. Burada azərbaycanlı tələbələr var, biz də burada tələbələrə əlimizdən gələn dəstəyi verməyə çalışırıq, onlara müəyyən məsələlərdə kömək oluruq. Xüsusən də onları hadisələr barədə düzgün məlumatlandırırıq və tövsiyə edirik ki, evdən bayıra çıxmasınlar, haradadırlarsa ərzaq alıb orada da qalsınlar. Bizim buradakı fəxri konsulumuz Əfqan Salmanov da sübh tezdən konsulluqdadır, camaat gəlir, hər kəs bir sual verir, o da hər kəsə əlindən gələn köməkliyi göstərir. Vəziyyət çox ağırdır. Dünən axşam da Xarkovda diaspor təşkilatların rəhbərləri ilə birgə toplantı keçirdik. Konsulluqda Ukraynada baş verənlərlə bağlı müzakirə apardıq. Fevralın 24-də baş verənlər də müzakirəmizin vacib olduğunu göstərdi. Burada yaşayan, işləyən azərbaycanlıların vəziyyəti ilə bağlı məsələni müzakirə etdik. Konkret olaraq şəhərin mərkəzinə hər hansı bir artilleriya, raket atəşi yoxdur, amma kənarlarına atılır. Camaat təşviş içindədir, Xarkov kütləvi şəkildə boşalır. Qiymətlər də həddən artıq bahalaşıb, az sayda mağazalar açıqdır və orada da uzun növbələr var. Sizinlə danışıram, qulağıma top atəşinin səsi gəlir. Əhali çox narahatdır”- deyə S.Adıgözəlli bildirdi.
İradə SARIYEVA
